yuwana 6

asa 6

ḏia liji lun liro alɩb ṯoḏɩne

mṯ. 14:13-21, mks. 6:30-44, lk. 9:10-17

1gwune na ŋuɽun ŋeno ete, na yecu muri gi ḏɩrawe elo ḏeḏi jalil ḏun ḏan ṯabariya. 2na liji lutu gwujane gi gwune aŋəḏɩlo ŋuɽuna ŋun ŋɩbuḏo ŋun ŋapulo lagin lun leḏeḏo nanu. 3na yecu abo gi lɩrgwom elo, nalijiga calɩmis je juŋun. 4na gɩmuri ge ḏouwɩrico geḏi liju je gɩṯo. 5gwune na yecu dadɩŋa ga nuaŋu liji lutu lɩmeleḏa lugwun, nuuməḏɩjo bilibusŋ, nueicɩno, ileḏɩla ŋɩdio ŋe ḏiṯa negwegwe ŋal liji leno e? 6nuuməḏɩjo dino nuarno gwuŋiḏeije gi gwune ŋu gwɩlɩŋiḏi gwar gwarra. 7na bilibus wɩrlijo ŋuɽuna nueicɩno, gia geḏi jɩnei ḏuɽi dɩttən gate gadaḏaṯe gilʼe wei gɩtigɩti no. 8na gwete gweḏi calɩmis juŋun, gwun gwan anḏarawus, gwun gwiro megin gweḏi simian buṯrus eicɩno, 9ŋaɽe ŋo ŋɩne ŋiti ŋun ŋəṯi gia ṯoḏɩne na ŋwumi ŋwɩttən, namɩni ludaro lo ŋɩne lal liji e lun lutu dino? 10na yecu eicɩno, uməḏɩjil liji aljiga. na garom gijo gutu kalo keno. na liji jiga laro alɩb ṯoḏɩne ca. 11na yecu ape gia; nueico eloŋu sukran, nugegɩnyəḏɩjo liji ganu lun lijoga; nulḏəḏə ŋwumi dino nalʼe ŋun ŋɩbunyɩlo. 12gwune nalpe, nuuməḏɩjo calɩmis juŋun, nuleicɩno, wəɽeicɩl ŋɩdio ldu ŋun ŋiṯɩlɩne ganu nyaŋiwɩriḏo galo no. 13nalɩwəɽeice ldu nalenyeji jɩḏi di na gwuttən kia gun gɩṯanu giro ṯoḏɩne gun giṯɩne ganu. 14na gwune na liji leno aŋu ŋuɽuna ŋun ŋəwei ŋun ŋapɩlo yecu, nalarno, gwerkwe ganu, gwiji kweno gwiro nebi gwun gwumila kɩḏilio.

yecu gwumədu gwetɩdo, nuwele ŋwara ŋwe ŋau elo

mṯ. 14:22-27, mks. 6:45-52

15na gwune na yecu lɩŋe lar lila gwalməṯo gwalduji gwele, nuabo gi lɩrgwom elo mɩna gwetɩdo. 16na gwune na galo ro garage na calɩmis juŋun gwuli gi ḏɩrawe. 17na gwune naləḏi kwu murkab ganu, nalmuri gi ḏɩrawe najɩweləḏi kabranaum, na galo rimi ganu na yecu gwore gwate gwumila lagin no; 18na ŋau upi gworo gi gwune ḏɩron ḏutu. 19gwune nalwele mil ṯəɽɩl i kwoɽo nalaŋu yecuŋ nuwila ŋwara ŋwe gi ḏɩrawe elo, nuwila gɩṯo kwu murkab; naldonye. 20nuleicɩno, nyi gwiro; nyaḏonyɩḏa no. 21nalar gwaləḏɩjo kwu murkab ganu, na cou na murkab nuṯɩmi ga kwɩnyəm gwun gwuweləḏine.

liji liɽoṯeḏo ŋuɽuna ŋun ŋɩbuḏo

22na giləganu na liji lun lutu lun lɩḏuḏɩnu kɩmerɩmer elo giro kaja ge ḏɩrawe nalaŋu murkab gwijoga gwetɩdo gwiro kaja kuwei, na yecu gwate gweḏɩlo calɩmis je juŋun kwu murkab ganu no, namɩni calɩmis juŋun jiwiḏi kaja gagin. 23namɩni lɩmurkab wila leḏi ṯabariya nalobene kalo gun giṯɩne gia gwune na gwele gwun gwan yecu eico eloŋu sukran. 24gwune na liji aŋu yecuŋ gwate gwo ŋɩnəwei i calɩmis juŋun no, naləḏi gi lɩmurkab nalwila kabranaum nalbunyi yecuŋ.

