Matta 13

Odaije gwa kwiji gwina gwathauni

1Gi lamun ibile a Yasuuⓐ gathani duna, ŋwela ŋwujalo kimumu ga baẖr. 2A liji loinyadho ila dugun, ŋwuni gi felluuka ganu, abi liji dhunu kimumu. 3Ŋwulodaijo, ŋwulaici, Kwiji gweta gwiludhi dauni; 4a dina muŋw auni, a ŋwulaŋ coŋ ide gi dhai alaŋ, a nyira ila, aleny. 5A ŋwiter ide ŋworlolo ganu ŋwina ŋwati ŋwuthi kwiyaŋu gwoinyadho no; anitudhadha ganu, ŋinena athi kwiyaŋ jo gwoinyadho no. 6A ma aŋin alidha, alude; ŋinena athil uthi duwa doinyadho no, aludhe. 7A coŋ ide gi cugi ganu; a cugi biŋa, aleny. 8A coŋ ide ŋiro ganu ŋina ŋiŋir, aliŋa keleŋa; a coŋ uthi je dure‐thudhina, a coŋ dure‐thiril, a coŋ dhure‐a‐die. 9Gwina gwuthi nyuni nya dhidiŋini, abricul ŋwudiŋini.

Dhuŋun dha odaije dhiraŋ?

10A calmiz ila dugun, alothaije galo, alaici, Kworaŋ ŋababiŋaijo lijo dhuŋuna ibidha odaije gwai? 11Ŋwulbabiŋaijo, ŋwulaici, Nyaŋa luthi ŋoma laliŋa dhuŋuna dhina dhigilibo dha gidhila ga Sama, athil biliŋidhi no. 12Kwiji gweda gwina gwuthi ŋida ŋaji ŋalbadhaijo manaŋ, a ŋaji ŋuŋwululthuni; abi gwina gwati gwuthi ŋida no ŋaji ŋalapa ŋina ŋuthuŋwulo. 13Gi dhuŋun ibidha ŋajibi abiŋaijo odaije gwai, diluthi ŋoma alaŋa je jai jegen, athilbi aŋadhi no; aldiŋini, athilbidiŋinu no, i athil liŋidhi no. 14A dhuŋun dhina dhabiŋu nebi Ishaⓐya uthi je ganu degen dhina dhabiŋudhuŋw degen gwai, dhina dharnu, Didiŋini nyaŋa laji ladiŋini, abi dhati dhanyaliŋa no; a daŋa nyaŋa laji laŋa, a dhati dhanyaliŋa no. 15Ŋinena bur dugor da liji ibila, a nyuni nyegen rimi ganu didiŋini, a je jegen luthini; i udubidi ŋediŋa luthi ŋoma ladaŋa galo je jai jegen, a luthi ŋoma ladiŋini nyuni nyai nyegen, a luthi ŋoma alliŋa dugor dai degen, alurle dugore galo degen, a linyil iŋiriye nono. 16Abi je jalo jiŋir, ŋinena aŋudhilo momaŋ; a nyuni nyalo, ŋinena diŋinilo. 17Titiganu nyi gwa gwacaijinu, Nebiŋa a liji lina liŋir loinyadho lathibupe dilari laŋa ŋida ŋina ŋathanyalaŋa, abi lati luthi ŋoma ŋalaŋa no. Alari ladiŋini dhuŋuna dhina dhathanya diŋini, abi dhati dhuthi ŋoma dhaldiŋini no.

Maⓐna gwa odaije gwa kwiji gwina gwathauni

18Diŋinul odaijuŋw gwa kwiji gwina gwaunu. 19Mathi kwiji gweta diŋini dhuŋuna dha gidhila ga Sama, athuŋw biliŋidhi no, a Sheṯaan ila, ŋwugre dhuŋuna dhina dhikwuinu gi dhugor ganu dugun. Gwiro ŋeda gwina gwikwuinu gi dhai kuni. 20A ŋwina ŋwide ŋworlolo ganu, gwiro gwina gwathidiŋini dhuŋuna dha Kalo, ŋwunmuthadha ganu babraŋ, ŋwiŋir dhugore; 21athuŋwbuthi duwa no, athuŋwbi je gwitiny manaŋ; abi mal dhuŋun dhina dhike ilijo; i man liji dhagirini gi dhuŋun dhina dhuthilo dha Kalo, an idudhadha ganu. 22A ŋwina ŋwide gi cugi ganu gwiro gwina gwathidiŋini dhuŋuna dha Kalo; athibi ŋidi ŋa gidhila ibiga mirejuni dhugore a ŋidi ŋoinyadho mirejo galo, aleny dhuŋuna dha Kalo, athuŋw riro no. 23Abi gwina gwido ŋiro ganu ŋina ŋiŋir, gwiro kwiji gwina gwathidiŋini dhuŋuna dha Kalo, ŋwuliŋa momaŋ; a gwarire ko fruuta momaŋ; ŋwuthi je dure‐thudhina, a coŋ dure‐thiril, a coŋ dhure‐a‐die.

