Matta 20
20
Odaije gwa liji lina lathapai ŋiro gi dhiruiny ganu dha dhugur
1Gidhila ga Sama giro ŋinena kweleny gwa dunu gwina gwitui ro gi dhai gile duŋw bupe lijo la dhapai ŋiro gi dhiruiny ganu dhuŋun dha dhugur. 2Abi dina mal uminyujiye liji lai rubu aŋina, ŋwulukeje gi dhiruiny ganu dhuŋun. 3Ŋwari ŋwutu saaⓐa thudhina‐kworoŋo, ŋwulbuje liter dijalo tur gi suug ganu. 4Ŋwulabiŋaijo, ŋwulaici, Idhul gi dhiruiny ganu, a ŋidi peth ŋina ŋiŋir ŋaji ŋajildhedha. Alela. 5Ŋwari ŋwutu saaⓐa die‐a‐ram a gi saaⓐa thiril ando ko. 6Ŋwari ŋwutu saaⓐa thudhina, ŋwulbuje liter lijalo tur, ŋwulabiŋaijo, ŋwulaici, Kworaŋ athanyabi jalo aŋina peth tur? 7Alabiŋaijo, alaici, Anaŋa lathijalo tur ŋinena irinii kwiji gwa dhijidhedha ŋiro. Ŋwulaicinu, Idhul ko gi dhiruiny ganu; a ŋidi peth ŋina ŋiŋir ŋaji ŋanyal apai. 8A dina ma kalo ro kera, a kweleny gwa dhiruiny abiŋaijo wakiil gwuŋun, ŋwaici, Abiŋaijo lijo la ŋiro alila, nyil muthijo gwarush gwa ŋiro ŋegen, ŋaldhedha lina liro la gidon kwereny, a gwaji lina la kwereny. 9A dina ma liji ila lina lijo dapai ŋiro saaⓐa thudhina, ŋwuldhedha rubu, rubu. 10Abi liji lina limadhinanu abiŋini gi dugor ganu degen, alarnu lidhi labuthani albapai rubu, rubu ko. 11A dina malila, alrumejo kwelenya diman galo, 12alaici, Liji ibila lapo ŋiro saaⓐa jetipo dogo, jilbi ubie ganu anaŋa lina lapo ŋiro ŋoinyadhanu ninaŋin ji aŋin dunu. 13Ŋwabiŋaijo gweta degen, ŋwaici, Madhiguri, nyi gwati gwuruje kikiny no; alŋa lati luminyujiyo dapai ŋiro rubu gwai na? 14Apo gwina gwiro gwuŋa, ŋela gi dhai; nyi ko gwuminyu dinyildhedha ibila lina lijo gidon gwiro ŋinena gwuŋa. 15Dhati dhaudhi diginy dinyapai dhuŋuna dhina dhibupinyina? Au gwikijiny ganu ŋinena iŋirinyiny a? 16Liji lina lijo gidon laji lamadhini, a lina limadhinu laji laje gidon. Liji loinyadho lurninu, abi coŋ muthini.
Yasuuⓐ gwabiŋu dhuŋuna dha ai gwuŋun ŋwamun ganu thiril
17A dina ma Yasuuⓐ ari gwalo Urushaliim, ŋwodha calmiz juŋun jina jiro die‐a‐ram dhai dheta, ŋwulabiŋaijo, ŋwulaici, 18Liŋidhul darnu alŋa laludhudhi Urushaliim, a Ŋari ŋa liji ŋadhedhini leleny la gusus, a jathib, ŋalakimiye ai gwai. 19A ŋaji ŋaludhijo Liumam a ŋandhagirini, a ŋalpi laical lai, a ŋalrinya gi lure alaŋ lina limaliganu, a ma ŋwamun ro thiril ŋadire manaŋ.
Nana gwa Yaⓐguubŋa Yuuẖanna gwai othaije Yasuuⓐuŋw galo ŋeleny ŋai ŋa keleŋa guŋun
20A nana gwa keleŋa ga Zabadi ila dugun, ŋwila keleŋa gai guŋun, ŋworthadha, ŋwothaije galo dhuŋun dhai dheta, 21Ŋwubabiŋaijo, ŋwaici, Nyaŋa larakwai? Ŋwabiŋaijo, ŋwaici, Abrico keleŋa giny ram ŋalaji ŋaljaijo galo ŋwumera, ŋeta gi dhiŋir, a ŋeta gi dhour kidhila guŋa. 22Albi Yasuuⓐ abiŋaijo, ŋwulaici, Nyaŋa lati liliŋidhi dhuŋuna ibidha dhina dhothaijinyil dhai galo no. Nyaŋa luthi ŋoma leye gi finjaan gwina gwaji gwinyin iye, a nya laⓐamidhini maⓐmuudiiya gwai gwina gwiⓐamidhininy gwai a? Alabiŋaijo, alaici, Anaŋa luthi ŋoma. 23Ŋwulabiŋaijo, ŋwulaici, Titiganu nyaŋa laji leye gi finjaan gwiny, a nya laⓐamidhini maⓐmuudiiya gwai gwina gwiⓐamidhiny gwai, abi dijalo gi dhiŋir a gi dhour diginy, dhuŋun ibidha dhiny dhati dhiro dha dhajupijo no, abi kalo ibige ga liji lina laji gal Babo gwiny gitijo. 24Abi dina ma calmiz diŋini jina jiro die, alka dugore di Yaⓐguubŋa Yuuẖanna gwai.
Buthani gwina gwiro titiganu
25Albi Yasuuⓐ abiŋaijo, ŋwulaici, Nyaŋa liliŋidhi darnu leleny la Liumam lathakimiye lijo legen, a lina linaŋ luthi ŋeleny degen. 26Abi dhuŋun ibidha dhati dharo minoŋ dagalo no; abi ada kwiji gweta gwimari ŋwabuthani dagalo ganu, abricul ŋwuro gadham galo. 27A gwina gwara gwaro kweleny dagalo ganu, abrico ŋwuro gine galo. 28A minoŋ ko Ŋari ŋa liji ŋidhi, ŋati ŋiludhi dari ŋa liji upijo ŋiro no, abi duŋwupijo lijo ŋiro, ŋwai ŋweijo lijo loinyadho.
Liji ram lina lirima gi je limure je ganu
29A dina malgathani Ariiẖuŋw, al liji gwuje loinyadho. 30A liji ram lina lirima gi je jalo dhai kuni dina mal diŋini darnu Yasuuⓐ gwo gwidhi gi dhai ibidhe, alure gwula gwuleny, alaici, Kweleny gwai, gwina gwiro Ŋari ŋa Daawud, inudhije. 31Albi liji ekajo, alari laje jigwoiny; alburuni gwula gwuleny, alaici, Ŋari ŋai ŋa Daawud, inudhije. 32A Yasuuⓐ dhuna, ŋwulurnie ŋwari lila dugun. Dina malila ŋwulothaije galo, ŋwulaici, Nyaŋa lara nyi gwajure akwai? 33Alabiŋaijo, alaici Kweleny gwai, anaŋa lara lure je ganu. 34Al Yasuuⓐ ina, ŋwumini je jegen dhoi dhai; a je jegen ure ganu babraŋ, algwuje.
Attualmente Selezionati:
Matta 20: HBN
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
First published by the British and Foreign Bible Society in 1966.
