लूका 19

जक्कई कोओ येशु

1तो यरीहो माय जातू ओतु. 2तीइही जक्कय नावाआ एक माहुहू ओतु तो कर वसूल कोआनाराआ मुख्य ओतु. 3तियाहा येशुहू पालीलो ओते के कोडु होय, पण तियाहा गर्दीवही देखाहे ने ओतू काहाके तो बेटक्यू ओतु. 4तेहलाम तियाहा पालीलाकोता तो होमला उंमबरो साडोपो सोढयू काहाके येशु तियाआ सोडकोपो जानारू ओतु. 5जांहा येशु तिया जाग्तली पुगीतगोयू तेहलाम उसे पालीत तिये कोयु, ओ जक्कय, वेगु उतरित आव; काहाके आज माहु ताआ कोअमे रोलो होय. 6तो आनंदावाही उतरित आपाआ कोअमे घेऊन गोल्यो. 7ओ पालीत आखे मांहे कुरकुर कोहू लागाडीत, तो ताहा होमला पापी माहुहु कोअमे गोल्यो होय. 8जक्कयाहि उभे रोत प्रभूहु कोयु, ओ प्रभू आय आपाआ आर्दी धनदौलत गोरब्योहो आपोहो अने जर कोडाआ किबी पण अन्यायावाही लेधलो होय ताहा तियाहा चारपट फासी कोअनारू. 9तेहलाम येशु तियाहा कोयु, आज आव कोओहो तारण जोडयो उवे होय त्यापोत ओ पण अब्राहमोओ पोऱ्या होय. 10काहाके माअहा पोऱ्या टाकाईत गोल्याहा होदिलाकोता अने त्याआं तारण कोइला कोअता आवयू होय.

दस मुहरे

(मत्ती 25.14-30)

11जाहा ते याआ गोठी होमलित ओते ताहा तिये एक दृष्टान्त कोयु, यावाही का तो यरुशलेम जागे ओतु अने ते होमजाडीत ओते का परमेश्वरोओ राज्य ओमे प्रकट उवे होय. 12कोईत तिये कोयु, एक श्रीमंत माहुहू सेटे तियाहा जातलू म्हणजे तो राज जागा मिलवीत फिरीत आविलो. 13तिये आपाआ सेवकामेहे दहा जोह हादीत तियाहा दहा शिक्के आप्लु अने तियाहा कोयु, आय फासी आविलो तोपोरोत लेनदेन कोईओलो. 14पोन तियाआ नगरामे रोणारे त्याआरी द्वेष कोईओलो अने तियाआ फासाडी वकीलाआ त्यापोरत कोत मोक्ल्यीत का आमाहा नाहा जोवे का ओ आमापो राज्य कोअनारू. 15जाहा तो राज जागा मिलवीत फिरीत आवयू तेहलाम एहलो उवे का आपाआ सेवकोहो ज्याहा तिये रोखडी आप्लु ओते आपारी हादीत लाविले म्हणजे मालुम कोअनारू का तिये लेनदेन लेतजा नाहाकोत-नाहाकोत कामावोह्यो. 16तेहलाम पेल्लो आविलो कोयु, ऐ स्वामी ताआ शिक्काकोईत आय दहा शिक्के कामावोह्यो होय. 17तिये तियाहा कोयु, धन्य, ऐ उत्तम सेवक जास्तीज अने कोम माय विश्वासयोग्य निघाल्यू ओमे दहा नगराउपो अधिकार मेका. 18दिहरा आविलो कोयु, ऐ स्वामी, ताआ शिक्काकोईत आय आजू पाच शिक्के कामावोह्यो होय. 19तिये तियाहा पण कोयु तू पण पाच नगरोत अधिकारी ओतगोयु जा. 20तिसरुजे आविलो कोयो, ओ स्वामी, पाला ताआ ओ शिक्का होय ज्याहा आय कापड़ामे बांधीत मेक्ल्ये होय. 21काहाके आय ताहु बित ओतू यावाही का तू कडक माहुहू होय जे तू कोल्यु नाहा तियाहा विसित लेहो अने जे तू पेहे नाहा तियाहा तू वाड्तुलू. 22तिये तियाहा कोयु, ऐ दुष्ट सेवक, आय ताआज सोबिकोईत ताहु दोषी ठरावीत होय तू माहु जाणम ओतु का आय कडक माहुहू होय जे आय मेक्ल्ये नाहोत आय विसित लेहो अने जे आय पेहे नाहा ते आय वाड्तुलू; 23ताहा तू माआ सावकारापो काहा मेक्ल्ये नाहा का आय आविलो व्याजाआरी घेऊन लेधलो ओते? 24जे मांहे जागे उभे ओते तिये तियाहा कोयु तो शिक्का त्यापोरोत घेऊन ल्या अने तियाहा दया ज्याआपो दहा शिक्के होय. 25तिये तियाहा कोयु, ऐ स्वामी, तिया जागे ताहा दहा शिक्के ताहा होय? 26आय तुमामे कोत्लू का ज्याआपो होय तियाहा आप्लु जाइअलो; अने ज्यापो नाहा त्यापोरोत ते पण घेऊन लेधलो जाइअलो जे तिया जागे होय. 27पोन माआ तियाअ वैऱ्यी ज्याहा वाटत निमिले का आय तियापो राज्य कोहू तियाहा इही माआगाडी लेतआवीत तियाआ घात को.

