Juan 8
8
Ixoq chi kumin rib' ru' jun chik achi chi k'ulinaq ti ru'
1Xwiri i Jesús x-e che i jyub' Olivos, 2chukab' ij, are xsaqirik x-e chik prachoch i Dios, are uri i winaq xetejeb' pan ru', Ire xkub'i chuk'utik utzij i Dios chke.
3O jujun chke i tijonelab' re i atb'al tzij xaq i aj fariseo xkik'am b'i jun ixoq chwach i Jesús man xkiriqo chi ktijin chu'anik umak ru' jun achi chi rachijil taj. Are uri xkiya chkixol i winaq, 4xaq xkib'ij che i Jesús:
—Tijonel, i ixoqi xqariqo chi ktijin chu'anik umak ru' jun achi chi rachijil taj. 5I atb'al tzij chi uya'om kan mam Moisés chqe kub'ij chi jun ixoq pacha ire le lik kkamsax ni che ab'aj. ¿Wach kab'ij yet che ile? —Xecha.
6Xkib'ij ile man kkik'amb'ej upam i Jesús xaq tzukb'al umak kki'ano. Xwiri i Jesús xch'uki qaj chwach ulew xaq xok che i tz'ib'anik ru' uwi u'ab'. 7Ike lik kkimayij ti utz'onoxik che i Jesús, rumali Ire xtak'i anoq, xub'ij chke:
—We o jun chiwe yix chi nti umak, chupuk'u i nab'e ab'aj che i ixoq le —xcha.
8Are uri i Jesús xch'uki chik i xok chik che i tz'ib'anik chwach ulew. 9I winaq are xkita ile, chkijujunal xkijeq enam, nab'e xkitikb'a enam rijab'. I Jesús are xrilo chi utukel chik Ire ru' ixoq xekanajik, 10are uri xwalij anoq i xutz'onoj che:
—Ixoq, ¿Ipa je o wi i winaq chi kekojow te amak? ¿Mijun xu'at tzij pawi? —Xcha.
11Are uri i ixoq xula' uwach che:
—Nim laj winaq, lik mijun.
I Jesús xub'ij che:
—Xaq yin kin-at ti tzij pawi. Wo'or, jat xwiri matmakun chik.
I Jesús are i saq re uwach i jyub' ta'aj
12I Jesús xub'ij chik chke i winaq:
—Are Yin in saq chke i winaq re uwach i jyub' ta'aj. Pachin kterej chwij kuriq ni saq chi kuya k'aslemal xaq lik kb'in ti uri pa equm.
13Are uri aj fariseo xkib'ij che:
—Yet xa kalap awib' atukel, rumali ronojel ni'pa i kab'ij le nti uchak.
14I Jesús xula' uwach chke:
—Ni'pa i kinlapo lik o uchak, tupu yin kinlap wib' man weta'am ipa in petnaq wi xaq ipa kin-e wi; xwiri yix iweta'am taj. 15Yix ki'at tzij puwi jun winaq pacha kinojb'al i to' winaq aj chwach i jyub' ta'aj; xwiri Yin mijun kin-at tzij puwi; 16xwiri we kin-at tzij puwi jun winaq lik ru' i saq laj tzij uri kin-an wi, man intukel taj kin-at tzij, junam ru' i Ta chi in taqawnaq loq kqa'an i atb'al tzij. 17Chupam i'atb'al tzij yix tz'ib'tal i tziji: We o keb' winaq xaqjun kkib'ij wach i kilom, kkoj uri chke wach kkib'ij. 18Saq laj tzij, Yin kinlap wib' intukel xaq i Ta chi xintaqaw loq klapan chwij Yin, ke'eloq chi oj keb' i xaqjun kqab'ij; keje ile xub'ij i Jesús chke.
19Are uri aj fariseo xkitz'onoj che:
—¿Ipa o wi Aqajaw?
I Jesús xula' uwach chke:
—Yix iweta'am ti inwach yin, etelechiki iweta'am uwach Inqajaw. Wetene yix iweta'am inwach yin xaq iweta'am uri uwach Inqajaw —xcha.
20I Jesús keje ile xub'ij are ktijin che i k'utunik chila prachoch i Dios, chila ipa o wi i kaxa re i molb'al pwaq. Xwiri mijun xukowij rib' chuchapik man k'amaja kuriq i ij chi ch'iktal chrij rumal i Dios.
