Luk 4

Nim agara Jisɔs

Matiyu 4.1-11; Mak 1.12-14

1Jisɔs afɛngɛ njim na Jɔdan, Mbara Ɛtugi aror wɛ, atu wɛ arir na ɛkpelele, 2na mfom yi nim agarɔ wɛ na mfo atil abal, na afo afɔ fɛb jisɔk alilam, na nklusi njal ayamɛ.

3Nim abong atɔgɛ, “Ɛlɔ jɔlarɛ wɔ Mɔn Ɔsɔwɔ, yɔ tɔg lital lifa ɛyanga ngba brɛd.#4.3 ɛjom lili”

4Jisɔs afanga, “Agba yɛlɛ na nwɛr yi Ɔsɔwɔ arɛ nɛ anim kpena na brɛd nanting.”

5Nim akpɛ wɛ tab aji na nyura mfom atebɛ ɛjiba ɔtol ji ɛyeng na ngara yifɔ. 6Nim abong atɔgɛ, “Na karɛ ɛkɔ fɛb na afang fɛb ateb agba dabɔ fɛb akam, mɛ mal nkarɛ nɛ yɔ akɔrɔ nɔ mam. 7Yifa kpakpa ɛla jɔl ɛkara, wɔ ɔlɔ kponi mam.”

8Jisɔs afanga arɛ, “Agba yɛlɛ na nwɛr yi Ɔsɔwɔ arɛ, ‘Kponi Tata Ɔsɔwɔ ɛba wɔ ɔfɛngɛ ɔrɔgɛ wɛ nanting a ntinga.’ ”

9Nim akpɛ wɛ tab aji na Jɛrusɛlɛm aji lemɛ akoma na nyura mfom yi Njo Ɔsɔwɔ abong atɔgɛ “Ɛlɔ jɔlare wɔ mɔn Ɔsɔwɔ yɔ, rɔ ɛla na nde na ji ɔyemɔ fa. 10Ateb agba yɛlɛ na nwɛr yi Ɔsɔwɔ, ‘Ɔsɔwɔ ala tom bateb ɔteb abɛ ababɛ wa, 11abɔ ala gbeba na abɔ ɔnim teg ɔrom ɔta ɔkag na lital.’ ”

12Jisɔs afanga wɛ, “Agba yɛlɛ na nwɛr Ɔsɔwɔ arɛ, ‘Ɔtɔb teg ɔgara Tata Ɔsɔwɔ ɛba.’ ”

13Na ji nim alɔ wɛ gara na mba ayiayi, atumɛ asa.

Jisɔs abɔm litom ɛlɛ na Galili

Matiyu 4.12-17; Mak 1.14-15

14Jisɔs afɛngɛ njim na Galili, ɛkɔ ji Mbara Ɛtugi ɛjɔl na nɛ. Ɔteb abangɛ wɛ ɛnyada na bijiba kpa kpa. 15Ateb anɛ na ɛkpasega kpakpa atigɛ.

Anɛ ba Nasarɛt atɛn Jisɔs

Matiyu 13.53-58; Mak 6.1-6

16Jisɔs ajil na Nasarɛt na mfom yi alɛlɔ wɛ, na ɔfo ɛrɛdɛkɛr ajil na ɛkpasega mɔng ligbɛna ɛlɛ, atum ayema akog nwɛr Ɔsɔwɔ. 17Atab nwɛr a nyɛna amir Isaya akarɛ aribi aji yɛn mfom yi ayɛlɔ,

18“Ɛtugi ji Tata ɛre na nama,

na ateb arɛ agba mam rang arɛ mɛ mbong ɛteng ɔteb nkarɛ akpak.

Agba mam tom arɛ mɛ ntɔg agbakɔbɔ arɛ Ɔsɔwɔ ala fungi abɔ adabɔ nem alaga amir ayɛn,

nyege anɛ ba ayɔbɔ na ɛgir.

19Mɛ ntebe liya li ɔnyangɛ bi Ɔsɔwɔ.”

20Jisɔs afud nwɛr akarɛ nɛ yɔ ayimɔ fɔ atore ajɔl. Amir anɛ kpakpa na ɛkpasega ajɔlɛ bri. 21“Ɛlɛl alom ya Ɔsɔwɔ agba leba.”

22Abɔ fɛb abonga ateng a nsɔl abangɛ wɛ ɛkpɔ abɔ ɛsi na ateng alom ya ajoga wɛ abɔ abib, “Fa mɔn a Josɛf arig ɛ?”

