PALABURU 19
19
Salaa Sodomo
19:1-11
1Karoonya napolinggona i Burahima, malaimo malaeka radua setu njoʼu ri Sodomo, mawengi karata ntau seʼe njairia. Sindara setu i Loʼoti njau motunda-tunda ri baa-baa mpesua ri kota setu, pangkitanya karata ntau seʼe, meoko siʼa njoʼu mantomu tau seʼe, metutu siʼa mombukotu ri suara ntau seʼe, 2nepa natoʼo, “Kuperapi da mabuya rayami meʼonto ri banuaku, njairia da ndipawusoʼi witimi pai sambengi ri banuaku. Ane ndipokono, i raneo mowuro-wuro mpodago membangu komi nepa ndipaliu pelinjami.”
Paikanya mesono tau seʼe natoʼo, “Tarima kase, mbolimo kami sambengi ireʼimo seʼe, ri tana lapa ngkota seʼi.”
3Paikanya napari-pari i Loʼoti mangasale tau seʼe, painaka kapusanya mesuamo tau seʼe sangkani-ngkani pai siʼa ri raya banuanya. Napatoka i Loʼoti waʼa mpangkoni anu monyami da napowiaka roti gori ngkagananya, nepa mangkoni tau seʼe.
4Paikanya ri kabareʼepanya njoʼu yore linggona setu, jelamo waʼa nto Sodomo mangalimbu banua setu. Pura-pura tuama ri kota setu anu tuʼa pai anu mangura tepasambaka pura-pura njairia. 5#Tdu. 19:22-24 Meboo-boo tau seʼe ri Loʼoti, mampaoasi, “Mbeʼimo waʼa ntau anu sambengi ri banuamu? Papesuwuka kami tau seʼe da naka kapowia naka osa ncawoyo ndaya mami!”
6Mesuwu i Loʼoti ungka ri banuanya, roo na dampo wombo, 7natoʼoka waʼa nto Sodomo setu, “Ee waʼa ngkasangkompo, merapi puru yaku ri komi da naka neʼe kojo boi ndiwianaka powia anu majaʼa setu! 8Koisa ndipedongeka, reʼe radua anaku anu anaweʼa. Mbolimo inceʼe anu kupepombaika ri komi, nepa ndipowia malulu pepokonomi. Paikanya neʼe ndipowia bara nunjaa-njaa ri waʼa linggonaku seʼi; maka yaku sangaya-ngaya da mangkautawi tau seʼe.”
9Paikanya natoʼo waʼa nto Sodomo setu ri Loʼoti, “Palai iretu! Siko podo tau mencua da mangancongka kami? Pakaliga palai! Ane bareʼe siko da kajeani meruu ngkajaʼanya pai tau radua setu.” Inceʼe painaka natumbalaka ntau seʼe i Loʼoti, gumaruumo tau seʼe da mangaruasi dampo banua. 10Paikanya linggona radua setu maganggayo i Loʼoti nepa nanoʼo mesua ri raya banua, nepa narangkubaka ntau seʼe dampo. 11#2 Raj. 6:18 Nepa napakabuta ntau seʼe mata ntau pura-pura anu njau ri sambaliku banua setu, painaka moama-amamo waʼa ntau setu bareʼemo narata ntau seʼe wombo banua setu.
I Loʼoti mampalaika Sodomo
19:12-22
12Natoʼo linggona radua setu ri Loʼoti, “Ane reʼe anamu anu tuama, bara anamu anu weʼa, bara maniamu, bara waʼa ntinamu anu reʼe ri raya ngkota seʼi, poyunumo tau seʼe da naka mesuwu ungka ireʼi, 13maka kota seʼi da kagero. Ndadongemo i mPue waʼa mpetuluri anu manee kojo kono poʼengko waʼa ntau bangani ngkota seʼi, pai kami seʼi ndapokau da mangagero kota Sodomo.”
14Njoʼumo i Loʼoti madadu tengea ananya radua, natoʼoka tau seʼe, “Ndipesuwumo pakaliga ungka ireʼi, maka da ndageromo i mPue.” Paikanya nasarumaka ntau seʼe i Loʼoti podo mowuti-wuti.
15Mosu reme naʼiowaka malaeka redua setu i Loʼoti da naka maliga-liga malai. Natoʼo ntau seʼe “Iomo pakaliga. Palaimo pai rongomu pai anamu anaweʼa radua setu ungka ireʼi, da naka neʼe mate komi ane kageromo kota seʼi.” 16#2 Ptr. 2:7 Lingu raya i Loʼoti. Paikanya mapuru raya i mPue ri siʼa; inceʼe nanini linggona radua setu i Loʼoti pai rongonya pai ananya radua setu rantani rata ri sambaliku ngkota. 17Roo setu mompau sambaʼa ri oyo malaeka setu natoʼo, “Ndipoloncomo mangkeni inosami! Neʼe boi meeli komi pai neʼe meʼonto ri rato. Ndipoloncomo ndeku ri buyu mongkodo da naka bareʼe mate komi!”
