लूका 21

गरीब विधवाआ खरु दान

(मरकुस 12.41-44)

1अने येशु डोआं उगाडीत धनवान मांहे याहा आपाआ दान भंडाराम टाकत्ले पहीले. 2तिये एक गरीब विधवाहा पण तीयाम बेन दमड्या ताकीलावेले पहीले. 3तेहलाम तो कोयु, आय तुमामे खरोज कोत्लू का आव गरीब विधवेने आखाम जाखो टाक्यो होय. 4काहाके ते आखे आपाआ-आपाआ कोमाय मायरोत दानुमे किबी टाक्ये होय, परंतु इयेज आपाआ कमाईमे रोत आपाआ आखे उपजीविका टाकीत आप्यी होय.

युगोंओ अंतोओ लक्षण

(मत्ती 24.1-14; मरकुस 13.1-13)

5तेहलाम किबी मांहे मंदिराम विषयी कोयु ओते का ते केहलो हाजी ते डोणे अने भेटाआ वस्तुवाही होबाडीलो होय, तेहलाम तो कोयु, 6“तेदीही आवे, तीयाम ओ आखे जे तुमु पालीत होय, त्यामेरयू इही किबी दोणोपो डोणो पण नाहा सुटे जो पाड्यू जानारू नाहा” 7तिये तियाहा फ़ुस्ल्याआ, “ओ गुरुजी, ओ आखे केधी उवे? अने ओ आखे गोठी उविलापो उवे, ताहा तियाअ वेले नाहाकोत चिन्ह उवे?” 8तो कोयु, “सावध रो का ठोगीत न जानारू, काहाके जाअखो माआ नावामेहे आविलो कोअही, आय तोज होय, अने ओ पण का, वेल जागे आवयी होय, तुमु तियाआ फासाडी नाहा निहित जाऊ. 9जाहा तुमु लढाया अने दंगू याविषयी होमलीनारू ताहा घाबरील्यो जाऊ नाहा, काहाके ओ उवे आवश्य होय; पण तियाअ टायमोमें एतांम आखिर उवे नाहा” 10तेहलाम तो तियाहा कोयु, “जाती पोओ जाती अने राजपो राज्य उठी” 11अने वोडो-वोडो भूकंप उवे, अने जोगो जाग्तली दुष्काळ अने मऱ्या उवे, अने जुगोमरोत भिवाडनारू गोठी अने वोडू वोडी चिन्ह प्रगट उवे. 12पण आव आखे गोठीई पहीले ते माआ नावोवाही तुमामे तोअणारू अने त्रास आपी, अने सभास्थानाम होपित कोअनारू, अने बंदिकोअमे टाकही, अने राज्य आगाडी अने अधिकाऱ्याआ आगाडी घेऊन आवे. 13पण ओ तुमाआ याकोअता साक्ष आपलो संधी ओतगोयु जानारू. 14यकोअता आपाआ-आपाआ मोनामे निर्धार मेका का आमाहा पाल्या उत्तर आपलो चिंता नाहा कोअनारू. 15काहाके आय तुमामे एह्ली बल बुद्धी आपी का तुमाआ आखे दुश्मन आडवाडूहु अने त्याविरुध्द कोअनारू नाहा. 16तुमाआ याह्ही-वडील, पाही, अने होगवाड्ये, अने हेगांति पण तुमामे तोईत आपी; इहीजा का तुमाआ मायरोत किबी माईत टाकही. 17माआ नावाकोता आखे मांहे तुमाआ तिरस्कार कोअनारू 18परंतु तुमाआ मुंडकाआ एक केहो पण वाकडू उवे नाहा. 19आपाआ धीरावाही तुमु आपाआ जीवोहो वासाडीत मेकही.

