yuwana 12

asa 12

mariam gweḏi beṯiniya gwuwɩrṯi yecuŋ ŋwara ŋila ŋe

mṯ. 26:6-13, mks. 14:3-9

1na gwerre gɩmuri ge ḏouwɩrico gate gɩmete no ŋwamon nyəɽɩl, na yecu wila beṯiniya kalo gun gijɩn liasar gwun gwudiɽu gi ḏaiya. 2nalgico ŋɩnəwei ŋɩdio ŋe ḏiṯa garage, na marṯa gwijo gi ḏapa ŋɩru ŋe ḏiṯa, namɩni liasar gwiro gwete lagin gwun gwiṯɩlle. 3na mariam ape ŋila ŋun ŋiro ŋɩḏini, ŋəṯi rotl gwetɩdo ŋutu jilɩnya, nuwɩrṯi ŋwara ŋweḏi yecu ki numuje ŋwara əɽu ye yuŋun, na dunu enyeḏe ŋɩḏini ŋe ŋun ŋiro ŋila ŋun ŋəmɩ. 4na gwete gweḏi calɩmis gwun gwan yauḏa iskariyuṯi, gwun gwar gwuliḏəḏə alɽinye, arno, 5gwudaro gəko na ŋila ŋeno ŋate ŋiḏɩlini jɩnei di nulḏəḏə liji lun late ləṯi ŋɩdio no? 6nuar dino, gwədu gi gwune gwəmɩnyu liji lun late ləṯi ŋɩdio no, namɩni gi gwune gwiro gwuɽam na gwaṯɩḏɩme gwurəḏo geḏi əlgɩrucu naṯunəbɩri gworo nanu. 7na yecu arno, ouwɩricil; gwuldɩme kəbe lamon leḏi ḏikwurno ḏinyi; 8gi gwune nyalaṯɩje liji le lun late ləṯi ŋɩdio no ŋwamon wei, namɩni nyi ilate laṯɩje ŋwamon wei no.

9na liju lutu lilɩŋiḏi ŋu gwo ŋɩnəwei, nalwila namɩni late lɩweləḏi ḏi yecu kuwei no, namɩni lar laŋəḏa liasarŋ dino gwun gwədiɽiŋu gi ḏaiya. 10na jɩsis jun jɩbuḏo naluməḏəṯe nalarno, laɽinye liasarŋ dino, 11gi gwune gwan ŋu lutu lun liro liju laṯɩlwele naləmɩnyi yecuŋ.

ḏobena ḏeḏi yecu urucəlim ḏiḏamɩḏa ḏe

mṯ. 21:1-11, mks. 11:1-11, lk. 19:28-40

12na giləganu na liji diŋɩni lutu lun lɩweləḏi kɩmuri yecu gwo gwuwiḏi urucəlim, 13nalapa ḏɩrna deḏi ṯamɩr naltu gwalobeḏe. na luŋa naṯɩləri gwula,

ḏɩkədəḏɩnə ga,

ḏɩbuḏia ḏaje kwele gweḏi isreiyil

gwun gwuwiḏi jiri je jeḏi gwele gwun gwiro elo.

14na yecu buje ŋəɽigə ŋun ŋoga nunabo elo gi gwune ŋulinu,

15ŋaḏonyɩḏa ŋaɽe ŋun ŋiro gwa ŋeḏi amɩrɩgen yun yan

siʼun no,

eʼe gwelɩnya gwuŋa gwo gwuwiḏi gwijiga ŋəɽigo elo ŋun

ŋoga.

