Luk 15

Ligan li njɔra yi atanɔ

Matiyu 18.12-14

1Bafora taksi na balema abeɔfɛm abal agba arɛ ayog Jisɔs. 2Anɛ ba Farasi na bateba ajing akuma numi, “Nɛnom ɔfa akpera balema abeɔfɛm aliga nsɔl na abɔ.”

3Fɔyɔ Jisɔs atobɔ abɔ ligan lifa: 4“Arenɔ arɛ nɛ wurang fa akpe njɔra atil arɔn yɔ yirang atanɔ. Anim tum atil ani na liko na ɛni yi asalɔ na ɛmɛ aji sɛb yirang yi alɔ tan tɛtɛ ayɛnɛ? 5Alɔ yɛnɛ, litem ɛlɛ yɛbɛ atabɛ akone na ɛkpakpak. 6Akuri na ɛyɛba litem na ɛtɛk. Aji kog atɛm abɛ na anɛ ba nkɔn tɛk arɛ, ‘Litem ɛyɛbɛ wun nanama, mɛ ngba yɛn njɔra ɛma yi atanɔ.’ 7Ntɔga wun ndɛ ntakpa ɛyɛba litem ala jɔl na libo ateb naji nɛ wurang alɔ gbɔ ndɔn na abeɔfɛm aseng anɛ atil ani na liko na ani ba arenɔ ateng anɛ ba adɛg sɛb arɛ agbɔ ndɔn.

Ligan li ɛkpuga ji ɛtanɔ

8“Ɛlɔ jɔl arɛ nɛnkal akpe ɛkpuga woba yɔ ɛkpuga jirang ɛtanɔ. Wɛ anim nwɔlɛ ɛnwɔlɛ, afenge ɛtɛk kpakpa asɛb ɛnɔbnɔbɛ tɛtɛ ayɛnɛ? 9Alɔ yɛn akog atɛm na anɛ ba nkɔn tɛk ɛyɛ arɛ, ‘Litem ɛyɛbɛ wun nanama, mɛ ngba yɛn ɛkpuga ɛjama ji ɛtanɔ.’ 10Na mba yifɔ titi, ɛyɛba litem ɛla jɔl na bateb ɔteb Ɔsɔwɔ ateb naji nɛ wurang alɔ gbɔ ndɔn.”

Ligan li mɔn yɔ lom yɔ atanɔ

11Jisɔs asɔra ɛsi abonga arɛ, “Ɛbɛl nɛnom wurang yɔ abɛlɔ abɔn abalom abal. 12Mɔnsɛ abong atɔg ndɛ, ‘Tata, kam mbanga nsɔl ɛma.’ Wɛ abanga nsɔl akarɛ abɔ.

13“Ɛkaram mɔnsɛ yɔfɔ atab nsɔl kpakpa yi akpenɔ, atum lijɛn na ndabamba aji li ɛwo. 14Naji alɔ li akpuga ya fɔ fɛb, fɔyɔ nkore ɔgba abalɔ na ɛjiba jifɔ, nsɔl ɛkingɛ. 15Fɔyɔ akɔlɔ ɛlɛ aji karɛ nɛ wurang na ɛjiba jifɔ, yɔ ajɔl wɛ tom arɛ aji lɛ akog na ɛgbɛ ɛjɛ. 16Ajɔl sɛb arɛ ali nsɔl yi akog, titi nɛ san yɔ ajɔl wɛ karɛ ɛjom ajiaji.

17“Na nkulsi atore akun ɛlɛ, abong atɔg ɛlɛ, ‘Barɔgantom ba nsɔjama kpakpa akpe nsɔl yi aliga ɛsaga ɛrik mɛ nde fa njal alagam yol! 18Mɛ na fɛngɛ njim nji na ji nsɔjama nji tɔgɛ ndɛ, Tata, mɛ ngba lem abeɔfɛm mbangɛ libo nana. 19Mɛ nkpɛlam foma yɔ alam kog arɛ mɔn ɔwa kɔ mam mɔng barɔgantom aba wurang.’ 20Fɔyɔ atumɔ ayema afɛngɛ naji ndɛ.

“Naji akpenɔ re na ndabamba, nsɔjɛ ayɛnɛ ndɔn afele wɛ nanɛ; abɛna aji kɔn mɔn ɔwɛ akpera wɛ akugɛ nyɔ.

21“Mɔn abong atɔgɛ arɛ, ‘Tata, mɛ ngba lem abeɔfɛm mbangɛ libo nana. Mɛ mkpɛlam foma yɔ alam kog arɛ mɔn ɔwa.’

22“Ndɛ abong atɔg barɔgantom abɛ arɛ, ‘Baba kakab! Na ɛteng ɛleba wun ɔba yɔbɛ wɛ. Ɔkagɛ ɛbel na nyig ɔbɔ na akpagata na ata ayɛ. 23Ba na ntakpa nfɔng wun ɔyol. Ɛlem likag ɛrang. 24Ateb mɔn ɔma akpɔkpɔ batig are na likpen; wɛ atatan alitore ayɛnɛ.’ Abɔ akuma nranga.

25“Na ngara yi fɔ mɔnyɛn ɔwɛ yɔ kol ajɔl ngɔ na ɛgbɛ. Naji ajɛnɔ alagɛ ɛtɛk ayog bisɛ ɛkoba anɛ abina. 26Wɛ akog ndɔgalitom wurang abibɛ, ‘Bɛjom ji ɛgbɔga?’ 27Wɛ afanga, ‘Mɔnyɛn ɔwa agba ba,’ fɔyɔ nsɔja alɔ yol ntakpa nfɔng arɛ anɛ arang ateb arɛ afɛngɛ akuri na nsɛrɛ.

28“Mɔnyɛn ɔwɛ yɔ ɔkol arag litem atɛn nyɛla na ɛtɛk; nsɔjɛ ajog aba kuma wɛ ngɔrɛ. 29Wɛ afanga nsɔjɛ arɛ, ‘Bri! Na anya yafa fɛb nema litom nkarɛ wa mɔng njo nka tɛnamtɛn ajiaji ji ɔtomɔmam. Wɔ mam ɔkategam ɔkarɛ na mɔn a mbol arɛ mɛ nkɔ nrang na atɛm abama. 30Mɔn ɔwa yɔ fa yɔ alɔ li nsɔl ɛya na abakal asasa naji alɔ akuri na ɛtɛk ɔli yol ntakpa nfɔng ɔkarɛ!’

31“Nsɔjɛ abong atɔgɛ arɛ, Mɔn ɔma, wɔ ɔre fa na nama kpakpa ngara. ajiaji ji mɛ nkpenɔ ɛre ɛkara. 32Nɔngɛ wur ɛrang ɛfɛngɛ ɛyɛbɛ litem, ateb mɔnyɛn ɔwa akpɔkpɔ batig are na likpen; atatan ali tore ayɛnɛ.”

Attualmente Selezionati:

Luk 15: ABM

Evidenziazioni

Copia