Margus 5
5
Ŋwugeta kwijo gwa Jiriasi momaŋ gwina gwuthi ŋurinya
1Alobani kimumu giter ga baẖr gi len la Jiriasiyiin. 2A dina muŋw tu gi felluuka ganu, an kwiji gweta eladha ganu, algwibudhe gwina gwidhi kalo ga nyimu gwina gwuthi ŋurinya. 3Gwathije kalo ga nyimu nyina nyathin gwurce lijo; a kwiji gwate gweda gwina gwuthi ŋoma duŋwguke jijir jai no. 4Dilaŋ gwathilguke ŋwamun ŋwoinyadho ŋwuruŋw ŋwai a jijir jai, athuŋwbi kiye ŋwuruŋw a jijir; athi kwiji gweda uthi ŋoma duŋw ireje no. 5Gwathije ŋwamun peth kamarigen a kalo ga nyimu, athuŋw ure gwula gigilo a ninaŋin, athuŋw dhirithini aŋina nono yuŋun nyol nyai. 6A dina muŋw aŋa Yasuuⓐuŋw romine, ŋwortai, ŋwide ŋwurko ŋwai, ŋworthadha. 7Ŋwure gwula gwuleny, ŋwarnu, Yasuuⓐ gwai, gwina gwiro Ŋari ŋa Kalo gina ginaŋ, au gwibopaijiny aŋa? Nyi gwothaijaŋa galo jiriny jai ja Kalo, nyari ŋa gwati gwinyure ŋina no. 8Ŋwabiŋaijo, ŋwaici, Tui kwiji ganu, ŋuriny ŋai. 9Ŋwothaije galo, ŋwaici, Ŋa gwan ei? Ŋwubabiŋaijo, ŋwaicinu, Jiriny jiny jan Nyoinyadho; anaŋa lo loinyadho. 10Ŋwothaije galo gwuleny dathuŋwul ukejo gi len liter no. 11A judhur joinyadho jijo ŋwen nono jithi galo. 12A nyuriny peth othaije galo, alaici, Ukejije gi judhur, ananuni ganu. 13Al Yasuuⓐ uminyejo; a nyuriny tu, aluni gi judhur ganu; a judhur abire gwuleny, aldhidhireje len nono, alule ŋau ganu, aldhirudhe, alai. (Judhur jijo jar alfen.) 14A lina lathie judhura abire, alabiŋaijo lijo la len ibile a la ŋwen ŋwiter ko dhuŋun dhai ibidhe. Altuya dilaŋa dhuŋuna dhina dhijo mine. 15Alela di Yasuuⓐ, alaŋa kwijo gwilaŋ gwuthi ŋurinya, ŋwujalo, gwigeno ciraŋa, ŋwaudhaijiye galo, aldhenya. 16Al liji abiŋaijo lina laŋadhi dhuŋuna ibidhe dhina dhimaje di kwiji gwilaŋ gwuthi ŋurinya, a dha judhur. 17Alothaije Yasuuⓐuŋw galo alari gwela, athuŋw jalo gi len legen no. 18A dina muŋwuni gi felluuka ganu, a kwiji gwilaŋ gwuthi ŋurinya othaije galo ŋwari gwalgwai gwudhie. 19Athibi Yasuuⓐ abrico no, ŋwabiŋaijo, ŋwaici, Idhi dagalo gi liji luŋa, ŋalabiŋaijo dhuŋuna dha ŋiro ŋinaŋ ŋina ŋupijaŋalo Kweleny, a ŋina. 20Ŋwela, athuŋw abiŋaijo lijo gi len lan Al ⓐashar al Mudun dhuŋuna dha ŋiro ŋina ŋinaŋ ŋina ŋupijilo Yasuuⓐ; a liji peth ali galo dir.
Dire gwa ŋera ŋa Yaayirus dai, a iŋir nono gwa kwa gwina gwathruthi
21A dina ma Yasuuⓐ mure kimumu giter manaŋ felluuka gwai a liji ela dugun loinyadho; ŋwuje kimuma nono. 22A kwiji gweta ela dugun gwina gwiro kweleny gweta gwa majmaⓐ, gwina gwan Yaayirus, a dina muŋw aŋa, ŋwide ŋwora ganu ŋwuŋun. 23Ŋwothaije galo gwuleny, ŋwaici, Ŋera ŋiny ŋina ŋitiny ŋa ŋar ŋai; nyi gwara ŋa gwila ŋan geta doi alaŋ, duŋwure nono; ŋwumidhe. 24Algwibela; al liji gwuje loinyadho, alurejo Yasuuⓐuŋw galo keligeny.