18Paikanya mesono i Loʼoti natoʼo, “Odee, neʼe ndipokau kami da molonco ndeku ri buyu mongkodo. 19Lawi komi, mantulungimo yaku pai mancorepaka pai mampatuwu yaku. Paikanya buyu mongkodo setu maʼai kawalanya; boi yaku nakonomo ngkagero setu ri kabareʼepanya rata yaku njairia. 20Ndipeole, bareʼe ntani lawa ungka ireʼi njau sambaʼa kota kodi. Bara madago yaku da njoʼu metatondo njairia naka neʼe mate.”
21Mesono malaeka setu natoʼo, “Madago maka kota kodi setu bareʼe da kugero. 22Pakaliga, ndipoloncomo! Maka bareʼepa da reʼe bara nunjaa-njaa kupowia ane bareʼepa rata siko njairia.”
Ua natoʼo i Loʼoti kota setu kodi-kodi, painaka ndapapotoʼoka kota setu Soari.
Kagero Sodomo pai Gumora
19:23-29
23Kajela i Loʼoti ri kota Soari mebetemo reme. 24#Mat. 10:15, 11:23-24, Luk. 10:12, 17:19, 2 Ptr. 2:6, Yud. 7 Tingkarasaka ndapatudumo i mPue uja belera apu di Sodomo pai Gumora. 25Kota radua setu ndagero, ewanceʼe seʼe samalele rato pai pura-pura pinamuya sangkani pai pura-pura tau anu mampeari kota setu. 26#Luk. 17:32 Paikanya rongo i Loʼoti meeli ri taliku, painaka siʼa mewali nono watu mabure.
27Bangke reme, mowuro-wuro mpodago, maliga-liga i Burahima njoʼu di kareʼe mpekakorenya ri suara i mPue sambali wengi. 28Meole siʼa ri tondo Sodomo pai Gumora pai ri samalele ndatonya, nakita peokotaka ndangasu ungka ri wawo ntana setu, ewa peokotaka ndangasu ungka ri rapu anu bangke kojo. 29Ewanceʼemo ndapangagero i mPue Ala waʼa ngkota anu ri rato ngkareʼe mpeari i Loʼoti, ua mangaendo i Burahima painaka ndapelae i mPue Ala i Loʼoti molonco ungka ri kota setu.
Tuntuka anu mampomulika to Moabi pai to Amoni
19:30-38
30Ua maeka raya i Loʼoti maroo-roo ri Soari, inceʼe painaka malai siʼa pai ananya weʼa radua, maroo-roo ri raya mbayau. 31Natoʼo ananya anu tukaka ri tuaʼinya, “Papata matuʼamo, pai ri samalele ntana seʼi bereʼe tuama anu da mamporongo kita da nakareʼe anata. 32Maʼimo tapayanguni papata nepa yore sangkani-ngkani pai sira, da naka reʼe anata.” 33Ri wengi setu napapanginuka anggoro papanya, nepa njoʼu anu tukaka yore sangkani-ngkani pai papanya; nakeni ngkaʼai ngkayangu mpapanya bareʼemo naincani nunjaa anu mewali.
34Bangke reme natoʼo anu tukaka ri tuaʼinya, “Mawengi ngena yaku yoremo pai papa! I naini mawengi da tayanguni woʼu sira. Nepa njoʼu siko yore pai sira. Da naka kita raduamo seʼe paka marata ana.” 35Ewanceʼemo napayanguni ntau seʼe i Loʼoti ri wengi setu, nepa njoʼu ananya anu karadua yore pai siʼa. Nakeni ngkaʼai ngkayangu i Loʼoti painaka bareʼemo naincani nunjaa anu mewali. 36Inceʼe painaka mongkenimo ana i Loʼoti anu radua setu ungka papa ntau seʼe ngkalionya. 37Ana anu tukaka mampoana sambaʼa ana tuama anu napapotoʼoka i Moabi. Siʼamo anu mampomulika to Moabi anu reʼe wawaseʼi. 38Ana anu karadua mampoana sambaʼa ana tuama woʼu anu napapotoʼoka i Beni-Ami. Siʼamo anu mampomulika banca Amoni anu reʼe wawaseʼi.
Attualmente Selezionati:
PALABURU 19: LAIPMF
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
