Matta 28
28
Dire gwa Yasuuⓐ dai
1A ma lamun la Sabith erna, a lamun are ŋwure lina liro kwerkwereny la asbuuⓐ, a Maryam al Majdaliiya a Maryam gwiter iladha daŋa dhela. 2A kwiyaŋ peth ube galo gwuleny; ŋinena ulo malaak gwa Kweleny gi Sama, ŋwila, ŋwubire kolya kour, ŋwunjalo alaŋ. 3A ŋwuro gi je ganu ŋinena fure gwa lirainy, a ciraŋ juŋun pidhe bibrul gwiro ŋinena talj. 4A dhedhiban dhenya ŋeduŋw gwuleny, alube galo, alro ŋinena liji lina laio. 5A malaak abiŋaijo laio, ŋwulaici, Athanya dhenyo no, nyi gwiliŋidhi darnu nyaŋa libupo Yasuuⓐuŋw, gwina gwaio gi lure alaŋ lina limaliganu. 6Gwati mina no, gwimadire, gwiro ŋinena aruŋwna. Ilal nyaŋa kaloŋa gina gidhirna Kweleny. 7Nyabortai babraŋ, nyabiŋaijo calmiz juŋun, nyalaici, Gwimadire dai; a gwimajimadhina, gwimela Jaliil; a gwaji gwanyaŋa mine, gwiro ŋinena abiŋaijajina. 8Alabire babraŋ kimu, aldhenya, aliŋir dugore gwuleny, alortai alupijo calmiz juŋun dhuŋuna. 9A dina iludhilo dabiŋaijo calmiz, albudhe Yasuuⓐ ŋalai, ŋwulaici, Salaam ⓐalekum. Alila, almudhudha ŋwora galo, alorthadha. 10A Yasuuⓐ aicinu, Athanya dhenyo no; idhul nyabiŋaijo limaguri alela Jaliil, a laji linyaŋa mine. 11Dina nanaŋ idhila, a ejigur coŋ ya dhedhiban ila gi mediina, aldhedha lelenya la gusus khabar ga dhuŋun peth dhina dhimuthi je ganu. 12A dina malauradha liduŋw liji lai lina lurun, alabiŋaijiye, aldhedha ejigur gwarush gwoinyadho. 13Alaici, Arul nu, calmiz juŋun jimila gile, alapai nyim nanaŋ anaŋa lijo dhidhre. 14Ada dhuŋun ibidha dhimaji dhima mudiir diŋini, gwaji gwana lelinyaije, a gwaji gwajimutha. 15Minoŋ alapai gwarush, alare gwiro ŋinena abiŋaijina; athi Yahuud abiŋaijiye di gi lamun ibila.
Yasuuⓐ gwaŋinijo calmiz gi Jaliil
16Abi calmiz jina jiro die‐a‐gwetipo ela Jaliil gi len lina laŋujilo Yasuuⓐ. 17A dina malaŋa, alorthadha; abi coŋ ridiye ganu. 18A Yasuuⓐ ila degen, ŋwulabiŋaijo, ŋwulaici, Ŋeleny peth ŋidhedhiny lo gi Sama a kidhila. 19Idhul bai, nyageta calmiz gi liji la ŋwen peth ŋwa gidhila, nyal ⓐamidhiye gi jiriny ja Babo, a ja Ŋari, a ja Dhigirim dhina Dhiŋir. 20Alimiyilo almuthadha dhuŋuna peth dhina dhabiŋaijaje; alathilaje gwortal, di ma gidhila erna. Amiin.
Attualmente Selezionati:
Matta 28: HBN
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
First published by the British and Foreign Bible Society in 1966.