यरूशलेम मेहे प्रवेश

(मत्ती 21.1-11; मरकुस 11.1-11; युहन्ना 12.12-19)

28ए गोठी कोत तो यरुशलेमाही तियाआ आगाडी-आगाडी गोल्यो 29जाहा तो जैतून नावोओ डोगोपो बेथफगे अने बेथानी जागे पुगीतगोयू, तेहलाम तिये आपाआ शिष्यामेरोत बेन जोह ओ कोत मोक्ल्यीत, 30आगाडी गावून जा; अने तीयाम पुगताज एक गोदडीई गोदडा पिलो जियीपो खोरोज कोडु प्रवेश कोअयु नाहा बांधीत मेकही तुमामे जोडीत तियाहा सोडीत घेऊन आव. 31जर कोडु तुमामे फुसनारू का काहा सोडीदेतले, ताहा ओ कोओलो का प्रभूहु याहा गोरोज होय 32ज्याहा मोक्ल्यीत ओते तिये जात तियाहा कोयु ओते, तेहलूज देखाये 33जाहा ते गोदडा पिलाहा सोडीत ओते, तेहलाम तियाआ मालक्योहो तियाहा फ़ुस्ल्याआ, आव गोदडा पिलाहा काहा सोडीत होय? 34तिये कोयु, प्रभूहु याहा गोरोज होय 35ते तियाहा येशुआरी घेऊन गोये अने आपाआ कापडे तिया शिंगरापो टाकीत येशुहू तियापो बोहाडीत आप्लु. 36जाहा तो जात ओतु तेहलाम ते आपाआ कापडे वाटेपो मेकीत जात ओते 37जागे आवीत ओयताहा जांहा तो जैतून डोगोओ उतरनिवर पुगीतगोयू तेहलाम शिष्याची आखी मंडली तियाअ आखे सामर्थ्याआ कामामुळे जे तिये पालील्यो ओते आनंदाम ओतगोयु वोडो शब्दावाही परमेश्वरोओ स्तुती कोहू लागाडीत, 38“धन्य होय तो राजा, जो प्रभूउ नावामेहे आवत्लू होर्गाम शांती अने जुगामेहे महिमा होय. 39तेहलाम गर्दीमेऱ्ये किबी परुसी कोहू लागाडीत ऐ स्वामी आपाआ शिष्यांआ धमकाड.” 40तिये उत्तर आप्लु आय तुमामे कोत्लू जर ओ ठावकू रोही ताहा डोणो आअडीही.

यरूशलेमो कोअता विलाप

41जांहा तो जागे आवयू तेहलाम नगराहा पालहु तो रोड्यू. 42अने कोयु केतो हाजो उवे ओते का तांहुज आव दिह्याहा अने शांती गोठीही होमज्ये ओते पण ओमे ते ताआ डोआवाही निकाईत गोये होय. 43काहाके तेदीही तापो आविलो का ताआ दुश्मन कट बांधीत ताहु गांडे पेअही अने चारही साइटूमे ताहु दाबनारू, 44अने ताहु अने ताआ पोऱ्याहा जो तांआम होय, कादकाम मेलविनारो अने तामेहे दोणोपो डोणो पण सोडविणारू नाहा; काहाके तू टाईमोम जांहा तापो कृपा नजर कोअयी गोयी ओलखीही नाहा.

मंदिरोम रोत बेपारिही काड्यु

(मत्ती 21.12-17; मरकुस 11.15-19; युहन्ना 2.13-22)

45तेहलाम तो मंदिरोम जात वेसनाराहा बारथे काडीलो लाग्यू, 46अने तियाहा कोयु, “लेखिलो होय, माआ कोअ प्रार्थना कोअ होय, पण तुमु तियाहा चोराहा गुफा बोणाडीत आप्यी होय” 47तो दाडीअ मंदिरोम हिकवन आपित ओतु; अने मुख्य याजक अने शास्त्री अने मांहोओ प्रमुख तिया नाश कोइला कोअता योग्य वेल होदित ओते 48पोन किबी उपाय काढहु सेकेले नाहा का ओ कोडला प्रकारे कोईओलो काहाके आखे मांहे वोडो आशेवाही तियाआ होमलिते ओते.

Attualmente Selezionati:

लूका 19: NOINT

Evidenziazioni

Copia