gia ge ḏimiḏa

25gwune nalbuje kɩmerɩmer giro kaja ge ḏɩrawe naleicɩno, mualɩm gwəri, ŋa gwuwiḏi ŋɩne jaḏo? 26nal yecu wɩrlijo ŋuɽuna, nuleicɩno, gwerkwe, gwerkwe ganu, nyi gweiceijɩno, nyalbunyiŋi gi gwune nanyaʼe gia nanyape, namɩni ŋate ŋiro gi gwune nanyaŋu dəŋinio no. 27aṯanyapaḏa ŋɩru ŋɩdi ŋe ḏiṯa ŋun ŋaṯɩḏigɩɽe no, nyamɩni ape ŋɩru ŋɩdi ŋun ŋajaḏaṯa gi ḏɩmiḏa gi gɩḏilio, ŋun ŋajɩl ŋaɽe ŋeḏi liji ḏəḏə; gi gwune kwe gwiro gwun gwugelɩne elo gwun gwiro baba mumɩɽenyə kaṯɩm guŋun. 28naleicɩno, ŋuɽun ŋɩrṯa ŋiro ŋanalape kani anape ŋɩru ŋeḏi elo? 29nal yecu wɩrlijo gupɩna nuleicmo, gɩru geḏi elo ŋiro ŋeno, gwanyəmɩnyi gwun gwuwəju. 30naleicɩno, ŋa gwaṯape ŋuɽuna ŋɩrṯa ŋun ŋɩbuḏo kani analaŋu aŋaləmɩnyi? ŋuɽun ŋɩrṯa ŋiro ŋaṯalape? 31lɩgwurninyo ləri liṯi gia gun gan manna kiḏɩwer, gi gwune ŋulinu, nalarno, lɩḏəḏulo gia kanyin nalʼe.

32nal yecu eicɩno, gwerkwe, gwerkwe ganu, nyi gweiceijɩno, musa gwate gwiḏəḏeje gia kanyin no; namɩni baba gwi gwaṯajiḏəḏə gia gun giro gwerkwe kanyin. 33gi gwune gia geḏi elo giro gwun gwugwulu kanyin nuḏəḏə gɩḏilio ḏɩmiḏa. 34naleicɩno, gwele gwəri, aṯijiḏəḏə gia keno bubruṯ. 35nal yecu eicɩno, nyi gwiro gia ge ḏɩmiḏa; gwun gwila lugwi gwate gwa jaŋu e no, na gwun gwiəmɩnyi gwate gwan ouḏo e minu no. 36namɩni nyi gweiceijɩno, nyaŋa laŋəḏinyi, nanyamɩni ate nanyəmɩnyi no. 37wei lun linyil baba ḏəḏə laje lila lugwi, na gwun gwila lugwi gwate gwideije kɩluḏo no, 38gi gwune gwuli kanyin nyi gwate gwar gwarre ŋuɽuna ŋun ŋɩbunyilnyi no, namɩni ŋun ŋɩbunyulo gwun gwuwəjɩŋi. 39na ŋuɽun ŋeno ŋiro ŋun ŋɩbunyulo gwun gwuwəjɩŋi kani wei lun lɩḏəḏɩnyilo ate inɩḏuḏe ganu gwədi no, namɩni lildiɽi gi lamon leḏi gɩdo. 40gi gwune ŋuɽun ŋeno ŋiro ŋun ŋɩbunyɩlo baba gwi, kani wei lun laŋu ŋaɽe ŋalɩŋiəmɩnyi ləṯi ḏɩmiḏa gi gɩḏilio, na nyi lildiɽi gi lamon leḏi gɩdo.

41na liju uməḏɩni ŋuɽun ŋutu lugwun gi gwune gwarno, nyi gwiro gia gun gwugwulu kanyin. 42nalarno, kweno gwədu gwiro gwun gwan yecu, ŋaɽe ŋeḏi yusib, gwun gwilɩŋiḏanagwe babaŋ gwuŋun na nana gwuŋun na? namɩni galakwe nuarno, nyi gwugwulu kanyin? 43nal yecu wɩrlijo ŋuɽuna nuleicɩno, aṯanyuməḏɩno nyaŋa ŋɩmaga no. 44gwiji gwate gwəṯi ŋɩma gwila lugwi no ḏa baba gwun gwuwəjɩŋi gwate gwimugwuloḏa no; na nyi gwiḏiɽi gi lamon leḏi gɩdo. 45ŋulinu kɩḏam geḏi nebɩŋa, na luŋa wei lalɩmini ḏi elo. na luŋa wei lun lɩḏiŋɩnu babaŋ nulalɩmi lila lugwi. 46namɩni gwiji gwatɩn gwetɩdo gwun manaŋu babaŋ no, namɩni ŋu gwun gwugwulu ḏi elo gwiro gwun gwaŋəḏi babaŋ. 47gwerkwe, gwerkwe ganu, nyi gweiceijɩno, gwun gwiəmɩnyi gwəṯi ḏɩmiḏa gi gɩḏilio.

