Matta 11
11
1A dina ma Yasuuⓐ meaje dhuŋuna dhina dhabiŋaijuŋw calmiz juŋun jina jiro die‐a‐ram, ŋwugathani kaloŋa ibige, ŋwela ŋwabiŋaijo lijo, ŋwulalimiye dhuŋuna dha Kalo ŋwen ŋwegen.
Yuuẖanna al Maⓐmadaan
2Dina ma Yuuẖanna diŋini gi karkon ŋiro ŋina ŋapilo al Masiiẖ, ŋwukeje calmiz juŋun ram, 3dilothaije galo, alaici, Ŋa gwiro kwiji gwina gwa dhila, i anaŋa dhunijo gwiter? 4Al Yasuuⓐ abiŋaijo, ŋwulaici, Idhul nyaŋajo Yuuẖannuŋw dhuŋuna dhina dhidiŋinanya a dhina dhaŋadhanya. 5Nyaici, Liji lina lirima gi je limadaŋa galo, a lina liro jibijoŋ limelila, a nyilaŋ nyimiŋir nono, a liji lina lirima nyuni ganu limadiŋini, a lina laio limadire dai, a liji lina lati luthi ŋida no limadiŋini Dhuŋuna dhina Dhiŋir. 6A kwiji gwiŋir dhugore gwina gwati gwathiny kijo dhugore gi dhuŋun dheda no. 7A dina malila, a Yasuuⓐ abiŋaijo lijo Yuuẖanna gwai, ŋwulaici, Nyaŋa liludhi gi leba dari nyalaŋa aŋa? Dhimoiny dhina dhereo karun galo a? 8Abi nyaŋa liludhi dari nyalaŋa aŋa? Kwiji gwina gwigeno ciraŋa jina jimide a? Abi lina lathigena ciraŋa jina jiŋir lathije gi dunu gwa maluuk. 9Abi kworaŋ gwiladhanyana por? Danyaŋa nebi a? Ye, nyi gwa gwacaijinu, gwiro nebi, ŋwununi di nebi. 10Kwiji ibigwe gwiro gwina gwaladhina, alarnu, Aŋadhi, nyi gwukeja gadham giny gaŋa madhina, gina gaŋagitijo dhai momaŋ. 11Titiganu nyi gwa gwacaijinu, Gi liji ganu peth lina liliŋinu gi la gwati gweda gwina gwinunu Yuuẖanna al Maⓐmadaan no; abi gwina gwitinyanu kidhila peth ga Sama gwinunu dugun. 12A ŋwamun ŋwa Yuuẖanna al Maⓐmadaan di a ŋinena liji lara luni kidhila ga Sama ŋoma ŋai, alapai ŋarthan ŋai. 13Nebiŋa peth a naamuus labiŋu di a Yuuẖanna ila. 14A ada dimanyuminyi Iliiya gwiro gwina gwai ila. 15Gwina gwuthi nyuni nya dhidiŋini, abricul ŋwudiŋini. 16Abi nyi gwarnu liji ibile liro ŋinena aŋ? Liro ŋinena keleŋa gina gathijalo kalo ga suug, alurnie limedhigen, alaici, 17Anaŋa lurijaje nyula, athanya biritho no; a anaŋa lirunijaje, athanya buro gwula no. 18Yuuẖanna gwidhi, athathuŋw ithi i gweye no, alarnu, Gwuthi ŋurinya. 19Abi Ŋari ŋa liji ila athuŋweny, ŋwiye, albarnu, Kwiji ibigwe gwigugirudho ganu ŋidi ŋa dheny, a ŋwuro kwiji gwina gwubijo girija ganu, a medhigen gwa lijiŋa lina lathimeje a lina like; abi ŋiro ŋuŋun au bebra gwai.
Liji la ŋwen laka dugore lina lati luminyu dilurle dugore galo degen gi ŋidi ŋina ŋike no
20Ŋwubari ŋwuŋeŋira ŋwena ŋwina ŋwijina ganu, ŋwapina ŋiro ganu ŋuŋun ŋina ŋinaŋ, ŋinena athil uminyu dilurle dugore galo degen gi ŋidi ŋina ŋike no. 21Ŋwulaici, Liji lai la Kuuraziin, a liji lai la Bets̱aida, nyaŋa laji laka dugore ada ŋiro ŋina ŋinaŋ ŋimupini gi S̱uur a S̱iiduun ŋina ŋimupini dagalo, liji la S̱uur a S̱iiduun lurle dugore galo degen ro dilaŋ gi ŋidi ŋegen ŋina ŋike, aljalo gi bruthe gwa jaro. 22Abi nyi gwa gwabiŋaijaje, ŋajaici, Liji la S̱uur a la S̱iiduun laji liŋirani dugore dagalo gi lamun lina laji lal Kalo akimiye gidhileo guŋun. 23Liji lai la Kafranaaẖuum, nyaŋa lalo gi Sama a? Nyaŋa laji ladhiŋudhini kalo gina gathin liji je lina laio; ada ŋiro ŋina ŋinaŋ ŋina ŋupinu dagalo ŋimupini Saduum lai je gi lamun ibile. 24Abi nyi gwa gwabiŋaijaje, ŋajaici, Liji la Saduum laji liŋirani dugore dagalo gi lamun lina laji lal Kalo akimiye gidhileo guŋun.
Duminyi gwiro ŋinena ŋari ŋina ŋitiny
25Gi lamun ibile a Yasuuⓐ abiŋi, ŋwarnu, Nyi gwa gwaicaŋa shukran, Babo gwina gwiro Kweleny gwa Sama a gwa gidhila, ŋinena ŋa gwimagiliba ŋida ibiŋa gi liji lina libebra a lina laliminu, ŋabaŋajo keleŋa gina giro ŋwugur. 26A minoŋ, Babo, a dhuŋun ibidha dhimaŋini diŋir gi je ganu juŋa.
Ŋiro ŋina ŋapilo Yasuuⓐ
27Babo gwiny gwidhedhiny ŋida peth gi dhoi ganu dhiny; athi kwiji gwetipo liŋidhi Ŋare no, abi Babo; athi kwiji gweda liŋidhi Babuŋw no, abi Ŋari, a kwiji gwina gwaji gwa Ŋari aŋajo. 28Ilal peth diginy, nyaŋa lina lathapai ŋiro, nyupini ŋida ŋina ŋinaŋ, a nyi gwaji abrico nya lagathuwa. 29Upinul loka liny gi lidom, nyaliŋa dhuŋuna dhiny; nyi gwirudhinu, nyiro miskiin gi dhugor ganu dhiny; a digirim dalo da gathuwa. 30Loka liny lijo galo edeny, a dhube dhiny dhowraŋ.
Attualmente Selezionati:
Matta 11: HBN
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
First published by the British and Foreign Bible Society in 1966.