16na ŋuɽun ŋeno ŋate ŋilɩŋiḏɩlo calɩmis juŋun gwerre no, namɩni gwune na yecu əḏi gi ḏoɽeḏa ḏuŋun nalaḏɩŋane ŋuɽuna ŋeno ŋulinu ŋan ŋu na lɩgelijulo ŋɩdio ŋeno. 17na liji lun lutu lun lijille naṯɩlteije ga nalarno ŋu gworniḏo liasarŋ kil nuḏiɽio gi ḏaiya. 18na ŋuɽun ŋeno na liji tu gwalobeḏe gi gwune nalḏiŋɩni gwapo ŋuɽuna ŋeno ŋun ŋɩbuḏo. 19na lɩbarɩsi uməḏəṯe laginŋu, nalarno, nyalaŋu nya late landuji gwaŋ gwədi no. eʼe gɩḏilio wei malgwujane.

ḏiɽoṯeḏa ḏeḏi ligrigi

20na kworo lun lɩmabo gi ḏorṯeḏa kɩmuri liro ligrigi. 21na leno nalwila ḏi bilibus gweḏi beṯsaida kamɩrɩgen yun yan jalil, nalɽoṯəḏɩjo naleicɩno, gwele gwəri, anbunyu andɩrnaŋu yecuŋ. 22na bilibus wila nuuməḏɩjo anḏarawusŋ; na anḏarawusŋa bilibus gwe nalwila ḏi yecu naluməḏɩjo. 23nalmɩni yecu wɩlijo ŋuɽuna nuleicɩno, sa jɩmila jun jaji ŋaɽe ŋeḏi liji buḏɩni. 24gwerkwe, gwerkwe ganu, nyi gweiceijɩno, ḏa lon late lɩmideḏe ga kwɩnyəm ki lɩmai no, numɩni nujiga letido; namɩni ḏa lɩmai lalɩŋeḏa nyaɽe nyutu. 25gwun gwəmɩnyu ḏɩmiḏa ḏuŋun ḏuḏuji, namɩni gwun gwadonye ḏɩmiḏa ḏuŋun kɩḏilio keno ḏudɩme gi ḏɩmiḏa gi gɩḏilio. 26ḏa gwiji gwate minyinəpijo ŋɩri ouwɩricil ŋigwujane, na galo gun ginɩje na ŋinəwei gaḏam ginyi gaje dino. ḏa gwete minyinəpijo ŋɩru, gwa baba gwinyi nəji. 27na gwunnɩno ḏugwor ḏinyi ḏo ḏouwci ganu na nyi gwar gwarau? baba, əbɩriŋi gi sa ceno. namɩni gwan ŋuɽun ŋeno niwila gi sa ceno. 28baba, buḏi jiri juŋa. na ŋwal gwulo kanyin, nalarno, jimilbuḏi na jaje jilbuḏi mina. 29na liji lun lutu lun lɩḏuḏɩnu ga naldiŋɩni nalamo gau giro gipinu ganu; na liro kaja arno, gwiji gweḏi kanyin gwiro gwun gwuməḏɩju. 30nal yecu wɩrlijo ŋuɽuna nuleicɩno, ŋuɽun ŋate ŋan nyi gəko na ŋwal gwulo no, namɩni ŋan nyaŋa. 31gwunnɩno ḏakɩmiḏa ḏo ḏeḏi gɩḏilio keno; na gwunnɩno gwele gweḏi gɩḏilio keno gwirəḏɩni kɩluḏo. 32na nyi, na ḏa nyi mabuḏɩni elo ŋɩne kwmyəm na nyi gwogwuloḏa liji lugwi wei. 33ŋu gwar dino kani ŋuaŋiḏi ḏaiya ḏuŋun ḏar ḏaro galakwe. 34na liji wɩrlijo ŋuɽuna naleicɩno, andiŋɩnu ŋuɽuna ŋun ŋigelijɩlo elo musaŋ ŋarno, kɩrisṯo gwajaḏaṯa gi gɩḏilio, namɩni galakwe na ŋarŋano, ŋaɽe ŋeḏi liji ŋaje ŋabuḏɩni elo? əḏi gwiro ŋaɽe ŋeḏi liji? 35nal yecu uməḏɩjo nuleicɩno, bure gwore gwijo lagalo ŋwamon ŋwouwɩrio, aṯanyawele gwune na bure je lagalo kani ate ŋwajɩn girɩm darane no; na gwun gwawele kirɩm gwate gwilɩŋiḏi gwuweləḏi ne no. 36gi gwune nya ləṯi bure, əmɩnyil bure gwe, kani nyaro nyaɽe nyeḏi bure.

na yecu umə ŋuɽuna ŋeno ki nuwele nulɩbe.

