यहुन्ना 2
2
गलीलेरै काना नगरा मझ पेहिला चमत्कार
1फिरी त्रीं धियाड़ि गलील प्रदेशेरै काना नगरा मझ अक ब्याह थ्या, जैस ब्याहा मझ यीशुरी माँ बि यौउरी थी। 2यीशु जां तेसेरै चैलै बि तैस ब्याहा मझ धाम करि शदाउरै थ्यै। 3जेख्णी अंगूरी रस मुकणा लगा, ता यीशुरी मयि तैस सिंउ बौलु, “ऐन्हां किनि अबै हौरा रस ना।” 4यीशु तेसनी बौलु, “हे मयि ऐ तु मूंनी केईनी बोलती आ? मसीहरै रूपा मझ हालै तेईनी मूं जांणनैरा मिंडा टैंम ना यौउरा।” 5पण तेसैरी मयि दासानि बौलु, “जिहीं यीशु तुहां सिंउ कांननी बोलता, तुवे तिहियें करै।” 6तैठि यहूदिया केरी शुद्ध कांनेरी रीतिरै अनुसार घौड़ेरै छी घड़ै भरौरै थ्यै जैन्हां मझ कम-सै-कम अस्सिया किना लैकरी अक शाउ बीहा लीटरा तेईनी पांणी लगींथियु। 7यीशु सभनियांं दासानि बौलु, “सभनियांं घड़ा मझ पांणी भरी देया।” तैन्हैं सारै घड़ै फुल भरी दित्तै। 8फिरी तेनी तैन्हांं दासा सिंउ बौलु, “अबै थोड़ु तियु पांणी भरी करि धाम बणांणारै शांणा किनि लैई गहा।” जां तैन्हैं तेसैरू बोलोरूवै कियु। 9जेख्णी तेनी शांणै सै पांणी चखु, जै अंगूरी रस बंणी गियौरू थिउ, तैस पता ना थ्या कि सै अंगूरी रस तैन्हैं कोठां किना अंणा। पण तैन्हांं दासा पता थ्या जैन्हैं पाणी कढौरू थिउ, तां तेनी शांणै नवाँ लाड़ा शदा जां तेसनी बौलु, 10“हर मैहणु पेहिलै अच्छा अंगूरी रस दींता, जां जेख्णी मेहमान पी करि रजि गांहथै, ता तेठां किना बाद जै हौरा अंगूरी रस दींतै सै त्यौता बढ़िया ना भूंता; पण तीं बढ़िया अंगूरी रस हालै-तेईनी संम्भाय रखौरा।” 11यीशु गलील प्रदेशेरै काना नगरा मझ अपड़ा ऐ पेहिला चमत्कार लुहाय करि अपड़ि महिमा प्रकट केयि, जां तेसेरै चैलै तैस पन विश्वास केया कि सैहै मसीह आ। 12तेठां किना बाद यीशु जां तेसैरी माँ जां तेसेरै भाई जां तेसेरै चैलै कफरनहूम शहरा मझ ग्यै, जां तैठि कुछ धियाड़ि रुकै।
मंदरा किना व्यापारी कढियूंणै
(मत्ती 21:12-13; मरकुस. 11:15-17; लूका 19:45-46)
13यहूदिया केरा फसहैरा त्यौव्हार नीड़ थ्या, तां यीशु यरूशलेम शहरानि ग्या। 14तैठि परमेश्वरेरै मंदरेरै आंगणा मझ यीशु तकाउ, कि मैहणुवें दाँदा, भ्रैडा जां कबूतरा बैचणेरै तेईनी दुकानि लाउरी थी, जां सिक्कै बदलणार व्यापारी तैठि अपड़ि कुर्सी ला बेठोरै थ्यै। 15फिरी यीशु रशा बंणा करि सारिया भ्रैडा जां दाँदा पन बज्जी करि सभ परमेश्वरेरै मंदरा किना भेईर कढि लायि, जां सिक्कै बदलणार व्यापारिया केरै सिक्कै उटका दित्तै जां तेन्हैरी कुर्सी पकड़ी करि लडया दित्ती, 16जां कबूतर बैचणारानि यीशु बौलु, “ऐन्हां ऐठां किना भेईनि लै गहा जां मिंडै बाबेरू घरा तुवे बाजार मेईं बंणा।” 17फिरी तेसेरै चैला याद यैई कि पवित्र शास्त्रा मझ लिखोरू आ, “तिंडै घरेरै तेईनी मिंडी भक्ति मिंडै मंना मझ आगी सैयि जअति।” 18ऐत पन यहूदी अगुवे यीशु सिंउ बौलु, “तु जै ऐ कम काता, ता तु असुनि कितु चिन्ह लुहाअता?” 19फिरी यीशु तेन्हांनि उत्तर दिता, “ऐस मंदरा छिढाहि देया ता मूं ऐ मंदर त्रियां धियाड़िया मझ दुबारे बंणा दींणा।” 20ऐत पन यहूदी अगुवे बोलणा लगै, “ऐस मंदरा बणांणनि 36 साल लगोरै अत्तै जां तु ऐस त्रियां धियाड़िया मझ बंणाणैरी गल काता!” 21पण अपड़ि गलै मझ यीशु जैस मंदरैरा जिकर केईथ्या सै तेसैरा अपड़ा शरीर थ्या। 22पण जेख्णी सै मुड़दा मझांं दुबारे जींतिया ता तेसेरै चैलानि चैता या कि यीशु ऐ बोलोरू थियु जां तेन्हांनि पवित्र शास्त्र जै मसीहरै मरना किना बाद फिरी दुबारे जींतियुंणेरै बारै मझ शुणांता, यीशुरिये गलै पन विश्वास केया
यीशु मैहणुरै मंना जांणता
23जेख्णी सै यरूशलेम शहरा मझ फसहेरै त्यौव्हारा मझ थ्या, ता बड़ै सारै मैहणुवें, जैन्हां चिन्हां केरै बारै मझ सै शुणांईथ्या, सै तका करि मैहणुवें यीशु पन विश्वास केया। 24पण यीशु तैन्हांं पन भरौसा ना केया कि तैन्हैं तैस पन विश्वास केया, केईनी कि तैस मैहणुवां केरी आदतिरा पता थ्या। 25जां यीशु ऐस गलेरी कौ जरूरत ना थी कि कौ तैस किनि अईछी करि मैहणुवां केरै बारै मझ शुणांईया, केईनी कि मैहणुवां केरै मंना मझ कितु आ सै तैस पता थ्या।
Attualmente Selezionati:
यहुन्ना 2: CDJNT
Evidenzia
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