25A kwa gweta je gwina gwathurthi gwortal jidhileo die‐a‐ram. 26Gwibujo ŋwuredenya ŋwoinyadho gi luma loinyadho, a gwarush gwuŋun erna peth, athuŋwbi iŋirii nono no, ŋwubi umuni. 27A dina muŋw diŋini dhuŋuna dha Yasuuⓐ, ŋwela gi liji ganu lina lurejo Yasuuⓐuŋw galo, ŋwela gi dhuro ganu di Yasuuⓐ, ŋwumini kiraŋa guŋun. 28Gwabiŋinu, ŋwarnu, Ada nyi gwimamini ciraŋa juŋun, nyi gwaji gwure nono. 29An ŋin ernadhadha ganu babraŋ; ŋwuliŋini kaŋinu ganu yuŋun darnu gwimiŋir nono gumiye ibige. 30An Yasuuⓐ liŋedhadha ganu darnu ŋoma ŋimutu dugun, ŋwurle galo liji ganu, ŋwulothaije galo, ŋwulaici, Eibi gwiminu ciraŋa jiny? 31A calmiz juŋun abiŋaijo, alaici, Au gwaŋadhi lijo loinyadho daŋalurejo galo, ŋa barnu, Eibi gwimininy? 32Athuŋwbi rilile gi liji ganu ŋwari gwaŋa kwijo gwina gwapo dhuŋuna ibidhe. 33Abi kwa dhenya, ŋwubigalo, ŋwuliŋa dhuŋuna dhina dhimaje kaŋinu yuŋun, ŋwudoga, ŋwide ŋwora ganu ŋwuŋun, ŋwabiŋaijo dhuŋuna peth dhina dhiro titiganu. 34Ŋwubaicinu, Ŋera ŋai, imaan gwuŋa gwimaŋa uriye nono. Idhi audhaijiye gwai galo, ŋiŋir nono gumiye guŋa.
35A dina abiŋaijuŋw, a liji coŋ ila gi dunu gwa kweleny gwa majmaⓐ, alaicinu, Ŋera ŋuŋa ŋimai; kworaŋ ŋabi ruje Muⓐallim taⓐbaan manaŋ? 36A dina ma Yasuuⓐ diŋini dhuŋuna dhina dhabiŋinu, ŋwabiŋaijo kwelenya gwa majmaⓐ, ŋwaici, Athaŋa dhenyo no, ŋa buminyi dogo. 37Athuŋw abrico kwijo gweda dilgwuje no, albela Buṯrus ŋalai, a Yaⓐguub, a Yuuẖanna gwina gwiro megen gwa Yaⓐguubŋa. 38Alela gi dunu gwa kweleny gwa majmaⓐ, ŋwaŋa lijo loinyadho dilagadhi galo, alare gwuleny. 39A muŋw uni kiru, ŋwulabiŋaijo, ŋwulaici, Kworaŋ nyabi lagadhe galo, nyare? Ŋera ŋati ŋaio no, abi ŋa ŋidhro. 40Albakejuma. A dina muŋwulteye peth por, ŋwodha babuŋw gwa ŋera a nana gwuŋun, a liji lina lijil lai, aluni kalo gina gidhirna ŋera. 41Ŋwumutha ŋera gi dhoi, ŋwaici, Ṯaliitha guumi; gwina gwuthi maⓐna gwiro minoŋ, Ŋera ŋai, nyi gwa gwabiŋaijaŋa, ŋaici, Diro. 42An ŋera diredha ganu, ŋwelila; ŋuthi jidhileo die‐a‐ram. Alali galo dir gwuleny. 43Ŋwulabiŋaijo gwoinyadho gwuleny ŋwari lati labiŋaijo lijo liter dhuŋuna ibidhe no; ŋwulbaicinu, Dhedhul ŋida ŋa dheny.
Attualmente Selezionati:
Margus 5: HBN
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
First published by the British and Foreign Bible Society in 1966.