ḏiməṯo ḏate yauḏia, namɩni calɩmis kworo jimaməṯi ŋuɽuna nyɩkwom

37naṯuape ŋuɽuna ŋutu ŋun ŋɩbuḏo gi jei ganu jagin nalmɩni ate nalgwəmɩnyi no, 38kani a ŋuɽun ṯɩmi ŋeḏi nebi gwun gwan isaia, ŋun ŋaruŋe no,

gwele gwun gwiro elo, əḏi gwiro gwiməmɩnyi ŋuɽuna ŋəri?

na ḏi ḏeḏi gwele gwun gwiro elo ḏɩmaŋini ḏi əḏi?

39ŋuɽun ŋeno late ləṯi ŋɩma ləmɩnyi no gi gwune isaia gwuməḏi mɩna,

40ŋu gwərimi jei ganu jagin, na gwabɩɽi dugwor dagin nanu

kani ate aldaŋaga jei je no, nalɩŋe gi dugwor ganu dagin,

nalaɽuwe na lilgele muma.

41na isaia umə ŋuɽuna ŋeno gi gwune nuaŋu ḏoɽeḏa ḏuŋun nuumə ŋu gwe. 42namɩni ŋadaṯi ŋeno nalgwəmɩnyi lutu lun liro lele namɩni gwan ŋuɽun ŋeḏi lɩbarɩsi nate naṯɩlgwiteije ga no, naṯɩldonye gi ləḏiḏio kwu dunu gweḏi elo; 43gi gwune ləmɩnyeno ḏɩbuḏia dedi liji gi ḏɩbuḏia ḏeḏi elo.

ŋuɽun ŋun ŋaŋijo liji ḏalɩmia gworo gweḏi yecu

44na yecu əri gwula nuleicɩno, gwun gwinyiəmɩnyi gwate gwinyiəmɩnyi no namɩni gwuəmɩnyi gwun gwuwəjɩŋi; 45na gwun gwinyiaŋu gwuaŋu gwun gwuwəjɩŋi. 46nyi gwiro bure gwuwiḏi kɩḏilio, kani gwun gwinyiəmɩnyi gwate gwajaḏaṯa kirɩm no. 47na ḏa gwete madiŋɩni ŋuɽuna ŋinyi na ŋate ŋɩmuldɩme no, nyi gwate gwiakɩmi no; gi gwune nyi gwate gweləḏi gi ḏakɩmia gɩḏilio no, namɩni nyi gwuwiḏi gwəkədə liji ga leḏi gɩḏilio. 48gwun gwinyidonye nate numəṯo ŋuɽuna ŋinyi no, gwəṯi gwete gwun gwuakɩmi. ŋuɽun ŋun ŋuməḏɩjilo ŋiro ŋar ŋakɩmi gi lamon leḏi gɩdo; 49gi gwune ŋate ŋaṯilumə ŋele ŋe ŋinyi no, namɩni baba gwun gwuwəjɩŋi, ŋu gwiro gwiḏəḏɩnyi ŋuɽuna ŋɩrṯa ŋiro ŋar ŋiŋare na ŋɩrṯa ŋiro ŋar ŋiŋumə. 50na nyi gwilɩŋiḏi ŋuɽuna ŋuŋun ŋun ŋiḏəḏɩnyilo ŋiro ḏɩmiḏa gi gɩḏilio. na ŋiro dino ŋuɽun ŋun ŋaṯilumə, ŋaṯilumə gi gwune uməḏɩjiŋine baba.

Attualmente Selezionati:

yuwana 12: OTR1966

Evidenziazioni

Copia