युहन्ना 2

काना गाव मेहे वेहवाल

1फासाडी तीसरे दीही गलील काना गाव मेंहे एखाआ वेहेवाल ओतो, अने येशु याह्ही बी तीही ओती. 2वेहवालोम येशु अने तियाआ शिष्य यांहा पण आमंत्रण ओते. 3त्याजागे जांहा द्राक्षरस सेलायू तेहलाम येशुउ याह्ही येशुहू तेकोहे, तियापो ओमे द्राक्षरस नाहा. 4येशु तियाआ याह्हीही कोयु ओतू, “माहु ताआसी कि काम होय? माआ वेल फासी आवल्यी नाहा” 5फासाडी तियाआ याह्ही सेवकोहो कोयु, “ओ जे किबी कोअही ते को.” 6त्याजागे पाई पोईला सहा डोणाआ कुंडे मेक्ल्ये ओते ओ कुंडो मेकल्ये ओते जेहलो यहुदी शुद्धिकरण उंघलीलाकाजे कामोम आवीत ओते हर एक कुंडाम तीन-तीन मोन पाई होमाय एहलो ओते. 7येशु तियाहा कोयु, “कुंडामे पाई पोईत दया” अने पावरोओ कुंडामे काठोकाठ पाई पोईत आप्लु. 8फासाडी तिये तियाहा कोयु, “ओमे थोडोज बारथे काडा, अने रोटू कारभाऱ्याहि घेऊन जा तेहलाम ते घेऊन गोये.” 9फासाडी जांहा रोटू कारभाऱ्या तियाआ चव लेदि, जे द्राक्षरस बोन्यो ओते तियाहा कोलेहे नाहा का ओ द्राक्षरस कोरात आव्ये परंतु तियाअ सेवकोहो मालुम ओते, जिये पाई काढ्ये ओते फासाडी रोटू कारभाऱ्या वोरोहो हादाडये, 10अने तियाहा कोयु, हर एक जोओ पालील्यो हाजो द्राक्षरस आपोहो अने हादाडल्यो मांहे जांहा तृप्त ओये तेहलाम निरस परंतु तुमु ताहा उत्तम द्राक्षरस ओमेजा राखीत मेकिलो होय. 11येशु गालील च्या काना गावून पालील्यो आश्चर्य काम कोईत आपाआ गौरव प्रकट कोअयी जीयाद्वारे तियाआ शिष्यांनी तियापो विश्वास कोअयु. 12याआनंतर येशु अने तिया याह्ही, पाही अने चेलाआरी कफर्णहुमात जातले गोये तीइही ते किबी दीही रोल्या.

मंदिरोम रोत बेपारीही काड्यु

(मत्ती 21.12-13; मरकुस 11.15-17; लूका 19.45-46)

13यहुद्याआ वल्हाडण तिवार जागे आवयू होय त्याकोता येशु यरुशलेमोमे जातलू गोल्यो. 14त्याजागे मंदिरोम येशु पालील्यो का मांहे बोयलो, मेंढे कबूतर याआ विक्री कोईत ओते अने शिक्के बदलीनारे व्यापारी आपाआ गादिपो बोह्ये ओते. 15त्याकोता तिये दोराआ कोरठा बनविल्यो अने आखाहा डोगरे, मेंढे अने बोलोद मंदिर ओढीत आप्लु अने शिक्का बोदलिनाराआ शिक्काआ खुर्दाही उलटावीत आप्यू अने चौरंग उबडो कोल्यु, 16कबूतर वेसनाराहा कोयु, “यांहा बारथे घेऊन जा, माआ बाह्हाआ कोओहो बाजार नाहा बोनावयाहा.” 17यापो तियाआ शिष्यांआ ओर आवयी का शास्त्रात लेखिलो होय का, ताआ कोओ कोअता माआ धून माहुंज खात टाकही. 18उत्तर आपित यहुदी येशुहू कोयु, तू आमाहा कोठले अदभूत चिन्ह देखाडहु शकतो का ज्याआपोरोत तू जे किबी कोअत्लू तिया तू अधिकारी होय ओ स्पष्ट कोहू शकतो? 19येशु लेतजा तियाहा उत्तर आपित कोयु, “याआ मंदिराहा पोडीत टाका, आय तीन दिहोम उभे कोअही” 20यापो यहुदी कोयु, याआ मंदिराहा बांधण्या कोअता सालीह वर्षे लागीई ओती अने तियाहा तू तीन दिहोम बनाडूहु निघाल्यू? 21परंतु आपाआ सांगण्यात ज्या मंदिराबद्दल येशु चर्चा कोअयी ओती ते तियाआ डील ओते. 22आगाडी जात जांहा तो मोल्यानंतर फासी जिवंत ओवयू तेहलाम तियाआ शब्द शिष्यांआ ओर आव्ये का येशु ओ कोयु ओते अने शास्त्राआना येशु शब्दापो तिये विश्वास कोअयु.

येशु मांहोओ मनोहो जाअत्लू

23वल्हाडण तिवाराआ दिहोम जांहा येशु यरुशलेमो ओतु तेहलाम जाखो माहु तियाआ आश्चर्य कामोहो पालीत तियापो विश्वास कोअयु. 24पोन येशु स्वताला तियाआ भरोसे सोडये नाहा काहाके तो आखे माहुंहु उलखित्लू ओतु 25तियाहा याआ गोठीई काहीही गोरोज नाहाओती का कोडु आविलो तियाहा तियाअ मांहुं बद्दल कोअही काहाके मांहाहा मोनामे नाहाकोत होय ओतो उलखित्लू ओतु.

Attualmente Selezionati:

युहन्ना 2: NOINT

Evidenziazioni

Copia