यरूशलेम मेहे नाश

(मत्ती 24.15-21; मरकुस 13.14-19)

20जाहा तुमु येरुश्लेमाहा सैन्यांवाही कोमेऱ्ये पाल्लये, तेहलाम होमजीत ल्या का तियाआ निवरील्यो जागे होय. 21तेहलाम जे यहुदियाम ओये ते डोगोम नाहीत जालो; अने जे यरुशलेमाम ओये ते बारथे निहित जालो; अने जे खेतुम ओये तीही नाहा जाऊ. 22काहाके ओ बदलू लेअले एहलो दीही रोही, तीयाम लेखीतमेकली आखे गोठी पुरो ओतगोयु जानारू. 23तिया दिहोम पोटारी अने दुध पिवाळणाऱ्या ओये, त्याकोअता हायहाय काहाके का राष्ट्रातम वोडू त्रास अने आव माहाहूपो उवे. 24ते तलवारीई धारेवाही गुगदितबोले, अने आखे देशुमे माहुंमे बंदी ओतगोयु मोकल्या जानारू; अने जोपोरोत दिहरे देशोओ वेल पुरो नाहा उवे, तोपोरोत येरुश्लेम अन्य जाती गुडानिसे तुळविल्ये जाय.

परमेश्वरोओ राज्य आरी होय

(मत्ती 24.29-31; मरकुस 13.24-27)

25दिह, अने चंद्र, अने तारे या चिन्ह देखाय; अने धरतीपो राष्ट्र-राष्ट्रामध्ये माहाहूपो संकट आविलो, काहाके ते दर्या गरर्जनेअ अने लाटा लहारीवाही घाबरील्यो जानारू. 26पिकेवाही अने संसारपो आवणारी आपत्तीही वात पाहता-पाहाता मांहाहा जीवूणु जीवनाहा रोही, काहाके जुगाआ शक्ती आलाडी जानारू. 27तेहलाम ते माअहा पोऱ्याहा सामर्थवाही अने वोडा महिमा वादलापो आविलावेले पालीही. 28जाहा आव गोठी घळू लागे, ताहा हीदू ओतगोयु आपाआ मुदकाहा उपो विसिलो; काहाके तुमाआ छुटकारु जागे होय.

परमेश्वरोओ राज्य आरी होय

(मत्ती 24.32-35; मरकुस 13.28-31)

29येशु तियाहा एक दृष्टान्त पण कोयू “अंजिराआ सोडोहो अने आखे साडोहो पाला.” 30जे पोन तीयाम फुट काडीलो तेह्लाम, ताहा तुमु पालहु आमुज ओलखीत लेहो का उनालू जागे आवयू होय. 31आवा प्रकारे आखे जांहा तुमु आव गोठी उवेताहा पालनारू, तेहलाम होमजीत ल्या का परमेश्वरोओ राज्य जागे आव्ये होय. 32आय तुमामे आखे खोरो कोत्लू का जोपोरोत ए गोठी नाहा उवे, तोपोरोत आव पिढीही नाश नाहा उवे. 33जुग अने धोरती टोलीतजाय, पण माआ गोठी केधीज नाहा टोलणारो.

कायम तियार रोजा

34यकोअता होंबलीत रो, एहलो न होय का तुमाआ मोन नशाहा अने संसाराआ चिंता, अने आव जीवनोओ चिंताम सुस्त ओतगोयु जानारू, अने तेदीही तुमापो अचानक सारखो अचानक आवित पोडे. 35कोईत ते आखे धोरतीपो आखे रोणारापो ज्या प्रकारे आवित पोडे 36याकोता जागतू रो अने हर एक टायमोमें प्रार्थना कोईत रो का तुमु आव आखे आवनारा गोठीही वासिलो अने माअहा पोऱ्या आगाडी उभे रोण्याआ लायकी बोनहू. 37ओतो दिहोम मंदिरोम शिक्षण आपित ओतु, अने राती बारथे जात जैतून नावोओ डोगोपोरोत ओतु; 38अने वेगऱ्यू आखे मांहे तियाआ होमला याकोअता मंदिरोम तियाआ जागे आवीत ओते.

Attualmente Selezionati:

लूका 21: NOINT

Evidenziazioni

Copia