Ipa kin-e wi Yin, yix kix-e ti chila
21Are uri i Jesús xub'ij chik chke:
—Yin kin-ek, xwiri are in enaq chik te'uri kinitzukuj na, saq laj tzij lik kixkam ni chupam imak. Ipa kin-e wi yin, kixok ti yix chila —xcha.
22Are uri aj Judío xkib'ij chkiwach:
—¿Xatab'a kuch'ob' ukamsaxik rib' utukel, chi rumal kub'ij chqe chi ipa k-e wi ire kojok ti yoj chila? —Xecha.
23I Jesús xub'ij chke:
—Yix ix aj chwach ulew, xwiri Yin in aj chikaj, yix ix aj chwach i jyub' ta'aj xwiri Yin in aj chi taj. 24Rumali xinb'ij chiwe chi kixkam ni chupam imak. Man we kikoj taj chi Yin, lik in are Yin, kixkam ni uri chupam imak —keje ile xub'ij i Jesús chke.
25Are uri xkitz'onoj che i Jesús:
—¿At pachin yet?
I Jesús xula' uwach chke:
—Pacha xinlap chiwe nab'e. 26Xwiri Yin, lik k'i kwaj ub'ixkil chiwe xaq u'atik tzij piwi, xwiri wo'or, xwi kinb'ij chke i winaq wach intom che i Jun chi in taqawnaq loq chi lik saq laj tzij —xcha.
27Xwiri ike xkita ti ub'e chi are i Ta kulapo. 28Rumali i Jesús xub'ij chke:
—Yix are kitz'aw uk'ojol i achi aj chikaj chwach i krus, kiwetamaj na chi Yin, lik in are Yin chi Xinalaxoq chwach Ulew pacha Winaq, lik nti kin-ano to' pacha inrayijb'al Yin, xwi kinb'ij wach uk'utum i Ta chwe. 29Man i jun chi xintaqaw loq lik o wu'; Inqajaw in ro'tam ti kan intukel, man yin arewi kin-ano pacha kraj Ire —xcha.
30I Jesús are xub'ij i tzij le, lik je k'i i winaq xkikojo.
I je rak'al i Dios xaq i je ximtal rumal i mak atzalal
31I Jesús xub'ij chke aj Judío chi xekojon che Ire:
—We yix lik kixkojon che intzij, lik saq laj tzij uri kixu'on ni intijoxelab'. 32Lik kiwetamaj ni i saq laj tzij xaq i saq laj tzij le kixukir na —keje ile xub'ij i Jesús chke.
33Are uri ike xkila' uwach che i Jesús:
—Yoj oj umuq uxikin kan mam Abraham; lik nti jun oj uximom. ¿B'uchak uri kab'ij yet chqe chi kojkirtaj na? —Keje ile xkib'ij che i Jesús.
34I Jesús xub'ij chke:
—Lik saq laj tzij kinb'ij chiwe: Konojel i winaq chi kemakunik, lik je ximtal uri rumal i mak atzalal. 35Jun mokom junam ti uwach ru' jun rak'al rajaw ja, man i mokom xa ajlam ij o ru' ja xwiri alk'uwalxel arewi o ru' ja. 36I uk'ojol i Dios we kixukiro, lik saq laj tzij uri chi kixkirtaj na. 37Yin weta'am chi yix ix umuq uxikin kan mam Abraham, xwiri kiwaj inkamsaxik man kiwaj ti kixkojon che intzij. 38Yin xwi kinb'ij wach uk'utum Inqajaw chwe, xaq keje yix, chi'ana pacha ub'im Iqajaw chiwe —keje ile xub'ij i Jesús chke.
39Are uri ike xkib'ij che i Jesús:
—I qaqajaw yoj are mam Abraham. Xwiri i Jesús xula' uwach chke: —Wetene lik saq laj tzij chi yix ix rak'al mam Abraham, ki'an neri wach taq xu'an ire. 40Tupu inb'im i saq laj tzij chiwe, chi lik are i Dios uk'utum chwe wach i kin-ano, xwiri yix lik kiwaj inkamsaxik. I mam Abraham lik xu'an ti pacha i ki'an yix le. 41Yix, lik keje ki'ano pacha ku'an iqajaw —xcha.
