Matta 23
23
Yasuuⓐ gwaŋajo Farriisiyiin a jathib dhuŋuna darnu dhati dhiŋir no
1A Yasuuⓐ abiŋaijo lijo a calmiz juŋun, 2ŋwulaici, Jathib a Farriisiyiin lajalo kursi ga Muusa. 3Dhuŋun peth dhina dhathajil abiŋaijo, ŋajilaici muthadhul, athanya muthadha, nyapai; athanya bapo ŋiro ŋegen no; lathinare, athilibapo no. 4Lathupe ŋida ŋina ŋinaŋ, alenaje lijo dapai, athilbupe lijo ŋwuran alaŋ; athilbi dhogajo lamun lai legen letipo no. 5Abi ŋiro ibiŋe peth ŋathilapai dari al liji aŋa, athil geta ẖisaab gworaŋ ganu aloriye joba ganu ja jallaabiiya jegen. 6Athiluminyi kaloŋa gina giŋiranu ga dhijalo kimure, a gina giŋiranu gi majaamiⓐ. 7Athiluminyi dimirejiye gi suug, athiluminyi di liji aici, Muⓐallim gwai, Muⓐallim gwai. 8Athaji liji aici Muⓐallim gwai, ŋinena ro Muⓐallim gwalo gwetipo gwan al Masiiẖ; a nyaŋa peth liro ŋimega. 9Athana nyalaici kwijo gweda babo mina kwiyaŋ no; ŋinena ro Babo gwalo gwetipo dogo gwina gwathije gi Sama. 10I athaji laici leleny lai no; ŋinena ro Kweleny gwalo gwetipo dogo, gwina gwan al Masiiẖ. 11Abi gwina gwinunu peth dagalo ŋwubiro gadham galo. 12Kwiji gwina gwatharnu gwinaŋ gwiren gwaji gwajalo murulaŋ; abi gwina gwatharnu gwitiny gwiren gwaji gwuni.
13Abi nyaŋa laji laka dugore, jathib a Farriisiyiin lai, lina luthi dhuŋuna ganu ram; nyaŋa lathi luŋithijo lijo gidhileo ga Sama; athanyanudhi, i nyalabrico lijo lina lari lanuni aluni no. 14Nyaŋa laji laka dugore, jathib a Farriisiyiin lai, lina luthi dhuŋuna ganu ram, nyaŋa lathidhigir galo dunu gwai gwa la lina liro linina, a dhuŋun dhai dhina dhiro tur nyabiŋaijo Kaloŋa dhuŋuna dholaŋ; nyaŋa laji lapai ẖukm gwina gwinunu. 15Nyaŋa laji laka dugore, jathib a Farriisiyiin lai, lina luthi dhuŋuna ganu ram; nyaŋa lina lathibupe baẖr alaŋ a kwiyaŋ kwijo gwetipo gwina gwuminyu dhuŋuna dhalo, a manyabuje nya dujani ŋwamun ganu ram ŋari ŋadhi Jahannam dagalo.
16Nyaŋa lina liro ŋwudhibaŋ, nyaŋa laji laka dugore lina lathodhadha lina latharnu, Gweda gwina gwalifiye hekal gwai, dhiro tur; abi gweda gwina gwalifiye dahab dhai dha hekal, aram gwutheye dhuŋuna je ganu. 17Jirila a ŋwudhibaŋ, aŋ gwibuthanu dahab, i hekal gwina gwaijarima dahab? 18A gweda gwina gwalifiye gi loboŋ dhiro tur; abi gwina gwalifiye kwoŋ gwai gwina gwijina alaŋ, aram gwutheye dhuŋuna je ganu. 19Jirila a ŋwudhibaŋ, aŋ gwiro gwibuthanu kwoŋ gwa dhigarini, i loboŋ lina lathi jarima kwoiny a? 20Gweda gwina gwalifiye gi loboŋ, gwanalifiye, a ŋidi peth ŋina ŋijina alaŋ. 21A gweda gwina gwalifiye hekal, gwanalifiye, a ŋeda gwina gwijina ganu. 22Abi gweda gwina gwalifiye Sama, gwalifiye kursi gai ga Kalo, a ŋeda gwai gwina gwijina alaŋ.
