Lúcas 18
18
Caibidil XVIII
Tá orainn a ḃeiṫ ag guiḋe de ṡíor. An Fairisíneaċ agus an puibliocánaċ. Contaḃairt an tsaiḋḃris. Leiġeastar an dall.
1Agus laḃair sé fáiṫscéal leo fosta, gur ċóir dúinn a ḃeiṫ ag guiḋe de ṡíor,#Eccl. 18, 22; 1 Teas. 5, 17. agus gan ár misneaċ a ċailleaṁaint,
2Ag ráḋ: Ḃí breiṫeaṁ ann i gcaṫair áiriṫe, agus ní raiḃ eagla Dé ann ná áird ar ḋuine aige.
3Agus ḃí baintreaḃaċ áiriṫe san ċaṫair sin, agus ṫigeaḋ sí ċuige, ag ráḋ: Ḋéan ceart liom ar mo eascaraid.
4Agus ḋiúltuiġ sé ar feaḋ i ḃfad. Aċt ina ḋiaiḋ sin duḃairt sé leis féin: Giḋ naċ ḃfuil eagla orm roiṁ Ḋia ná áird agam ar ḋuine,
5Ciḋeaḋ, de ḃriġ go ḃfuil an ḃaintreaḃaċ seo mo ḃoḋraḋ, ḋéanfaiḋ mé ceart léi, ar eagla go dtigeaḋ sí fá ḋeireaḋ agus mé a ḃualaḋ duḃ san aġaiḋ.
6Agus duḃairt an Tiġearna: Éistigiḋ, cad é déir breiṫeaṁ na h-éagcóra;
7Agus naċ ndéanfaiḋ Dia ceart dá ḟíréin féin a ḃíos ag scairtiġ air lá agus oiḋċe, agus an mbéiḋ foiġid aige ina gcás?
8Deirim liḃ go ndéanfaiḋ sé ceart dóiḃ gan ṁoill. Aċt ciḋeaḋ, nuair a ṫiocfas Mac an Duine, an dóiġ leat go ḃfuíġiḋ sé creideaṁ ar an talaṁ?
9Agus laḃair sé an fáiṫscéal seo ḟosta le dream áiriṫe a raiḃ muiniġin acu astú féin aṁail mar ḟíréin, agus a ṫarcuisniġ daoine eile:
10Ċuaiḋ beirt ḟear suas ċun an teampaill a ḋéanaṁ urnaiġe: ba Ḟairisíneaċ duine acu, agus puibliocánaċ an duine eile.
11Ṡeasuiġ an Fairisíneaċ agus ġuiḋ sé leis féin mar seo: A Ḋia, ḃeirim buiḋeaċas duit naċ ḃfuil mé mar an ċuid eile de na daoine: creaċadóirí, luċt éagcóra, aḋaltrannaiġ, ná fosta mar an ṗuibliocánaċ seo;
12Troiscim ḋá uair san tseaċtṁain; ḃeirim deaċṁaiḋe as gaċ níḋ dá ḃfuil agam.
13Aċt ṡeasuiġ an puibliocánaċ i ḃfad ar gcúl, agus níorḃ áil leis fiú a ṡúla a ṫógáil suas ċun neiṁe, aċt ḃuail sé a uċt, ag ráḋ: A Ḋia, bí trócaireaċ liom-sa, peacaċ.
14Deirim liḃ: is é an fear seo a ċuaiḋ aḃaile fíréanta agus níorḃ é an fear eile: #Mait. 23, 12.óir gaċ aoinneaċ a árḋuiġeas é féin, ísleoċar é; agus an té a ísliġeas é féin, árḋóċar é.
15Agus ḃí siad ag taḃairt na leanḃ ċuige fosta,#Mait. 19, 13; Marc. 10, 13. go gcuireaḋ sé a láṁ orṫa. Agus nuair a ċonnaic na deisciobail sin, ḃagair siad orṫa.
16Aċt ġoir Íosa ċuige iad, agus duḃairt: Leigigiḋ ċugam na páistí, agus ná coscaigiḋ iad; óir is le n-a leiṫéidí sin ríoġaċt Dé.
17Amén adeirim liḃ: Cibé naċ nglacfaiḋ ríoġaċt Dé ċuige ar nós leinḃ, ní raċaiḋ sé isteaċ inntí.
18Agus d’ḟiafruiġ uaċtarán áiriṫe de, ag ráḋ:#Mait. 19, 16; Marc. 10, 17. A Ṁáiġistir ṁaiṫ, cad é ḋéanfas mé ċun beaṫa ṡíorraiḋe a ṡealḃaḋ?
19Agus duḃairt Íosa leis: Cad ċuige a ngoireann tú maiṫ díom? Ní maiṫ aoinneaċ aċt Dia aṁáin.