Ike xkib'ij:
—Yoj oj ti keje pacha i winaq chi keta'am taj pachin i kiqajaw; man lik xa jun Qaqajaw olik chi are i Dios.
42I Jesús xub'ij chke:
—Wetene qatzij chi are i Dios iqajaw, lik k'ax te'eqi kinina'o, man yin chila ru' i Dios in petnaq wi rumali in o chi. Rumal ti taq innojb'al in k'unnaq man lik are i Dios in taqawnaq loq. 43¿B'uchak chi kimaj ti usuk' wach i kinb'ij chiwe? Moq xa rumal kiwaj ti kita intzij. 44Man iqajaw yix are i Itzel, yix ix re ire, rumali kiwaj u'anik pacha urayijb'al ire. I Itzel le lik ajkamsanel chuxeb'al li ij saq. Ire le lik kub'ij ti i saq laj tzij. Are ku'an i t'oronik, lik kuk'utu chi ajt'oronel, man lik ajt'oronel xaq lik are ire uqajaw i t'oronik. 45Xwiri yin kinb'ij i saq laj tzij, rumali yix kixkojon ti chwe. 46¿Pachin jun chiwe yix kub'ij chwe wach inmak yin in-anom? I Yin we kinb'ij i saq laj tzij, ¿B'uchak uri kixkojon ti chwe? 47Jun winaq we re i Dios, lik kraj utayik utziji i Dios; xwiri yix kiwaj ti utayik man ix re ti i Dios —xcha i Jesús chke.
I Cristo lik ax o wi chuxe'el i mam Abraham
48Are uri aj Judío xkib'ij che i Jesús:
—Lik saq laj tzij xqab'ij chawe chi at aj Samaria xaq oknaq itzel tew chawe; xecha.
49I Jesús xula' uwach chke:
—Yin, nti taq itzel tew oknaq chwe. Are i kin-ano, kinkoj u'ij Inqajaw. Xwiri yix kiqajsaj in-ij yin. 50Yin kintzukuj ti ukojik in-ij; xwiri i Ta chikaj kraj chi koksax in-ij kumal i winaq. Are Ire le ku'at tzij pkiwi i kinkikoj taj. 51Lik kinsaqij chiwe, jun we kkojon che intzij lik kkam taj —xcha.
52Are uri aj Judío xkila' uwach che:
—Wo'or lik kqakojo chi o itzel tew chawe. Man mam Abraham xaq konojel i profeta xekamik, ¿B'uchak uri kab'ij yet le chqe chi pachin jun kkojon che atzij lik kkam taj? 53¿Xatab'a lik mas nim a'ij yet chwach etz qaqajaw mam Abraham? Ire xkamik xaq keje xki'an konojel i profeta. ¿Kach'ob' wa yet ile chi lik mas nim a'ij? —Keje ile xkib'ij che i Jesús.
54I Jesús xula' uwach chke:
—Yin, we kinkoj in-ij intukel, i in-ij le lik nti uchak uri. Xwiri are kkojow in-ij are Inqajaw, chi xaq kib'ij yix chi are i-Dios yix. 55Xwiri yix iweta'am ti uwach. Yin lik weta'am uwach; i we kinb'ij chi weta'am ti uwach xa in ajt'oronel uri pacha yix. Xwiri lik saq laj tzij, yin weta'am uwach xaq lik kinkojon che utzij. 56I mam Abraham, chi iwatit i mam yix, ire reta'am ujer chi yin kink'un ni chwach i jyub' ta'aj; lik xkikot ire rumal. Xril ire chi kink'unik, i lik xkikot rumal. Keje ile xub'ij i Jesús chke.
57Are uri i aj Judío xkib'ij che i Jesús:
—Yet k'amaja lajuj kawinaq (50) junab' chawe ¿B'uchak uri kab'ij chi awilom uwach qamam, mam Abraham?
58I Jesús xula' uwach chke:
—Lik saq laj tzij kinb'ij chiwe: Chi yin lik ax in o wi chwach mam Abraham —xcha.
59Are uri aj Judío xkiyak ab'aj re kkipuk' te'eq che i Jesús, xwiri i Jesús xruwaj rib' chkixol i winaq i xel prachoch i Dios.
Attualmente Selezionati:
Juan 8: ACHICUB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© Biblia Achí de Cubulco, Derechos reservados de Sociedad Bíblica de Guatemala
