Kutachika 7
7
1Yehova wamwilili Nowa, nindi Inzaŋa wiŋili muwatu nineyi niantu #Heb 11:7; 1 Pet 3:20akwitala deyi ejima; muloŋa eyi yeyi inamoni kuloŋa kumesu ami hadi antu amakonu.
2Wakatambuli anyama ejima #Lev 11:1-31; Kuhit 14:3-20akadi majilu atanu nayedi awamayala, atanu nayedi awambanda; nianyama amajilu, ayedi, ayedi, amayala nawambanda.
3Niatuda amuluzwizu, awa atanu nayedi, awa atanu nayedi, amayala nawambanda; kulonda kusaŋula nachu mbutu mwahita iseki dejima.
4Muloŋa kunashali mafuku atanu nayedi, nakanokesha nvula hamaseki mafuku makumi awana (40) nimwaana niwufuku; yuma yayumi yejima yinelili nakayijilumuna hewulu damaseki ji-i.
5Nowa welili mwejima mwamulejeliyi Yehova.
6Nowa washikili munyaka nkulakaji jitanu nayimu (600) henjili dibaji damenji hamaseki.
7Nowa weŋilili muwatu, niŋodindi, nianyanindi, niaŋodijawu, nansaŋu yamenji adibaji.
8Nianyama atela kulambulewa, nianyama abula kutela, niatuda, niyuma yazalalaŋa hamaseki,
9eŋilili muwatu mwadiŋi Nowa, awa ayedi, awa ayedi, niweyala, niwamumbanda, mwomwamulejeluwu Nowa kudi Nzambi.
10Chimwahitili mafuku atanu nayedi menji adibaji enza nikwinza hamaseki.
11Wowu mwaka washikiliyi Nowa munyaka nkulakaji jitanu nayimu (600), mukakweji kamuchiyedi, mwifuku damwikumi nakatanu nakayedi (17) dakakweji, dodena ifuku odu tuseloki twamumanyiŋi amaneni twejima twabusikili, niyenzelu yamenji amwiwulu yenzulukili.
12Nvula yanokeli hamaseki mafuku makumi awana (40) nimwaana niwufuku.
13Dena ifuku odu dodeŋililuwu muwatu aNowa, naShemi, naHami, naYafweta, wowu anyana kaNowa, niaŋodijawu niŋodaNowa, hamu nawu;
14niwena, nianyama ejima mwahita nyichidi yawu, niayimuna ejima mwahita nyichidi yawu, niyuma yazalalaŋa hamaseki mwahita nyichidi yawu, niatuda ejima mwahita nyichidi yawu, niejima akweti mpuula mwahita nyichidi yawu.
15Eŋilili muwatu mwadiŋiyi Nowa, awa ayedi, awa ayedi, ejima ahandaŋa nakwona.
16Awa eŋilili, eŋilili niweyala niwamumbanda awahandaŋa ejima, mwomwamulejeliyi Nzambi; Yehova hakumwenzelelamu.
17Dibaji dadiŋi heseki mafuku makumi awana (40), menji hiyakuvula, anyamuna niwatu hewulu, watu wunyamuka nikunyamuka heseki.
18Menji asweja nikusweja, hiyakuvula nankashi hamaseki; watu hiwukwenda nihamenji.
19Menji asweja nikusweja chakubadika hama hamaseki; mpidi jajilehi jejima jadiŋi mwishina dewulu jijimina nikujimina mumenji wi-i.
20Menji apandakeni mapidi najimita 7.
21Ejima akweti wumi, endeli hewulu damaseki afwili, niatuda, niayimuna, nianyama, niayuma azalalaŋa heseki, niantu ejima.
22Ejima adiŋi hamaseki awuma, akweti muuya wawumi, afwili.
23Yuma yejima yikweti wumi yadiŋi hewulu deseki yajilili ji-i, niantu, niayimuna, niyuma yazalalaŋa, niatuda amuluzwizu; ajilili hamaseki to-o; kwasheli kwaNowa hohu, niadiŋiyi nawu muwatu.
24Menji aswejeli hamaseki mafuku nkulakaji namafuku makumi atanu (150).
Attualmente Selezionati:
Kutachika 7: MWW04
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
The Holy Bible in Lunda Ndembu © United Bible Societies, 2003.
