PALABURU 8
8
Penaʼu ue
8:1-19
1Bareʼe ndakalingani i mPue Ala i Noho pai waʼa mpinatuwu anu njau sangkani-ngkani pai siʼa ri raya duanga setu. Ndapapewui i mPue Ala ngoyu, painaka montepuʼu teloo ue setu. 2Pura-pura mata ue ri raya ntana pai wombo ue ri yangi ndadampo. Wuromo uja, kako maʼai-ai kateloo ue. 3Kagananya 150 ndeme bareʼemo maʼai kayombu ue. 4Ri sampuyu papitu eo mbuya kapapitu, duanga setu sore ri lolo buyu sambaʼa ri buyu mongkodo Arara. 5Teloo mpaliu ue painaka ri sambaʼa eo mbuya ke sampuyu, tongawamo waʼa lolo buyu.
6Kagananya opompuyu ndeme, nalokamo i Noho tuke duanga, 7nepa nalapa sambaʼa tonci paa-paa. Tonci setu bareʼe mewalili ri duanga, paikanya moyoko wainjoʼu-waimaʼi rantani maʼaimo kojo kateloo ue setu. 8Sindara setu, napala i Noho sambaʼa tonci putiʼa da napaincani bara teloomo kojo ue setu. 9Paikanya ua bareʼepa teloo mpodago ue, painaka bereʼe narata ntonci putiʼa setu da petopanya. Painaka mewalili muni tonci setu ri duanga; nakabe i Noho tonci setu napapesua ri raya duanga. 10Nalantu woʼu i Noho papitu ndeme, nepa nalapa woʼu tonci putiʼa setu. 11Ri kalauka ndeme mewalili tonci setu ri siʼa, mantanjua ira ngkaju lana anu da matapa. Seʼi-seʼi naincanimo i Noho kateloomo ue. 12Nalantu woʼu papitu ndeme nepa nalapa woʼu tonci putiʼa setu; sangkani seʼi bareʼemo mewalili tonci setu ri siʼa.
13Ri tempo setu 601 ntaʼu tinuwu i Noho, ri sambaʼa eo mbuya anu kaʼisa, teloomo kojo ue setu. Naloka i Noho ata duanganya, nepa napapowawo sape-sape. Nakita mangaumo kojo wawo ntana. 14Ri ruampuyu papitu eo mbuya karadua, mangaumo sambawo lino.
15Nepa ndatoʼo mPue Ala ri Noho, 16“Pesuwumo ungka ri duanga setu sangkani-ngkani pai rongomu, waʼa anamu pai waʼa rongo ntau seʼe. 17Keni mpesuwu pura-pura tonci pai pinatuwu ntaninya, bose bara masiwu, da naka mojene pai tesebu ri sambawo lino.” 18Nepa mesuwu i Noho ungka ri raya duanga setu sangkani-ngkani pai rongonya, waʼa ananya pai waʼa rongo ntau seʼe. 19Pura-pura tonci pai pinatuwu anu ri karatana mesuwu ungka ri raya duanga setu, sambaʼa-sambaʼa seʼe santibura pai yunu kasiwianya.
I Noho mampanyombaka panyomba
8:20-22
20Nawangu i Noho sambaʼa lampaʼani mpanyomba i Pue. Nepa natima sambaʼa ri sangaya-sangaya tonci pai pinatuwu ntaninya anu bareʼe kapali, nepa napanyombaka mewali panyomba anu ndaʼombasi ri wawo lampaʼani setu. 21Mawongi wau mpanyomba anu napanyombaka setu mampakawongko raya ri mPue, inceʼe pai ndapantoʼo ri raya-A, “Yaku bareʼemo da mantadeasi lino ua powia ntolino; maka kuincani ungka ri kamanguranya, nawa-nawa ntolino itu majaʼa. Yaku bareʼemo da reʼe da kupaʼopisaka waʼa anu moʼinosa ewa anu nepa roo pinca kuwianaka seʼi. 22Sangkasae kareʼe lino seʼi, bareʼe bali-bali da reʼe tempo mpomuya pai tempo mpomota, turo ngkaranindinya pai turo ngkapanenya, turo mporeme pai turo mpouja, ri eo pai ri wengi.”
Attualmente Selezionati:
PALABURU 8: LAIPMF
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
