Juan 6

Jesús xeutzuq lajujwinaq kab'lajujmo' (5,000) winaq

1Chrijil ile i Jesús x-e ch'aqap che i semelik ya Galilea chi xaq Tiberias kb'ix che. 2Lik je k'i i winaq xeterej chrij man xkil i nimaq taq il chi xu'ano are xerutzirsaj iwab'ib'. 3Te'uri i Jesús xel b'i junam ku' utijoxelab' puwi jun jyub', chila xekub'i wi. 4Che taq i ij le ya knaqajab' i nima'ij Pascua chi nima'ij ke aj Judío. 5I Jesús are xeril uk'iyal winaq chi je teren chrij. Are uri xub'ij che ma Felipe:

—¿Ipa kqalo' wi wa re trigo re tzuqb'al ke uk'iyal winaq le? —Xcha.

6I Jesús xub'ij ile che ma Felipe cha ilb'al re wach kub'ij, man Ire uch'ob'om chik wach ku'ano. 7Are uri ma Felipe xub'ij che:

—Mitene wajxaqib' ik' rajil jun ajchak ktiki ti chulo'ik i wa re trigo re tzuqb'al ke uk'iyal winaq le —xcha.

8Are uri ma Andrés, chi are jun chik chke utijoxelab' i Jesús, chi katz kicha' kib' ru' ma Simón Pedro, xub'ij che i Jesús:

9—O jun ak'al waral chi o jo'ob' wa re cebada xaq keb' kar ru'. Xwiri ¿Xatab'a keu'on uk'iyal winaq ile? —Xcha.

10I Jesús xub'ij chke:

—Chib'ij chke konojel i winaq chi chekuloq.

Are uri xekub'i konojel i winaq; kolo je lajujwinaq kab'lajujmo' (5,000) achiyab' je o chila. 11Chrijil chik ile i Jesús xuk'am i wa re trigo, xutioxij che i Dios, te'uri xuya chke ni'pa je kul chila. Xaq keje ile xu'an che i kar, xujach b'i chke i winaq chrij ni'pa i kkaj. 12Are lik je nojnaq chik konojel i winaq, i Jesús xub'ij chke utijoxelab':

—Chimolo ronojel ni'pa i ch'aqa taq chi xk'is taj, man utz taj we to' kqa'an k'ax che —xcha.

13Are uri ike xkimol uchi' ni'pa i ch'aqa taq chi xk'is taj, lik xnoj kab'lajuj chikach che i jo'ob' wa re cebada. 14I winaq are xkil i nim laj il le chi xu'an i Jesús, are uri xkib'ij:

—Lik saq laj tzij chi Ire le lik are i profeta chi qoy-em uk'unik chwach i jyub' ta'aj —xecha.

15Xwiri i Jesús xunab'ej chi i winaq kkaj kki'an pen uk'amik b'ik re ajawinel pkiwi, are uri xel chub'i chkixol, i xel b'i puwi i jyub', man kraj olem utukel.

I Jesús kb'in puwi i ya

16Are xok a'ab' i utijoxelab' i Jesús xeqaj li chuchi' i semelik ya. 17Are uri xe'ok b'i chupam jun barco xaq xkimaj b'i kib'e chwi i semelik ya, enam ke pa tinimit Capernaum. Are xok a'ab' xaq lik equm chik i Jesús k'amaja kupon ku'. 18Are uri xpe jun nim laj tew puwi i semelik ya chi lik kjuk'uk' puwi xaq lik nim ucho'ab'. 19Are je b'innaq chik kolo jo'ob' o waqib' kilómetro chwi ya, are uri xaqte'et xkilo chi i Jesús ktijin utejeb'ik ru' i barco; lik kb'in chwi ya. Are xkilo, lik xkixij kib'. 20Xwiri i Jesús xub'ij chke:

—¡Mixij iwib', in are Yin! —Xcha.

21Are uri ike, lik juntir xkiya che chi xok ku' pa barco, xaq juntir xeupon che i ulew ipa enam wi ke.

I winaq kkitzukuj i Jesús

22Chukab' ij i winaq chi je o kan ch'aqa semelik ya, xkinab'ej chi utijoxelab' i Jesús xe'e chupam i barco, xwiri i Jesús x-e ti ku'. Xkinab'ej ile man xa jun barco o te'eq chila. 23Are uri xeupon jub'an chik barco chila chi kipetik pa tinimit Tiberias, naqaj che i k'ijib'al ipa xkitij wi wa re trigo chi are xutioxij i Jesús che i Dios chuxe'el utijawik. 24I winaq are xkilo chi nti Jesús chila xaq je nti utijoxelab', are uri xe'an b'i pa barco, xe'e pa tinimit Capernaum chutzukuxik i Jesús.