20Is eol duit na h-aiṫeanta:#Ecs. 20, 13. Ná déan marḃaḋ; ná déan aḋaltranas; ná déan goid; ná taḃair fiaḋnaise ḃréige; taḃair onóir do d’aṫair agus do do ṁáṫair.
21Agus duḃairt seisean: Ċoiṁéad mé iad sin uilig ó m’óige.
22Agus nuair a ċuala Íosa sin, duḃairt sé leis: Tá aon níḋ aṁáin do ḋíṫ ionnat go fóill: díol gaċ níḋ dá ḃfuil agat, agus taḃair do na boċta, agus béiḋ stór agat ar neaṁ; agus tar, lean mise.
23Ar a ċluinstin sin dó, ṫáinic brón mór air, óir ḃí sé antsaiḋḃir.
24Agus nuair a ċonnaic Íosa go dtáinic brón air, duḃairt sé: Naċ deacair dóḃṫa sin a mbíonn saiḋḃreas acu dul isteaċ i ríoġaċt Dé.
25Óir is fusa do ċamall dul fríd ċró snáṫaide, ná do ḟear ṡaiḋḃir dul isteaċ i ríoġaċt Dé.
26Agus duḃairt an ṁuinntir a ḃí ag éisteaċt: Agus cé h-é ar féidir a ṡáḃáil?
27Agus duḃairt sé leo: Na neiṫe is do-ḋéanta ag daoine, is so-ḋéanta ag Dia iad.
28Agus duḃairt Peadar: Féaċ, d’ḟágamar sinne gaċ níḋ agus leanamar ṫú.
29Agus duḃairt sé leo: Amén adeirim liḃ, ní ḟuil aoinneaċ dár ḟág teaċ nó aṫair nó máṫair nó dearḃráiṫre nó bean nó clann ar son ríoġaċt Dé,
30Naċ ḃfuiġiḋ i ḃfad níos mó ar an tsaoġal seo, agus beaṫa ṡíorraiḋe ar an tsaoġal atá le ṫeaċt.
31Agus ġaḃ Íosa ċuige an dáréag,#Mait. 20, 17; Marc. 10, 32. agus duḃairt leo: Féaċ, téiġimíd suas go h-Ierusalem, agus cóiṁlíonfar gaċ níḋ dá ḃfuil scríoḃṫa ag na fáiḋe fá Ṁac an Duine;
32Óir ḃéarfar suas do na ciniḋeaċa é, agus ḋéanfar magaḋ faoi, agus ḋéanfar é a sciúrsáil, agus caiṫfear seileogaí air,
33Agus i ndiaiḋ é a sciúrsáil, cuirfiḋ siad ċun báis é, agus ar an treas lá éireoċaiḋ sé arís.
34Agus níor ṫuig siad aon níḋ acu seo, agus ḃí an briaṫar seo foluiġṫe orṫa, agus níor ṫuig siad na neiṫe a duḃraḋ.
35Agus ṫárla, nuair a ṫáinic sé cóṁgaraċ do Ierico, go raiḃ dall áiriṫe#Mait. 20, 29; Marc. 10, 46. ina ṡuiḋe ar ṫaoiḃ an ḃóṫair ag iarraiḋ déirce.
36Agus nuair a ċuala seisean an sluaġ ag dul ṫart, d’ḟiafruiġ sé cad é ba ċiall dó.
37Agus d’innis siad dó go raiḃ Íosa as Nasair ag dul ṫart.
38Agus scairt sé aṁaċ, ag ráḋ: A Íosa, a Ṁic Ḋáiḃiḋ, déan trócaire orm.
39Agus na daoine a ċuaiḋ i dtoiseaċ, ḃagair siad air a ḃeiṫ ina ṫost. Aċt is aṁlaiḋ is mó a scairt seisean: A Ṁic Ḋáiḃiḋ, déan trócaire orm.
40Ṡeasuiġ Íosa, agus d’órduiġ sé é a ṫaḃairt ċuige. Agus nuair a ṫáinic sé i n-aice leis, d’ḟiafruiġ sé de,
41Ag ráḋ: Cad is áil leat go ndéanfainn duit? Agus duḃairt seisean: A Ṫiġearna, mé mo raḋarc d’ḟaġáil.
42Agus duḃairt Íosa leis: Bíoḋ do raḋarc agat: ṡlánuiġ do ċreideaṁ ṫú.
43Agus ḃí a raḋarc aige ar an ḃomaite, agus lean sé é, ag taḃairt ġlóire do Ḋia. Agus ar a ḟeiceáil sin do na daoine, ṫug siad go léir molaḋ do Ḋia.
Attualmente Selezionati:
Lúcas 18: ASN1943G
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
rights held by the Bible Society in Northern Ireland