23Nyaŋa laji laka dugore, jathib a Farriisiyiin lai, lina luthi dhuŋuna ganu ram; nyaŋa lathimeje ⓐushur gwa naⓐnaaⓐ a shibith a kammuun, athanyabi doinya dhuŋuna dhina dhinunu dha naamuus; dhuŋun dhina dhiro titiganu, a dha dhina, a dha dhuminyi dhanyai apai, athathanya dhudhanu ganu dapai dhuŋuna dhiter ko no. 24Nyaŋa lina lathodhitha lijo nyabiro ŋwudhibaŋ lina lara lajuje lauwa, nyabiŋadhini kamila.
25Nyaŋa laji laka dugore, jathib a Farriisiyiin lai, lina luthi dhuŋuna ganu ram; nyaŋa lathi uye kubbaaya a s̱aẖn gi dhur alaŋ, nyaboinyadhe dhuŋuna ganu dhina dhike. 26Farriisi gwai gwina gwiro ŋwudhibaŋ, athaŋa uye kubbaaya a s̱aẖn ŋidi ŋina ŋijo ganu kwereny, abi ŋaji ŋa jure gi dhuro alaŋ ko.
27Nyaŋa laji laka dugore, jathib a Farriisiyiin lai, lina luthi dhuŋuna ganu ram, ŋinena ranya del dina dipidho bibrul, dina daŋinu titiganu diŋir gi dhuro gwai, athilboinyadhe ŋwui ganu ŋwa liji lina laio, a ŋidi peth ŋina ŋiro ŋirle. 28Minoŋ ko nyaŋa liro ŋinena liji lina liŋir gi je ganu ja liji, nyabi oinyadhe dhuŋuna dhina dhike gi dugor ganu dalo.
29Nyaŋa laji laka dugore, jathib a Farriisiyiin lai, lina luthi dhuŋuna ganu ram, ŋinena athanyaice dela da nebiŋa, athanya jarima dela da liji lina liŋir. 30Athanyarnu, Ada anaŋa lina lijii gi jidhila ja baboŋa luri, lati ladhanal ure nebiŋaije ŋina no. 31Aŋadhul nyaŋa limaro shuhuud gwa lidom lalo darnu nyaŋa liro keleŋa ga ŋediŋa lina lathirinya nebiŋaije. 32Oinyajul miizaan alaŋ gwa baboŋa lalo. 33Nyaŋa lina liro juma, a ligwurna la ŋwodhor, nyaŋa luthi ŋoma lagilaŋini jiza ja Jahannam akwai? 34Aŋadhul, nyi gwukejaje nebiŋaije, a liji lina libebra, a jathib; a coŋ degen nyalrinya, a coŋ nyalalije ŋwure alaŋ ŋwina ŋwimaliganu; a coŋ nyalpi gi majaamiⓐ gwalo, athanyalure ŋina mediina mediina. 35Ŋin ŋa liji peth la gidhila lina liŋir ŋina ŋirinu ŋaji ŋaje ŋwuralaŋ dagalo, ro ŋin ŋa Haabiil gwina gwiŋir di ŋin ŋa Zakariiya, gwina gwiro ŋari ŋa Barakhiiya, gwina gwirinyiyanya keligeny ganu hekalŋaije loboŋ lai. 36Titiganu nyi gwa gwacaijinu, Dhuŋun ibidhe peth dhaji dhila ŋwuralaŋ ŋwa liji ibila.
Yasuuⓐ gwuradhi Urushaliim
37Urushaliim, Urushaliim, gwina gwathirinya nebiŋaije, alaice ŋediŋaije nyol nyai lina lukejilo dagalo, ŋwamun ŋwoinyadho nyi gwathari gwawureje keleŋa guŋa liduŋw, gwiro ŋinena athin kagaro wuriteje keleŋa guŋun gi nyibo ganu, athanya bidoinya. 38Aŋadhi duna gwuŋa gwijalo gwudho ganu. 39Nyi gwa gwacaijinu, Nyaŋa lati linyaŋa manaŋ gatur no, di manyarnu, Gwiŋir dhugore gwina gwidhi jiriny jai ja Kweleny.
Attualmente Selezionati:
Matta 23: HBN
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
First published by the British and Foreign Bible Society in 1966.