Odaije gwa domel gwina gwikwuinu gi dhiruiny ganu

24Ŋwulodaijo odaijuŋw gwiter, ŋwulaici, Gidhila ga Sama giro ŋinena kwiji gwina gwikwui ŋwulaŋa ŋwina ŋwiŋir gi dhiruiny ganu dugun. 25Abi dina ma liji peth dhire, a kwiji gweta ila gwina gwikiil gwai, ŋwukuijo domela gi dhiruiny ganu dhuŋun, ŋwabire. 26A ma ŋwon tuya, aliŋa keleŋa, abi domel tuya ko, ŋwuliŋini ŋwon ganu. 27A jadham ja kweleny ibigwe ila dugun, alabiŋaijo, alaici, Kweleny gwai, ŋa gwati gwikwui ŋwulaŋa ŋwina ŋwiŋir gi dhiruiny ganu dhuŋa na? Abi domel gwidhi na? 28Ŋwulabiŋaijo, ŋwulaici, Kwiji gwina gwikiana gwai gwimapai dhuŋuna ibidha. A jadham abiŋaijo, alaici, ŋa gwara anaŋa lela ana kura galo a? 29Ŋwulbaici, Oo; ada nyaŋa limakura domela galo, nya lakura ŋwona galo ko. 30Abricilo albiŋa liduŋw di maji maluni ŋwona; abi gi lamun ibile nyi gwabiŋaijo lijo lina lathapai ŋiro, linyilaici, Waladhul domela galo kwereny, nyageta liduŋw, daji dudunini; nyabuni ŋwona ŋwiny, nyalbuluje ŋiluŋw ŋiny. 31Ŋwulari ŋwulodaijo odaijuŋw gwiter, ŋwulaici, Gidhila ga Sama giro ŋinena luginy la mastarda lina lapo kwiji, ŋwukwoi gi dhiruiny ganu. 32Litinyanu ŋwuginy peth; abi malkwoi, muŋw tuya, ŋwubuthani a ŋwolanalaŋ jari peth jina jitijitiny, ŋwuro kwari gwina gwipa, athin nyira nya kabo auradhe nyoinyadho aldhre gi durna duŋun. 33Ŋwari ŋwulodaijo manaŋ, ŋwulaici, Gidhila ga Sama giro ŋinena jila jina jiro ŋijini jina japilo kwa, ŋwulgilibice gi jila ganu jina jiro ŋwenya thiril, di malro ŋijini peth. 34Dhuŋun ibidhe peth dhabiŋaijo Yasuuⓐ lijo odaije gwai; lati lathuŋwul abiŋaijo dhuŋuna dogo no, athuŋwulbi odaije. 35A dhuŋun uthi je ganu dhina dhabiŋu nebiŋa dhina dharnu, Nyi gwaji gwigiye ŋwinyu ŋwiny, nyaji nyodaije. Nyi gwaji gwaŋiye dhuŋuna dhina dhigilibo ro kwereny gi dhugul dha gidhila.