23Jisɔs abong atɔg abɔ, “Na ɛtete nyiyi ndɛ Wun ɔtɔb ɔmal ɔtobam ligan lifa, ‘Nɛ ɛte lem ɛla wɔ ɔnɔb, lem na ɛjiba ɛja mɔng wur ɛyogɔ ji wɔ ɔlemɔ na Kapanum.’ ”

24“Ɛtete ji mɛ ntɔga wa, nyɛn amir sang yɔ akpenɔ liloba na ɛjiba ɛjɛ. 25Mɛ ntɔga wa ndɛ agbem akal akuanɛ ajɔl na Isrɛl na ngara Ɛlayija. Naji alib adɛnɔ na na nya ɛra na ɛja nkore ɔgba ajɔjɔl na nde. 26Ɛjɔl Ɛlayija wɛ atomam atu nkala nkuanɛ awiawi, ndɛg nkala nkuanɛ na Sarafad na ɛjiba ji Sayidɔn. 27Ɛgbem anɛ ajɔjɔl na Isrɛl ba abɛlɔ abele na ngara nyɛn amir a Ɛlayisa, ɛjɔl wurang anɔbam ndɛg Naman yɔ arunɔ Siriya.”

28Anɛ kpakpa na njo ɔrɔ abɛl ɛyama litem na ji ayogɔ ɔtɔga bifa. 29Atum ayema akamɛ ayege na ɛjiba ji fɔ atabɛ aji na nkul ɛwɔng yi asilɔ na ɛjiba jifɔ, atole wɛ ɛsi arɛ arɔ wɛ na nde. 30Ajɛn aseng na ɛbɔngɛ anɛ asɔnga mba ɛyɛ.

Jisɔs ayege nɛnom wurang ɛbe Ɛtugi

Mak 1.21-28

31Fɔyɔ Jisɔs ajilɔ na Kapanum, ɛjiba ji ɛrenɔ na Galili. Na Ɔfo Ɛrɛdɛkɛr akuma anɛ nteba. 32Ɛkpɔl abɔ ɛsi na ngara yi ajɔl teb, ateb arɛ ajɔl bong na ɛkɔ.

33Na ɛkpasega ɛbɛl nɛnom wurang yɔ abɛlɔ ɛbe ɛtugi, akɔn na nyura lilom, 34“Ee! Bɛjom ji ɔsɛba na agira, Jisɔs yɔ Nasarɛt? Ɔbal wur ndungi ɛ? Mɛ nyiyi nɛ yɔ wɔ ɔrenɔ, wɔ ɔru naji Ɔsɔwɔ!”

35Jisɔs abong nkore nkore, “Bole nyɔ! Jogɛ na biji!” Ɛbe Ɛtugi ɛrɔ nɛnom ɔfɔ ɛtob na nde na libri abɔ ɛjɔl ɛlɛm wɛ ɛteram.

36Anɛ kpakpa ɛkpɔl abɔ ɛsi akuma mbonga atɔga atɛm, “Fa ba ligan nteba yifa? Na ɛkɔ na nsim yi abongɔ atɔg ɛbe Ɛtugi abɔ fɛb ajog!” 37Ɔteb abangɛ Jisɔs ɛnyada na bijiba ɛtob ɛsibi.

Jisɔs atore ɛgbem anɛ

Matiyu 8.4-17; Mak 1.29-34

38Jisɔs atum na ɛkpasega aji na ɛtɛk Sayimɔn. Nyɛn nkal a Sayimɔn ajɔl yam nkore ɛsi amil, abɔ atɔg Jisɔs arɛ anyangɛ wɛ. 39Ajil ayema alagɛ ɛgbenga ɛjɛ atob ɛgan ɛsi amil ɛda wɛ abɔ, fɔ tutu atum ayema arɔgɛ abɔ litom. 40Naji njol alɔ lim, kpakpa abal na anɛ ba ayam na nkpakankpak abal na abɔ aba karɛ Jisɔs, akɔ abɔ ayɛ akone abɔ na bisi alem abɔ anɔb. 41Abe atugi ajog na biji ɛgbem anɛ akɔna, “Wɔ mɔn Ɔsɔwɔ yɔ!” Jisɔs anyam abɔ #4.41 there is another name for ɛgrigri ɛanɔngam abɔ arɛ abong ntɔga ateb arɛ abɔ anyinyi arɛ wɛ arenɔ Krayis.

Jisɔs abong alom na ɛkpasega

Mak 1.35-39

42Naji ɔforanfo ɛlɔ kparɛ Jisɔs atum ɛjiba asa aji yema na nara mfom. Anɛ akuma wɛ nsɛba, naji ayɛnɔ wɛ anɔngam wɛ tum abɔ asa. 43Jisɔs abong atɔga abɔ, “Mɛ nteg mbong ɛteng ɔteb bi ɛjiba ɔtol Ɔsɔwɔ na bijiba bingɔ titi, ateb arɛ jifɔ ji Ɔsɔwɔ atomɔnɔ mam arɛ nem.” 44Ajɔl bong alom na ɛgrigri na kpakpa bijiba Judiya.

Attualmente Selezionati:

Luk 4: ABM

Evidenziazioni

Copia