Matta 9

Iŋir nono gwa kwiji gwina gwaio aŋina nono

1Ŋwuni gi felluuka, ŋwumure, ŋwela gi len luŋun. 2A liji upijo kwijo gweta lagram lai gwina gwaio aŋina nono; a dina ma Yasuuⓐ aŋa imaan gwegen ŋwabiŋaijo kwijo gwina gwaio aŋina nono, ŋwaici, Ŋari ŋai, iŋirii dhugore; ŋidi ŋuŋa ŋina ŋike ŋimadhudhanini ganu. 3A jathib coŋ abiŋini gi dugor ganu degen, alarnu, Kwiji ibigwa gwa gwilui Kaloŋa. 4Abi Yasuuⓐ liŋa dhuŋuna gi dugor ganu degen, ŋwulaici, Kworaŋ nyababiŋini dhuŋuna ibidha dhina dhike minoŋ gi dugor ganu dalo? 5Aŋ gwijanu galo edeny diny arnu, Kwiji gwai, nyi gwimadhudhani ganu ŋidi ŋuŋa ŋina ŋike; i dinyabiŋaijo, nyaici, Diro, ŋela. 6Abi danya liŋa darnu Ŋari ŋa liji ŋuthi ŋoma mina kidhila ŋadhi dhudhani ganu ŋidi ŋina ŋike, (ŋwabiŋaijo kwijo gwina gwaio aŋina nono, ŋwaici,) Diro, ŋapai lagram luŋa, ŋabela dunu duguŋa. 7Ŋwudire, ŋwela dunu dugun. 8A dina ma liji aŋa, alali galo dir, almajidhe Kaloŋa, gina gathidhedha lijo ŋoma ŋina ŋiro minoŋ.

Urnini gwa Matta

9A dina ma Yasuuⓐ gathani kaloŋa ibige, ŋwaŋa kwijo gweta, gwina gwan Matta, gwijalo kalo ga dhimeje; ŋwabiŋaijo, ŋwaici, Diro, nyi gwuja. Ŋwudire, ŋwugwuje. 10A dina maluni kiru aljalo alar leny, a liji loinyadho lina lathimeje a lina like ila aljalo aleny Yasuuⓐ ŋalai a calmiz juŋun ko. 11A dina mal Farriisiyiin aŋa, alabiŋaijo calmiz juŋun, allaici, Kworaŋ athibi Muⓐallim gwalo eny liji lai lina lathimeje a lina like? 12A dina ma Yasuuⓐ diŋini dhuŋuna ibidhe, ŋwarnu, Liji lina liŋir nono lati libupo ẖakiim no, abi lina luma lathibupe. 13Nyabela nyaŋidhani dhuŋuna ibidhe. Dhugor dhiny dhibupo ŋimira, garini gwatu no. Nyi gwati gwiludhi durnie lijo lina liŋir no, nyi beladha dinyilurnie lina like dilurle dugore galo ŋidi ŋegen ŋina ŋike.

Dijalo jamu

14A calmiz ja Yuuẖanna ila dugun, alabiŋaijo, alaici, Kworaŋ athibi Farriisiyiin a anaŋa jalo jamu, athibi calmiz juŋa jalo jamu gatur no? 15Al Yasuuⓐ abiŋaijo, ŋwulaici, Liji la kwoma gwa dhago lathike dugore mal nanaŋ je kwoma ŋalai gwa dhago a? Abi ŋwamun ŋwaji ŋwila ŋwina ŋwadhuŋw ŋwai kwoma gwa dhago upini degen, a liji ibile lajalo jamu ŋwamun ibiŋwe. 16A kwiji gwate gwina gwathogira albatha ina iyaŋ gi luga lina lurun no, i albatha ina iyaŋ yaji yaŋirithiye kiraŋa, a lubiro laji lakani. 17A liji lati lathibuluje ŋau ŋa dugur ŋina ŋiyaŋ nyilgu nyina nyurun no. Ada dhuŋun ibidhe dhimaje, athi ŋau ŋa dugur ŋina ŋiyan kie nyilgu, athilbuludhe galo, a nyilgu nyaka; abi ŋau ŋa dugur ŋina ŋiyaŋ aram algitini gi nyilgu nyina nyiyaŋ.

