Juan 11
11
Ukamik ma Lázaro
1O jun achi iwab', ire le ma Lázaro ub'i chi alaxel chila pa tinimit Betania xaq junam ku' i ranab' ati Mariy xaq ati Marta. 2I ati Mariy le, chi ranab' ma Lázaro chi iwab', are ire xkojow kunb'al muy che i raqan i Ajwal Jesús xaq xuchaqijsaj ru' uwi. 3Keje uri ile, chekeb' ixoqib' le xkitaq ub'ixkil che i Jesús:
—Ajwal, i awamiy chi lik k'ax kana'o lik iwab'.
4I Jesús are xuta ile, xub'ij:
—I yob'il le kamsanel taj, ile xa are ilb'al re u'ij uchomal i Dios xaq keje ile i Uk'ojol i Dios koksax ni u'ij.
5Tupu i Jesús lik k'ax keuna oxib' alk'uwalxelab' le chi ati Marta, ati Mariy xaq ma Lázaro, 6are xb'ix che chi iwab' ma Lázaro, ire k'a xkanaj keb' ij chila ipa o wi. 7Are uri, xub'ij chke utijoxelab':
—Jo tan chik pa tinimit Judea.
8Are uri i utijoxelab' xkib'ij che:
—Tijonel, k'amaja naj ile chi aj Judío xkaj akamsaxik ru' ab'aj ¿Wo'or kawaj tan chik enam chila? —Xecha che.
9I Jesús xub'ij chke:
—¿Nti b'awa kab'lajuj or che i ij? Jun winaq we kb'in pa'ij kutakij ti uri i raqan man k'a saq uwach i jyub' ta'aj. 10Xwiri jun winaq we kb'in cha'ab' kutakij uri raqan man equm.
11Xwi ti la ile, xaq xub'ij chik:
—I qamiy chi ma Lázaro kwarik; rumali kin-e chuk'astaxik.
12Are uri i utijoxelab' xkib'ij che:
—Ajwal, we xa kwarik k'utb'al re uri chi kutzirik —xecha.
13Xwiri, are xraj ub'ixkil i Jesús, chi ma Lázaro kamnaq chik. I utijoxelab' xkich'ob' ike chi xa jik laj waram che man keje ile xub'ij. 14Are uri i Jesús xusaqij ub'ixkil i tzij le chke:
—Chi ma Lázaro kamnaq chik. 15Kinkikotik man chila ti in o wi are xkamik, man keje ile utz ke'el chiwe yix man kikoj na wach i kin-ano. Xwiri jo' chrilik —xcha.
16Are uri ma Tomás, chi ma Yox kb'ix che, xub'ij chke i jub'an chik tijoxelab':
—Xaq jo yoj, man keje ile, kojkam junam ru' ire —xcha.
I Jesús are Ire keuwalijsaj i kamnaq xaq are Ire kyaw i k'aslemal
17Are xupon i Jesús chila pa Betania, o chik kajib' ij che umuqik ma Lázaro. 18I Betania le o naqaj che i Jerusalén kolo jun lew unajtil kixol. 19Lik je k'i chke aj Judío je uponnaq chrilik ati Marta xaq i ati Mariy, re kekipakb'ej jub'i' kib'is rumal ukamik kixib'al. 20I ati Marta are xuta utzijol chi ktijin ruponik i Jesús chila, x-e chuk'ulaxik; xwiri i ati Mariy xkanaj kan ru' ja. 21I ati Marta xub'ij che i Jesús:
—Ajwal, wetene at o chi keje teneri kkam inxib'al. 22Xwiri yin weta'am chi i Dios kuya chawe ronojel ni'pa katz'onoj che.
23Are uri i Jesús xula' uwach che ati Marta:
—I axib'al kk'asi chik.
24I ati Marta xub'ij che:
—Qatzij, weta'am chi inxib'al kwalij chik are kewalij i kamnaq pa k'isb'al ij —xcha.
25Are uri i Jesús xub'ij che:
—Yin keinwalijsaj i kamnaq; xaq Yin in k'aslemal. Pachin kinukojo tupu kamnaq chik kk'un chik saq chwach. 26Xaq keje i jun chi k'a k'aslik we kinukojo, lik kkam ti uri. ¿Kakoj yet iri? —Xcha.
27Are uri ati Marta xub'ij che:
—Kinkojo, Ajwal. Yin lik kinkojo chi yet at Cristo chi at Uk'ojol i Dios; chi kk'un ni chwach i jyub' ta'aj.
I Jesús xo' chila ipa muqtal wi ma Lázaro
28Chrijil chik ub'ixkil ile, te'uri ati Marta x-e chusik'ixik ati Mariy chi xaqjun kiqajaw, ani'al xub'ij che:
—I Tijonel o chi xaq katusik'ij.
29I ati Mariy are xuta ile, are uri xwalij la b'ik, x-e chrilik i Jesús. 30I Jesús k'amaja kok pa tinimit, k'a o chila ipa xk'ulax wi rumal ati Marta. 31I aj Judío chi je o chila chi rachoch ati Mariy chukub'saxik uk'ux, are xkilo chi ati Mariy xel li pa'anem, xeterej li chrij man xkich'ob' ike moqxa x-e che o'ej ipa muqtal wi uxib'al.
