PALABURU 14
14
I Burahima mampelae i Loʼoti
14:1-16
1Reʼe aopo mokole, inceʼemo: I Amurape mokole nto Babeli, i Ario mokole nto Elasa, i Kedolaome mokole nto Elami, pai i Tidea mokole nto Goyi, 2tau seʼe moʼiwali maewa alima mokole anu ntaninya, inceʼemo: i Bera mokole nto Sodomo, i Biriya mokole nto Gumora, i Sinabi mokole nto Adima, i Semeberi mokole nto Seboi pai mokole nto Bela anu ndatoʼo woʼu Soari. 3Mokole alima setu masintuwunaka mampasambaka waʼa ncurodado ntau seʼe ri Rato Sidimi anu wawaseʼi mewalimo Tasi Mate. 4Ri raya anu sampuyu pai radua ntaʼu tau seʼe ri ara mparenta i Mokole Kedolaome, paikanya ri taʼu kasampuyu pai tatogonya, tau seʼe maewamo siʼa. 5Ri taʼu kasampuyu pai aoponya, i Kedolaome pai waʼa mokole sampombesarumakanya rata pai waʼa ncurodado ntau seʼe manganangi to Rapai ri Asitero-Karinai, to Susimi ri Kamu, to Enimi ri Sawe-Kiriataimi, 6pai to Hori ri buyu mongkodo Edomi, nepa naduduki tau seʼe rantani rata ri Eli-Parani ri wiwi mpada bone. 7Roo setu waʼa ntau anu meduduki setu wali mpewalili ri Eni-Mesipa anu wawaseʼi ndatoʼo Kadesi. Napapeʼuru ntau seʼe samalele ntana Amale pai manangi woʼu to Amori anu maroo-roo ri Haseso-Tamari.
8Ungka lairia waʼa mokole ungka ri Sodomo, Gumora, Adima, Seboi pai Bela mampatikali surodado ntau seʼe ri Rato Sidimi nepa moʼiwali 9maewa waʼa mokole ungka ri Elami, Goyi, Babeli, pai Elasa; mewali alima mokole maewa anu aopo. 10Rato setu buke pai tibubu aspal, mewali ri polonco waʼa mokole ungka ri Sodomo pai Gumora ungka ri poʼiwali, manawu tau seʼe ri waʼa ntibubu setu. Tatogo mokole anu ntaninya inceʼe naleʼo lapa nepa molonco ri buyu mongkodo. 11Mokole aopo anu menangi mampamuru pura-pura anu reʼe ri Sodomo pai Gumora, tesuamo waʼa mpangkoni nateo ntau seʼe. 12I Loʼoti pinoana i Burahima anu maroo-roo ri Sodomo tesua woʼu ndatawani sangkani pai waʼa aga-aganya.
13Paikanya sambaʼa tau anu maleʼo lapa njoʼu mampetumbuka i Burahima, to Ibarani setu, pura-pura anu mewali setu. I Burahima maroo-roo mosu ri waʼa mpuʼu nunu kareʼe mpanyomba anu napotumpu i Mamire pai waʼa ngkasangkomponya, inceʼemo i Esikoli pai Aneri tau seʼe mosintuwu mpodago pai Burahima. 14Ri padonge i Burahima pinoananya ndatawani, napasambaka pura-pura tau ri kareʼe mpokemanya inceʼemo waʼa ntau anu maincanimo da moʼiwali 318 tau kasondonya, nepa naduduki ntau seʼe mokole aopo setu rata ri Daa. 15Njairia natila-tila i Burahima waʼa ntaunya bara tesangkuja ntila, mawengi nepa nasuaki iwali setu, menangi tau seʼe. Na duduki tau seʼe jela ri Hoba ri tondo utara kota Damasi. 16Naleʼo muni i Burahima marampa waʼa aga-aga anu roo napamuru iwali setu, ewanceʼe seʼe i Loʼoti sangkani pai aga-aganya, pai waʼa mbeʼa pai waʼa ntawani anu ntaninya.
I Melekisede madonco i Burahima
14:17-24
17Karoonya nanangi i Mokole Kedolaome sangkani pai waʼa mokole anu sambali pai siʼa, mewalilimo i Burahima. Nepa njoʼu I Mokole Sodomo mantomu siʼa ri Lembo Sowelanu ndatoʼo woʼu Lembo Mokole. 18#Ib. 7:1-10 I Melekisede, mokole ri Sale anu mewali tadu mpanyomba ri Pue Ala Anu Ndate ri Peawanya, mangkeni roti pai anggoro ri Burahima, 19nepa nadonco i Burahima natoʼo, “Mbolimo i Pue Ala Anu Ndate ri Peawanya, anu mampapewalimo yangi pai lino, mangadonco i Burahima! 20Teundemo i Pue Ala Anu Ndate ri Peawanya, anu mangawaikamo siko penangi ri iwalimu.” Roo sewtu nawai i Burahima ri Melekisede sampotila sampuyu ungka ri waʼa aga-aga anu napamuru iwali pai nakeni mpewalili muni.
21Nepa natoʼo i mokole Sodomo ri Burahima, “Timamo pura-pura waʼa aga-aga anu ndapamuru setu, podoia mabuya rayamu mampapewalili pura-pura tauku.”
22Paikanya mesono i Burahima natoʼo, “Montandokoro yaku ri suara i mPue, Pue Ala Anu Ndate ri Peawanya, anu mampapewali yangi pai lino, 23yaku bareʼe da mantima bara nunjaa-njaa aga-agamu, mau podo santompo gapasi bara santompo wayaa ntalupa ntano bareʼe da kutima. Maka ane ewanceʼe bareʼe da nukoto mangantoʼo, ‘Yaku anu mampakakoreʼe i Burahima.’ 24Yaku bareʼe kupokono mantima bara nunjaa-njaa tilaku. Anu kupokono mantarima inceʼemo waʼa anu roomo napake waʼa ntauku. Paikanya waʼa yunuku i Aneri, i Esikoli pai Mamire, mbolimo natima ntau seʼe tilanya.
Attualmente Selezionati:
PALABURU 14: LAIPMF
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