Dire gwa ŋera ŋa Yaayirus dai, a iŋir nono gwa kwa gwina gwathurthi

18A dina juŋw duŋwul abiŋaijo dhuŋuna ibidhe, a kweleny gweta ila, ŋworthadha, ŋwaici, Ŋera ŋiny ŋa githo ŋar ŋai; ŋabila, ŋamini dhoi dhai, a ŋamidhe manaŋ. 19A Yasuuⓐ dire, ŋwugwuje, a calmiz juŋun ko. 20A kwa ila, gwina gwathurthi gwortal jidhileo die‐a‐ram, ŋwila gi dhuro ganu dugun, ŋwari gwamini goba ga kiraŋ guŋun. 21Gwabiŋinu gi dhugor ganu dhuŋun, ŋwarnu, Ada nyi gwimamini kiraŋa guŋun, nyi gwaji gwiŋir nono. 22Abi Yasuuⓐ urle galo, ŋwaŋa, ŋwabiŋaijo, ŋwaici, Ŋera ŋai, iŋirii dhugore, imaan gwuŋa gwimaŋa uriye nono. Anbi kwa eŋiradhadha ganu gi saaⓐa ibije. 23A ma Yasuuⓐ ila gi dunu gwa kweleny, ŋwaŋa lijo lina lathure nyula, a liji loinyadho luro gwula, 24ŋwulaici, Abirul gi dhai; ŋera ŋati ŋaio no, abi ŋa ŋidhro. Albakejuma. 25Abi malteye lijo peth por, ŋwuni dugun, ŋwumutha ŋera gi dhoi, a ŋera dire. 26A dhuŋun dhuŋun bai galo peth gi len ibile.

Liji ram lina lirima gi je

27A ma Yasuuⓐ gathani kaloŋa ibige, a liji ram lina lirima gi je gwuje, alurnie gwuleny, alaici, Inudhije, Ŋari ŋai ŋa Daawud. 28A dina muŋw obani dunu, a liji lina lirima gi je ila dugun; al Yasuuⓐ abiŋaijo, ŋwulaici, Nyaŋa luminyu darnu nyi gwuthi ŋoma gwaji geta momaŋ a? Alaicinu, Ye, Kweleny gwai. 29Ŋwumini je jegen dhoi dhai dhuŋun, ŋwulaici, Gwiro ŋinena uminyanyana dhuŋuna dhiny, nyaŋa liŋir nono. 30A je jegen ure ganu; albi Yasuuⓐ abiŋaijo gwuleny ŋwari lati labiŋaijo kwijo gwetipo dhuŋuna ibidhe no. 31Albitu, albai galo dhuŋun dhai dhuŋun kalo peth.

Kwiji gwina gwiro girila gwina gwuthi ŋurinya

32A dina jilo dela gi dhai aludhijo kwijo gweta gwina gwiro girila ŋwuthi ŋurinya. 33A dina ma Yasuuⓐ teye ŋurinya kwiji ganu, a kwiji abiŋi momaŋ; alali galo dir, alarnu, Anaŋa lati limaŋa dhuŋuna dhiro minoŋ gi liji ganu la Israayiil gatur no. 34Abi Farriisiyiin arnu, Ŋoma ŋai ŋa kweleny gwa nyuriny athuŋw teye nyurinya gi liji ganu. 35A Yasuuⓐ ela ŋwen peth ŋwina ŋwipiŋwipa a ŋwina ŋwitiŋwitiny, ŋwalimiye lijo gi majaamiⓐ gwegen, ŋwulabiŋaijo Dhuŋuna dhina Dhiŋir dha gidhila ga Kalo, ŋwugeta lijo momaŋ lina luthi gumiye gitigiter a lina luthi ŋirainy ŋitiŋiter.

Ina gwa al Masiiẖ gwan liji

36Abi dina muŋw aŋa lijo loinyadho, ŋwulinadhani ŋinena mulilo nono, albai galo gwiro ŋinena jaŋal jina jati juthi gwora no. 37Ŋwabiŋaijo calmiz juŋun, ŋwulaici, Titiganu ŋiro ŋo ŋoinyadho ŋinena kwogai, abi liji je coŋ la dhapai ŋiro. 38Othaijul Kwelenya galo gwa kwo, ŋwukeje lijo manaŋ, alothadha ŋwona ŋwuŋun liduŋw.

Attualmente Selezionati:

Matta 9: HBN

Evidenziazioni

Copia