Kejadian Uram 3
3
Ninyi yala yumanyi Adam biryi mem dinyi kunuboka dakbisibmou deyok
3:1-24
1Er Imtamnyi Iya Erebdobnyi biryi tukwetam kiknibmou kamyoa yuk-yuk nirya andara kanya dikum akwe boramnyi. Bok, kwatima ara tola ati, ninyi kanya tangni uram akwe en keica kuramwe. A deyok aryi kwatima biryi a ner bisi ato ebmou, “Sun Nai, Er Imtamnyi biryi, ‘A mutuk dam kurur co nirya ara du dakde yina mem,’ ebsou do?” eboka asibmou. 2Uca, a ner aryi ato ebmou, “ ‘A mutuk dam kurur co du nirya ara ur dakde yironkwandurum!’ ebsou. 3Bok, a mutuk dam noutumang kobdob asi tikwe co du ara, ‘Bolina ab, du dakde yina ab ara mem. A mem co du asi dakoka yibmarurumnyi ura, dibkwandurum,’ ebsou,” ebmou. 4Ucab, a kwatima aryi ato ebmou, “Tola ati, ‘Dibkwandurum,’ ebsou ake! 5‘A co du yibdingnyi asi asing elekci ba, malyi dinyi ab, teleb dinyi ab nirya bikdingiryi, Ni Iya Erebdobnyi bito kibdingnyei,’ tenen ati, ato ebsou ake!” ebmou. 6Ura, a ner aryi dinmou uca, Er Iya Erebdobnyi biryi, “Yina mem,” eamwe co du asi eng obmoua lomlom enmou asi asing eibmou. Ura, a ner ara mem co du bol kamuk ara telebto kubmou aryi er kanya mantanakdobmou ba, ato tenebmou, “A co du dakoka yibnyi ba, ni kum bingnun dinyi bikdobkwan,” tenebmou. Ura, a ner aryi a mem co du asi dakoka yibmou. Ura, er akenyi bisi ton dakoka karebmou ba, yibmou. 7Sirya yibmarei ura, sun asing elekmouci, asing dina kinkin olobmou. Ba, sun nong dirderdarandei uca, nong baning a tikmarei asi asing eibdanmarei. Ura, sun alyi aryi wimum-wamum eboka co bok asi tabwe deneboka ongobdobmarei.
8Ura, sintam ara kekerandei uca, Er Imtamnyi Iya Erebdobnyi bira a mutuk dam yibanmouci, yan darab-darab eryibanmou asi lilim kekebmarei. Ura, a nang bitinyi ara, “Er Imtamnyi Iya Erebdobnyi asing eibsicei,” tenen ati, co kankan inibdobmarei.
9Uca, Er Imtamnyi, Erebdobnyi biryi yumanyi bisi nabmouci, ato ebmou, “Ninyi yumanyi, kan dantam kunmarim do?” ebmou. 10Uca, ninyi yumanyi biryi ato ebmou, “Nai, ni nong baning tikman bok asi, Kan a mutuk dam yibanmarima lilim kekebmakinci, ni ilil ati a inibdobman,” ebmou. 11Uca, Er Imtamnyi Iya Erebdobnyi biryi ato ebmou, “Kanda unanyi biryi, ‘Kanda nong baning tikmarim,’ ebmakir do? Niryi, ‘A co du dakde yina mem,’ ebse co du dakoka yibmarim kum?” ebmou. 12Ba, ninyi yumanyi biryi ato ebmou, “Kanci, ni dam a kabdeibnoumwe ner aryi, ‘Mem,’ eboumwe co du dakoka karebmanir ba, yibman,” ebmou. 13Ura, Er Imtamnyi Iya Erebdobnyi biryi a ner asi ato eboka asibdenmou, “Kan una kubmarim do?” ebmou. Uca, a ner aryi ato ebmou, “Ni kanya manunuk aryi a co du dakmana kuma, kwatima biryi takeibmanou ba, a co du dakoka yibman,” ebmou. 14Ura, Er Imtamnyi Iya Erebdobnyi biryi kwatima bisi ato ebmou, “Kanci ukuboka takeibmarim ba, a co du dakoka yibmaring ati, Niryi kansi subkwinkin. Ara, tukwetam kamyoa yala yuk-yuk nirya, ninyi kankan kun dinyi babyi, bai kurande dinyi babyi ara yan deici aryi yibaramingnyi bok, kanda mundu tang deib aryi iya yibankwandim. Ba, kan yina ara tukwe asi kan yina kiboka yibde kunkwandim. 