Maⓐna gwa odaije gwa domel

36A Yasuuⓐ dhiŋa lijo, ŋwuni kiru; a calmiz juŋun ela dugun, alabiŋaijo, alaici, Aŋajije odaijuŋw gwa domel gwina gwikwuinu gi dhiruiny ganu. 37Ŋwulabiŋaijo, ŋwulaici, Kwiji gwina gwikwui ŋwona ŋwina ŋwiŋir gi dhiruiny ganu Ŋari ŋa liji ŋiro; 38a dhiruiny dhiro gidhila; a ŋwon ŋwina ŋwiŋir ŋwiro keleŋa ga gidhila ga Sama; a domel gwiro keleŋa ga Sheṯaan; 39a kwiji gwina gwikiil gwai gwina gwikwuilo gwiro Sheṯaan; a lamun la dhuni liro ŋinena lamun la gidhila lina laji lamira; a lina laji luni malaayka liro. 40A gwiro ŋinena an domel gwina gwike dunini iga yai; dhuŋun dhaji dhanro minoŋ ko gi lamun lina laji lamira. 41Ŋari ŋa liji ŋaji ŋukeja malaayka luŋun, a la uthe ŋida ganu peth ŋina ŋike kidhila ganu guŋun, a ko peth lina lathapai ŋida ŋina ŋike. 42A laji laligatho kiga; a laji lanare, alinyini gi jiŋai. 43Abi lina liŋir laji lora galo gwiro ŋinena aŋin kidhila ga Babo gwegen. Gwina gwuthi nyuni nya dhidiŋini, abricul ŋwudiŋini.

Odaije gwa lulua, a ŋidi ŋina ŋiŋir ŋina ŋigilibicinu gi dhiruiny ganu, a diba

44Gidhila ga Sama giro ŋinena ŋidi ŋina ŋiŋir ŋina ŋigilibicinu gi dhiruiny ganu; ŋina ŋibujilo kwiji gweta, ŋwulgilibice, gwiŋir dhugore gwuleny, ŋwela, ŋwelia ŋida ŋuŋun peth, ŋwelaŋ dhiruiny ibidhe. 45Manaŋ gidhila ga Sama giro ŋinena jellaaba jina jathibupe nyideny nyina nyiro lulua lina liŋir gwuleny. 46A dina muŋw buje ŋideny ŋeta ŋina ŋuthi luro lipa gwuleny, ŋwelia ŋida ŋuŋun peth, ŋwelaŋ ŋidenya ibiŋe. 47Manaŋ gidhila ga Sama giro ŋinena diba gwina gwiguthinu gi baẖr ganu, ŋwuwareje ŋida liduŋw ŋoinyadho ganu. 48A dina muŋw oinyadhe, alodha kimumu, aljalo, alotha ŋweny ganu ŋina ŋiŋir, alili gatho ŋina ŋike por. 49Gwaji gwaro minoŋ gi lamun la gidhila lina laji lamira. Malaayka latuia, algugina lijo ganu lina like gi liji ganu lina liŋir. 50Alligatho kiga, alare, alinyini gi jiŋai. 51Al Yasuuⓐ abiŋaijo, ŋwulaici, Nyaŋa limaliŋa dhuŋuna ibidha peth a? Alaicinu, Ye, Kweleny gwai. 52Ŋwulabiŋaijo, ŋwulaici, Jathib peth jina jaliminu kidhila ga Sama jiro ŋinena kwiji gwina gwiro kweleny gwa dunu gwina gwathapai ŋida ŋa ŋidi ŋuŋun ŋina ŋiŋir, ŋina ŋiyaŋ a ŋina ŋurun.

Liji la Naas̱ira lidoinyo Yasuuⓐuŋw

53A dina ma Yasuuⓐ meaje odaijuŋw ibigwe peth, ŋwugathani kaloŋa ibige. 54Ŋwela, ŋwobani gi len luŋun, ŋwulalimiye gi majmaⓐ ganu gwegen, alali galo dir, alarnu, Kwiji ibigwa gwapo ŋadigirenya na, athuŋw bapai ŋiro ibiŋa ŋina ŋinaŋ? 55Ŋari ŋa najjaar ŋutu na? a nana gwuŋun gwati gwan Maryam na? Yaⓐguubŋa, Yuusufŋa, Simⓐaanŋa, Yahuudhaŋa lati liro limegen na? 56A limegen lina liro nyera lati lathilije na? Kwiji ibigwa gwapo ŋida ibiŋa peth na? 57Alkadugore dugun, albi Yasuuⓐ abiŋaijo, ŋwulaici, Nebi gwuthi nuŋw, abi gwati gwuthi nuŋw gi len luŋun, a gi dunu gwuŋun no. 58Athuŋw apo ŋiro ŋoinyadho ŋina ŋinaŋ mine no, ŋinena athil uminyu no.

Attualmente Selezionati:

Matta 13: HBN

Evidenziazioni

Copia