32Are xupon ati Mariy chila ipa o wi i Jesús xxuki chwach, xaq xub'ij che:
—Ajwal, wetene at o chi chuxe'el ukamik inxib'al, keje teneri kkamik.
33I Jesús are xril ati Mariy chi ko'ik xaq konojel ni'pa aj Judío, xpe jun nim laj ututik puk'ux.
34Are uri xutz'onoj chke:
—¿Ipa ximuq wi?
Ike xkib'ij che:
—Ajwal, jo chrilik.
35I Jesús xo'ik. 36Are uri aj Judío xkib'ij:
—¡Chiwila pe', lik k'ax kuna ma Lázaro!
37Xwiri o jujun chke ike xkib'ij:
—Ire le chi xutzunsaj i mawach, wetene o chi; ¿Keje teneri kkam ma Lázaro? —Xecha.
Uwalijik i ma Lázaro che i kamik rumal i Jesús
38I Jesús lik k-utut uk'ux, xtejeb' pan ipa muqtal wi ma Lázaro. I jul le lik tz'apim uchi' ru' jun ab'aj. 39I Jesús xub'ij:
—Chiwesaj i ab'aj le. Are uri ati Marta, chi ranab' i kamnaq, xub'ij:
—Ajwal, ile lik chu chik man o chik kajib' ij che ukamik.
40I Jesús xub'ij che ati Marta:
—¿Inb'im ti b'ari chawe we kakojo lik kawil ni nim laj u'ij uchomal i Dios? —Xcha.
41Are uri xkesaj i ab'aj chuchi' i jul. I Jesús xtzun an chikaj, i xub'ij:
—Ta, kintioxij chawe man atom intzij. 42Yin lik weta'am chi Yet arewi kinata, xwiri xinb'ij i tzij le kumal i winaqi chi je o waral, man keje ile lik kkikojo chi Yet xinataq loq —keje ile xub'ij i Jesús.
43Are xb'itaj ile, ko xub'ij i tziji:
—¡Ma Lázaro, chatel li chila!
44Are uri i kamnaq xel li pa jul; yut'tal u'ab', raqan xaq pasim upalaj ru' jun k'ul. I Jesús xub'ij chke:
—Chitoro man kb'inik.
Uyijb'axik uchapik i Jesús
45I aj Judío winaq chi je petnaq ru' i ati Mariy, je k'i xkikub'a kik'ux che i Jesús rumal wach i xkilo. 46Xwiri o jujun chkixol aj Judío xe'e chub'ixkil chke i aj fariseo wach xu'an i Jesús. 47Are uri aj fariseo xaq i kaj-atzil i rajpatan i Dios, xkimol kichi' i jutz'ob'aj unimaqil winaq chi kki'at tzij pkitinimit aj Judío; xkib'ij:
—¿Wach kqa'ano? Man i achi ri lik k'i i nimaq taq il ktijin chu'anik. 48We to' keje ile kqakanaj, konojel i winaq kkikoj ni utzij i achi le. Are uri kek'un i aj atb'al tzij re i tinimit Roma, kkiwulijsaj ni rachoch i Dios xaq kki'an ni uri k'ax che qatinimit —xecha.
49Xwiri o jun chke ike, chi ma Caifás ub'i, chi xaq are atz laj rajpatan i Dios che i junab' le; xub'ij chke:
—¡Yix lik nti iweta'am! 50Yix kich'ob' taj we mas utz ke'eloq chi xa jun achi kkam pkik'exel konojel i winaq, chwach we kekam konojel i winaq re i tinimit —xcha.
51I tzij chi xub'ij ma Caifás le, to' ti xunojij an pujolom, lik ru' i Dios xpe wi ub'ixkil ile; man ire are atz laj rajpatan i Dios che i junab' le. Rumali xub'ij chi lik utz we kkam i Jesús pkik'exel aj Judío. 52Xwi ti kumal i tinimit aj Judío, xaq molb'al kichi' konojel i je rak'al i Dios chi xaipa je o wi chwach i jyub' ta'aj. 53Are uri, chi lik che i ij le i winaq aj Judío chi nimaq kipatan xuriq rib' kitzij chi kkikamsaj i Jesús.
54Rumali i Jesús xmalkat ti chik pa taq b'e chkiwach aj Judío; xel chila pa Judea x-e che jun tinimit chi Efraín ub'i, chuchi' i tz'inilik jyub' chaqij. Chila xkanaj wi ku' utijoxelab'.
55Are ya kuriq ij re i Pascua ke aj Judío, lik je k'i i winaq pa jalajuj taq tinimit xe'e pa Jerusalén anb'al ch'am che kib' chwach i Dios chuxe'el i nima'ij le. 56I aj Judío ketijin chutzukuxik i Jesús chila prachoch i Dios, rumali kkitz'onoj chkiwach:
—¿Wach kich'ob' yix, kk'un nawi pa nima'ij o kk'un taj? —Xecha.
57I aj fariseo xaq i kaj-atzil i rajpatan i Dios, xkib'ij chke i winaq: “We xiwil uwach i Jesús chib'ij chqe man keje ile koj-e chuchapik.” —Xecha.
Attualmente Selezionati:
Juan 11: ACHICUB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© Biblia Achí de Cubulco, Derechos reservados de Sociedad Bíblica de Guatemala