I Jesús are i wa chi kuya i k'aslemal

25Are xeupon i winaq ch'aqa semelik ya xkiriq i Jesús, are uri xkitz'onoj che:

—Tijonel, ¿Junpa xatk'un waral?

26I Jesús xub'ij chke:

—Saq laj tzij kinb'ij chiwe, chi yix kinitzukuj xa rumal xinya iwa lik k'a ipa xixnoj wi, rumal ti ukojik i nimaq taq il chi xiwilo chi xin-ano. 27Mixk'achir che i chak re wach taq kitijo, man ile xa kk'isik; are utz kixk'achir che i chak chi kuya ik'aslemal chi nti uk'isik xaq k-e ij saq chrij; iri are i k'aslemal chi kuya ni i pacha Winaq chi Xolalaxoq chwach Ulew; man i Dios chi Qaqajaw, ukojom jun ilb'al re che.

28Are uri xkitz'onoj che:

—¿Wach rajwaxik kqa'ano re kqa'an i chak chi kraj i Dios kqa'ano?

29I Jesús xula' uwach chke:

—Are kraj i Dios chi ki'ano, are lik chikojo pik'ux i Jun chi utaqom li ire.

30Are uri xkitz'onoj che:

—¿Wach ilb'al re kaya chqe man keje ile are kqilo katqakojo, wach taq i ka'ano? 31I qatit qamam ujer, are je o pa tz'inilik jyub' chaqij, xkitij i maná#6.31 Éxodo 16.4., man keje ile kub'ij uwuj i Dios: “I Dios xuya i wa aj chikaj chke.”

32I Jesús xula' uwach chke:

—Lik saq laj tzij kinb'ij chiwe chi are ti mam Moisés xyaw i wa aj chikaj chke iwatit imam. Are Inqajaw kyaw i saqil laj wa aj chikaj. 33Man i wa chi kuya i Dios, are petnaq chikaj, xaq are i wa chi kuya i saqil k'aslemal chke i winaq chwach i jyub' ta'aj.

34Are uri ike xkib'ij che:

—Ajwal, “lik arewi chaya i wa le chqe”; xecha.

35I Jesús xub'ij chik chke:

—Yin are in saqil wa chi kuya k'aslemal, pachin kk'un wu' lik kpe ti chik unumik; xaq pachin i jun chi kinukoj puk'ux, lik kpe ti chik uk'atik. 36Xwiri pacha inb'im chik chiwe, yix lik kinikoj taj tupu iwilom chik inwach, 37konojel ni'pa keuya Inqajaw chwe, kek'un ni uri wu'; xaq konojel ni'pa kek'un wu' yin, lik kewesaj tu b'ik. 38Yin in qajnaq li chikaj chu'anik ti pacha i to' kwaj yin; in petnaq chu'anik pacha kraj Inqajaw chi in taqawnaq loq. 39Man urayijb'al i Jun chi xintaqaw loq: Are i mijun kinsach yin chke ni'pa i je uya'om ire chwe; man lik keinwalijsaj ni pa k'isb'al ij. 40Man urayijb'al Inqajaw are iri: Konojel ni'pa kkil Uk'ojol i Dios xaq lik kkikojo, kya' ni kik'aslemal chi nti uk'isik. Xaq yin keinwalijsaj ni pa k'isb'al ij —keje ile xub'ij i Jesús.

41Rumal i tzij chi xub'ij i Jesús le, i aj Judío xpe koywal che, rumali xe'ok chub'ixkil k'ax laj taq tzij che, rumal xub'ij chi are ire saqil wa chi xqaj li chikaj. 42Xkib'ij:

—¿Are ti b'awa i Jesús ile chi uk'ojol ma José? Lik qeta'am kiwach uqajaw uchuch. ¿B'uchak uri kub'ij chi qajnaq li chikaj?

43Are uri i Jesús xub'ij chke:

—Chimayij inlapik chiwach yix. 44Man nti jun ktiki che i k'unik wu' Yin, we are ti Inqajaw kk'amaw loq chi xintaqaw li Yin. Xaq Yin kink'unsaj saq chwach pa k'isb'al ij. 45Chupam i wuj chi kitz'ib'am kan profeta kub'ij: “I Dios keutijoj ni konojel”. Rumali chi konojel ni'pa kkita utzij i Ta lik kenaw che; xaq kek'un uri wu' yin.

