Luc 20

Musuga uJesus agunyi uiruyisini?

(Matt 21.23-27; Marc 11.27-33)

1Bivunda bibavagulitsi bapagu na milonsi mimigaga na bivunda bisusu bamawenda ombu Jesus yilumbu yimosi ava amalonsila batu na ava amasamunina Musamu Uboti o Ndagu Nsambi. 2Bamamuwivula rie: Agunyi guidilili musuga uvaga mambu memama? Anyi amaguvega musuga egugu? Tutsinguli.

3Jesus amabagabusila rie: Menu wami nyuduwivula yivu. 4Nsingulianu anyi amasindiga Jean ubatisa? Nsambi vo batu?

5Tumba bamavosa joʼ beni na joʼ beni rie: Pa tuwagula rie: Nsambi amamusindiga otuwivula rie: Dibandu yi dusamamuvayila yitu? 6Pa tuwagula rie: Batu bamamusindiga, botsu botutinda mamanyi mu mbari bejabi yiri Jean amaba mubiyitsi.

7Kabogu bamawagula rie: Tugejabi omamusindiga. 8Jesus amabatsingula rie: Kabogu menu wami ngodutsingula agunyi nyidilili musuga uvaga mambu memama.

Nongu jifumu nungi na basalitsi bandi

(Matt 21.33-46; Marc 12.1-12)

9Mbana Jesus amabuayila batu nongu ejiji rie: Dibaala amavara nungi, amajisila ombu basalitsi mbana amawenda o ulinga; amayetsinga. 10Mu temu dutsonsugu amasindiga musalitsi ombu basalitsi beni uyebonga dikabu diandi. Bamadimba musalitsi na bamamugabusa miogu na miogu. 11Amamuesindiga musalitsi ususu; bamamudimba nomusienga na bamamugabusa miogu, na miogu. 12Kabogu amasindiga agumurieru na bamamunemisa mapura na bamamubinga. 13Fumu nungi amawivula rie: Yi nyuvaga? Nyusindiga muana ami udurondu, tanguji bomuyitsa. 14Tumba ava bamamulabilila bamavosa joʼ beni na joʼ beni rie: Labanu mubongitsi udisiala; tumubokianu yiri disiala diuba adietu. 15Bamamubinga na bamamuboka.

Mbana Jesus amawivula rie: Fumu nungi yi obavayila? 16Jandi oruga na oboka basalitsi beni na ovega nungi ombu basusu. Batu banogulu dionyi bamawaka rie: Tsatsabi, digorungula uba nana?

17Tumba Jesus amabagengila yisuisu novosa rie: Ka pindiyilianu Bisonu abimasonugu rie:

Dimanyi adimabuagu na barungitsi

divu tindi adiviolila ubueji.

18Uotsu oberuga va dimanyi dieni otsunguga na jandi o dimanyi dieni diubonduyila ogesumuga.

Bivu mu diambu dilepu

19Bivunda bibavagulitsi bapagu na milonsi mimigaga mbe baronda umusikiga tumba bamaduma batu; bamajaba yiri Jesus amabatsokila na nongu eni. 20Bamakela diweru diwelimina mbana bamatinda batu abamavaga nderi bavu batu baboti. Bamalega Jesus na posulu tsiandi yiri bogulu mambu mawelimina umufunda ombu yivunda yibulongu. 21Batu beni bamavosa nandi rie: Mulonsi, tuijabi yiri ama guivosi na ama guilonsi mavu mangensa. Tuijabi yiri gugegengili buneni bumutu nana mutu mutu etasili tumba guilonsi duganu aduvu na Nsambi ombu mutu uotsu. 22Letutsingulati, divu diwelimina yiri jetu tufuta dumandu ombu kaga?

23Jesus anojaba yiri diela besoyi amawaka rie: 24ndasianu dubongu. Yigolini yinyi na bisonu binyi bivu muna? Bamawaka rie: Kaga!

25Mbana amabatsingula rie: Kabogu veganu abi kaga ombu kaga na abi Nsambi ombu Nsambi.

26Bamakambulu na kabusulu tsiandi; basamarungula umuvega mbela na posulu tsiandi kabogu bamavola sui.

Bivu mu diambu didurambugu duabafu

(Matt 22.23-33; Marc 12.18-27)

27BaJuif bamosi abamaba baSadducee bamawenda ombu Jesus. (La jogu abevosi yiri abamafu bagorambuga.) 28Bamavosa nandi rie: Mulonsi, Moise amatusila diruma diedidi rie: Pa mutu amafu nosila mugatsi agusakabura na kala, muana nguji andi amuweli yiri baburili mutu agumafu baana. 29Vamaba yisambuali yibaana banguji. Agutega amawela na amafu tsiri ubura baana. 30Agumubeji amabialila mukuili, aguna anofu 31agumurieru amamubialila. Dimaba munongu mosi te na yisambuali yiotsu bamafu tsiri ubura baana. 32Mbana mugetu wandi amafu. 33Kabogu ava durambugu duabafu mugatsi nyi oba? Asamaba mugatsi uyisambuali yiotsu?

34Jesus amabagabusila rie: Batu batemu ejiji bewelisini 35tumba abavu bawelimina urambuga o dufu bagomuewelasana. 36Bavu nderi biansa, bagorungula ufu, baji baana baNsambi mu mbari bamarambuyila o dufu. 37Mbana mu diambu didurambugu duabafu ne Moise amadijabisa ava amasonina diambu diyivala. Vana mbura eni enengili Fumu rie: Nsambi Abraham na Nsambi Isaac na Nsambi Jacob. 38Ngensa Nsambi agaa Nsambi jiabafu tumba avu Nsambi jiabavu monyu mu mbari ombu gandi botsu bavu monyu.

39Milonsi mimigaga mimosi bamavosa nandi rie: Mulonsi, gutsiwagula buranga.

40Basamamueba na bukidi umuwivula bivu bisusu.

Jesus na David

(Matt 22.41-46; Marc 12.35-37)

41Jesus amabawivula rie: Dibandu yi bevosili yiri Christ aji mutegula uDavid. 42David jaʼ beni evosi mu dibuku dinyimbu rie:

Fumu amavosa na Fumu ami rie:

Ndeʼ tsana va mabaala mami

43te na nyusunsa batu abeguvini

o tsi durumu duagu.

44Kabogu David amamunengila Fumu. Tsie Christ orungulila uba mutegula andi?

Malubu mu diambu dimilonsi mimigaga

(Matt 23.1-36; Marc 12.38-40)

45Batu botsu bamaba vana ava Jesus amavosila na badukitsi bandi rie: 46Lubuganu mu diambu dimilonsi mimigaga abelingi na bilinga bisakama uyenavegu mambolu mu migungi. Berondi bitsiga bibatu baneni o Mandagu maBibenguna nesi o milambu. 47Ne bediongi bakuili, adina digebakambisi usambila tsambu tsiogu tsisakama. Ka muna mukilu gu bokilusu!

Attualmente Selezionati:

Luc 20: PUU1992

Evidenziazioni

Copia