15Ani, Niryi kan ab, a ner ab sun bitinyi ara mar ibdankwandurum ati, sun mar irdandam kibdeibsin. Ani, kwatima kan yaldangna ab, a ner deibdoba ab ababyi, sun mar ibdankwaming. Ba, aminda ara a ner deibdoba tentok aryi kwatima kan kisok asi yaniboka kusukwankir. Ba, kanci er yan bumnyok asi si tobkwandim,” ebmou. 16Ura, Er Iya Erebdobnyi biryi a ner asi ato ebmou, “Aminda kan mi mundu boaminyi ani, deibkwandim ara Niryi mambul weik kibdeibkinyi ba, mambul weik doboka u weik yibkwankir. Uca, mi sirya deibminyi talak ara kan akenyi bisi, ‘Ni u weik yiranir ati, kanda ni li,’ kum ebkwandim. Eda, kan akenyi biryi ebci to akwe luknubdongoboka, teleb-teleb kibdeibkwandum,” ebmou. 17Ura, Er Imtam Erebdobnyi biryi yumanyi bisi ato ebmou, “Kanci, kan ner uram kekeboka, Niryi, ‘A co du ara dakoka yina mem,’ ebse co du asi dakoka karebmakir ba, yibmarim. Ati, tukwe ababyi subne. Ba, a tukwe ara talyi er yuk betekoka kum abkwande. Eda, kanci mambul asa aryi il dobminyi akwe ara yina yibde kubkwandim,” ebmou. 18“Tiling-tilinga ab, murmuta ab aryi kan koubdobminyi dinyi asi orminingnanci ba, mambul doboka il dobminyi ura, yibde kubkwandim. 19Ani, kan mambul asa aryi tukwe asi il dobdobminya deici aryi yina yibde kuraminyi ani, tukwe aryi doboka mining kan kiknibkise tukwe dikum akwe tubto wengbinkwandim. Ara, kanda tukwe aryi doboka kiknibkise deyok aryi tubto tukwe dam akwe tamuboka tukwe borbosa dankwandim!” ebmou.
20Ura, yumanyi si Adam biryi er ner si, “Hawa,” eboka si dobmou. Ara, “Ninyi yala kubde binkwaminga nirya sun kwin kibkwaming,” tenen ati, “Hawa,” eboka si dobmou.
21Ura, Er Iya Erebdobnyi biryi Adam ab, er ner Hawa ab sun nong ongon dinyi ara bisam domba kala aryi kikniboka ongobdeibmou.
22Ongobdeibmou ura, Er Imtam Erebdobnyi biryi ato ebmou, “Nunci, malyi dinyi babyi, teleb dinyi babyi bingnamib. Ati, ukura ninyi sunbabyi malyi dinyi ab teleb dinyi ab bikmaring. A deyok aryi sangkuna tubto a kam kun co du dakoka yibdingingnyi asi iya kam kubde biringnyei,” ebmou. 23Ura, Er Imtam Erebdobnyi biryi a nang bitinyi asi yuma kikniboka kaiamwe mutuk Eden dam aryi yakdonokmou. Ba, sun kunkwandei mutuk ara minob er kiknibkwamuryi, tukwe doamwe dam asi mambul asa il dobde kunkwamwe ati yakdonokmou. 24Ba, a nang bitinyi yaletam kuboka yakdonokmou. Ba, minob kiknibmou mutuk Eden dam ara mem co koubdeiamwe mutuk dam tamuboka tubto wengbinman kum kubmou. Ara, Er Imtamnyi dam kuboka kalingna nang malaikat bitinyi uk lengkerengmou ya douboka tikmarei. Ara, bisik bublan dam binton dinatam-binton dinatam tikmarei. Akiryi a co kouamwe mutuk dam tamuboka wengbinman kumto kubmou.
Attualmente Selezionati:
Kejadian Uram 3: MTG
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
@LAI 2007 (New Testament), @LAI2022 (Old and New Testament)