46Mijun rilom uwach i Ta, xwi i Jun chi petnaq chila ru' Ire rilom uwach. 47Lik saq laj tzij kinb'ij chiwe: Pachin jun chi kukojo xaq kukub'a uk'ux che i Dios, kya' ni uk'aslemal chi nti uk'isik. 48Yin in are i wa re i k'aslemal. 49I iwatit imam yix xkitij i maná chila pa tz'inilik jyub' chaqij, xwiri xekamik. 50Xwiri yin kinlapan chrij i wa chi kqaj li chikaj, pachin kutij i wa le, lik kkam taj. 51Yin in are i wa k'aslik chi qajnaq li chikaj, pachin jun kutij i wa le lik k-e ij saq uri chrij uk'aslemal. I wa chi kinya yin are inch'akul. Kinya ni inch'akul le rumal kik'aslemal i winaq chwach i jyub' ta'aj.

52Are uri i aj Judío xe'ok chuchapik kib' che i tzij chkiwach, xkib'ij:

—¿Wach u'ankil ile chi lik kuya taq uch'akul chqe re kqatijo?

53I Jesús xub'ij chke:

—Lik saq laj tzij kinb'ij chiwe: We kitij ti uch'akul i pacha Winaq chi Xolalaxoq chwach Ulew, xaq we kitu' ti ukik'el, lik nti ik'aslemal. 54Pachin jun kutij inch'akul xaq kutu' inkik'el, lik o uk'aslemal uri chi nti uk'isik xaq kink'unsaj saq chwach pa k'isb'al ij. 55Man inch'akul lik are i saqil wa xaq inkik'el lik are i saqil ya. 56Pachin jun kutij inch'akul xaq kutu' inkik'el, lik junam uri uk'aslemal wu' Yin, xaq ink'aslemal Yin junam ru' ire. 57I Ta chi xinutaq loq, lik o uk'aslemal saqil, rumal Ire ink'as Yin. Xaq keje ile ke'eloq pachin jun kutij inch'akul, lik o uri uk'aslemal wu' Yin. 58I wa chi kinb'ij, are i wa chi qajnaq li chikaj; i wa ri keje taj pacha i maná chi xkitij iwatit imam yix, chi tupu xkitijo, xwiri xekamik. Xwiri pachin jun kutij i wa ri lik k-e ij saq uri chrij uk'aslemal.

59I Jesús xu'an i k'utuniki pa ja re molb'al ib' ke i aj judío chila pa tinimit Capernaum.

Tzij re i k'aslemal chi nti uk'isik

60I je teren chrij i Jesús are xkita i k'utuniki, xkib'ij:

—I tzij chi xub'ij le lik k'ax ukojik xaq u'anik. ¿Pachin taq wa kkojon ile che?

61Xwiri i Jesús xunab'ej chi ketijin chub'ixkil k'ax laj taq tzij chrij, rumali xutz'onoj chke:

—¿Tzel xita i tzij chi xinb'ij le? 62¿Wach nawi kqak'ulmaj wetene i pacha Winaq chi Xolalaxoq chwach Ulew, kel chub'i ipa o wi te'eq? 63I qanima are kyaw qak'aslemal, i qach'akul nti uchak. Xaq keje uri i tzij chi xinb'ij yin chiwe, lik are i saqil k'aslemal, xaq Utewal i Dios pik'ux. 64Xwiri, k'a o jujun chiwe yix chi kkikoj taj.

Xwiri i Jesús lik k'a chuxe'el reta'am pachin kkikoj taj xaq pachin i xa keb' upalaj chi kjachaw Ire pu'ab' i kamik. 65Are uri i Jesús xub'ij chik:

—Rumali xinb'ij chiwe chi mijun to' kk'un wu' Yin we Inqajaw kuya ti che kk'unik —xcha.

66Lik che i ij le je k'i chke ni'pa i je terejnaq chrij i Jesús xko'taj kanoq; lik xeterej ti chik chrij. 67Are uri i Jesús xutz'onoj chke i kab'lajuj utijoxelab':

—¿Xaq kiwaj enam yix?

68Xwiri i ma Simón Pedro xub'ij che:

—Ajwal ¿Pachin wa ru' koj-e wi? Man i atzij lik are tzij chi kuya i k'aslemal chi nti uk'isik. 69Yoj ya at qakojom chik; xaq qeta'am chi yet at lo'laj rak'al i Dios —xecha

70I Jesús xula' uwach chke:

—¿Yix ti b'awa ix kab'lajuj chi xixin-ulu yin? Xwiri o jun chiwe yix lik xa itzel —xcha.

71I tzij chi xub'iji, re ma Judas chi uk'ojol ma Simón Iscariote. Man i ma Judas le, tupu are jun chke i kab'lajuj tijoxelab', xwiri xa keb' upalaj man are ire kjachaw che i kamik.

Attualmente Selezionati:

Juan 6: ACHICUB

Evidenziazioni

Copia