48nyi gwiro gia ge ḏɩmiḏa. 49lɩgwurninyo lalo liṯi gia gun gan manna kiḏɩwer nalai. 50gia keno giro gun gugwulu kanyin kani ḏa gima gwiji e gwate gwai no. 51nyi gwiro gia gun gɩmiḏo gun gugwulu kanyin. ḏa gwiji gwete maʼe gia keno gwəmɩḏe gi gɩḏilio; na gia gun giḏəḏə giro aŋɩnu yinyi yun yiḏəḏi yan ḏɩmiḏa ḏeḏi liji leḏi gɩḏilio.

52na liju je gi ḏɩbereḏa laginŋu nalarno, galakwe ŋiji gwiji kweno ḏəḏə aŋɩna yuŋun ilʼe? 53nal yecu eicɩno, gwerkwe, gwerkwe ganu, nyi gweiceijɩno, ḏa nya late limaʼe aŋɩna yeḏi ŋaɽe ŋeḏi liji nanyalmeyu ŋuwəno ŋuŋun no, nya late ləṯi ḏɩmiḏa gi lulo lalo no. 54ŋu gwun gwaʼe aŋɩna yinyi nuyu ŋuwəno ŋinyi gwəṯi ḏɩmiḏa gi gɩḏilio, na nyi gwidiɽi gi lamon leḏi gɩdo. 55gi gwune aŋɩnu yinyi yiro gia gwerkwe, na ŋuwən ŋinyi ŋiro ḏiyo gwerkwe. 56gwun gwaṯaʼe aŋɩna yinyi naṯuyu ŋuwəno ŋinyi gwajaḏaṯa lugwi na nyi gwaje lugwun. 57gi gwune wəjɩŋi baba gwun gwumiḏo na nyi gwəmɩḏe baba gwe, ŋiro dino ŋu gwun gwinyiʼe gwəmɩḏe nyi gwe dino. 58gia keno giro gun gugwulu kanyin, gate giro gi gwun giṯi lɩgwurninyo lalo gia gwerre nalai no; ŋu gwun gwaʼe gia keno gwəmɩḏe gi gɩḏilio. 59nuumə ŋuɽuna ŋeno kaja kono nualɩmi liji kwu dunu gweḏi elo gwun gwijo kabranaum.

calɩmis jɩrebɩna ḏɩməṯo ḏe

60na calɩmis juŋun jutu na ḏa jimadiŋɩni dino nalarno, ŋuɽun ŋeno ŋɩbɩɽe, əḏi gwəṯi ŋɩma gwadiŋɩni? 61na yecu lɩŋe kwulo gwuŋun calɩmis juŋun jo juməḏɩnu ganu ŋuɽun ŋeno, nuleicɩno, ŋeno ŋajobɩlkejo a? 62nyalarre galakwe ḏa nyalmaje nyalmaŋu ŋaɽe ŋeḏi liji gi ḏabuḏa kalo gun gijune gwerre? 63gwuɽɩwə gwiro gwun gwəmɩḏi, namɩni jiŋɩno jiro jai; ŋuɽuna ŋun ŋuməḏɩjajiŋe ŋiro gwuɽɩwə na ḏɩmiḏa. 64namɩni kworo lagalo late ləmɩnyu no. gi gwune yecu uro gwerre lilɩŋiḏulo kworo lun late ləmɩnyu no, na əḏi gwiro gwun gwiḏəḏo liji. 65nuarno, ŋuɽun ŋeno nyi gweiceiɽmo, gwɩji ŋwaṯe gwəṯi ŋima gweləḏa lugwi, ḏa gwate ma baba ḏəḏə ŋɩma no.

66na dino uro kaja kono na calɩmis juŋun jutu nalaɽuwaḏa gɩdo nate naləmɩnyi gwalele no.

buṯrus gwiteijo ga yecu gwiro kɩrisṯo

67na yecu uməḏɩjo calɩmis jun jiro di na gwuttən, nuleicɩno, nyaŋa ləmɩnyu dino nyalawele a? 68na simian buṯrus wɩrlijo ŋuɽuna nueicɩno, gwele gwi, anaŋa lar lele ḏəḏi? ŋa gwəṯi ŋuɽuna ŋe ḏɩmiḏa gi gɩḏilio; 69nanəmɩnyi nanalɩŋe muma ŋa gwiro gwun gwɩpiḏo pɽul gweḏi elo. 70nal yecu eicɩno, nyi gwate gwuməṯeije nyaŋa lun liro di na gwuttən, na gwo gwete lagalo gwiro ḏiŋerom na? 71gwuməḏəṯi ḏi yauḏa gwun gwiro ŋaɽe ŋeḏi simian iskariyuṯi; na ŋu twiro gwete gweḏi lun liro di na gwuttən, namɩni gwar gwuliḏəḏə.

Attualmente Selezionati:

yuwana 6: OTR1966

Evidenziazioni

Copia