Hechos 8
8
Koqtaxik i jutzob'aj re i Dios rumal ma Saulo
1I ma Saulo, junam uwach ku' ike chi xekamsaw i ma Esteban. Che i ij le chi xkamsax ma Esteban, xjeqan kelsaxik i jutzob'aj re i Dios chila pa Jerusalén. Konojel xkichersax b'i kiwach pa taq tinimit Judea xaq i Samaria. Xwi i apostolab' xe'anmaj taj. 2Je o jujun winaq chi utz kik'ux xkimuq ma Esteban xaq lik xe'o' che ukamik. 3Tz'aqat i ma Saulo lik ktijin chkelsaxik i jutzob'aj chi kekojon che i Dios, kok pa taq ja, keujukukej li i winaq chwa taq ja, che achiyab' xaq che ixoqib' minb'al ke prexil.
Usaqixik i utz laj tzij k'ak' re i Dios pa tinimit Samaria
4Xwiri i jub'an chi xe'anmaj li chila pa Jerusalén, xaipa xe'e wi lik xkipaxsaj i utz laj tzij k'ak' re i Dios chke i winaq. 5O jun chke are i ma Felipe, x-e pa tinimit Samaria xaq xujeq ub'ixkil i utz laj tzij chrij i Jesucristo chke i winaq chila. 6I winaq lik kkimol kib' xaq lik kkitatb'ej ronojel wach kub'ij ma Felipe. Man kkil i nimaq taq il xaq i nimaq taq anik chi ku'an ire. 7Lik Je k'i i winaq o itzel taq tew chke i lik xekuntajik, i itzel taq tew le lik kesik'inik are xe'elik, xaq je k'i i klis xaq i je jetz' lik xeutzirik. 8Rumali xk'iji jun nim laj kikotemal pa tinimit Samaria le.
9Xaq pa tinimit le o jun achi chi ma Simón ub'i, ire ajt'oronel te'eq, i lik xeut'or aj Samaria ru' nimaq taq t'oronik chi xu'ano xaq xu'an che rib' chi lik nim u'ij. 10Konojel i winaq chi ch'utiq chi nimaq, lik xkikoj retalil che utzij xaq xkib'ij chkiwach: “I achi le lik o ucho'ab' i Dios ru'”; xecha.
11I lik xkikoj retalil che man lik ax keut'or wi ru' k'iyal taq itz chi ku'ano. 12Xwiri, are xkikoj i utz laj tzij k'ak' chrij i ajawinik re i Dios xaq i Jesucristo chi xub'ij i ma Felipe chke, are uri xkitz'onoj uqajsaxik ya pkiwi che achiyab' xaq che ixoqib', 13xaq keje ne ma Simón, xukojo xaq xutz'onoj uqajsaxik ya puwi, te'uri xterej b'i chrij ma Felipe, lik kub'isoj i nimaq taq il xaq i nimaq taq anik chi ku'an ma Felipe chwach.
14I apostolab' chi xekanaj kan pa Jerusalén are xketamaj chi aj Samaria ketijin chukojik utzij i Dios, are uri xekitaq b'i ma Pedro xaq i ma Wan chila ku'. 15Are xeuponik, xelapan ru' i Dios pkiwi i winaq aj Samaria chi kekojon che i Dios, man keje ile kok i Lo'laj Utewal i Dios pkik'ux. 16Xkitz'onoj ile man k'amaja kk'un i Lo'laj Utewal i Dios pkiwi; xwi qajsam i ya pkiwi pub'i i Ajwal Jesús. 17Are uri ma Pedro xaq i ma Wan xkiya ki'ab' pkiwi i winaq chi kekojon che i Dios, keje uri ile xok i Lo'laj Utewal i Dios pkik'ux.
18I ma Simón, are xrilo chi kqaj li Lo'laj Utewal i Dios are kkiya ki'ab' i apostolab' pkiwi i winaq, are uri xusujuj i pwaq chke, 19i xaq xub'ij chke:
—Chiya ni i nim laj cho'ab' le chwe yin, man pachin jun kinya in-ab' puwi xaq kqaj ni uri Lo'laj Utewal i Dios puwi —xcha.
20Are uri ma Pedro xula' uwach che:
—¡Chporox ni apwaq pa a' junam awu' yet, man xach'ob' taq ulo'ik Utewal i Dios chi are jun sipon re i Dios! 21Yet, nti awe chuk'amik i nim laj cho'ab' le man utz ti ak'aslemal chwach i Dios. 22Chawo'taj i utz taj le chi anojim pak'ux xaq chatz'onoj che i Dios, man keje ile moqxa kukuy ni amak rumal i xach'ob'o le. 23Man kwilo chi lik to' katk'achk'atik xaq lik at o pu'ab' i utz taj —xcha ma Pedro che ma Simón.
24Are uri ma Simón xula' uwach chke:
—Chitz'onoj uri che i Ajwal pinwi, man keje ile kink'ulmaj ti ni'pa i xib'ij chwe le.
25Chrijil chik ub'ixkil ronojel ni'pa kilom chi u'anom i Jesús xaq wach taq ub'im i Dios, are uri i apostolab' le xkipaxsaj i utz laj tzij k'ak' chke i winaq pa k'iyal taq komon chila Samaria, te'uri xetzalij chub'i pa Jerusalén.
Ma Felipe xaq i atz laj ajpatan aj Etiopía
26X-on panoq, jun ángel re i Ajwal xupon ru' ma Felipe i xub'ij che: Chayijb'a awib' xaq jat pa wiqab' che i b'e chi k-e pa Jerusalén, k'a kupon pa tinimit Gaza. I b'e le kik'aw pa tz'inilik jyub' chaqij. 27I ma Felipe xuyijb'a rib' xaq xumaj b'i ub'e; chila pa b'e xuk'ulaj jun achi chi aj Etiopía. Ire le nim upatan man are kk'olow upwaq ati ajawinel re i tinimit Etiopía, i achi le xupon chukojik u'ij i Dios pa Jerusalén. 28Ire tzalijik chik re chila putinimit, kul chupam jun kareta chi kjek' kumal i kaway, i ktijin chrajlaxik uwach i wuj chi utz'ib'am kan ma Isaías chi profeta.
29Are uri i Lo'laj Utewal i Dios xub'ij che ma Felipe: “Jat, chattejeb' pan ru' i kareta le.” 30I ma Felipe are xtejeb' pan ru' i kareta, are uri xuta i achi aj Etiopía le chi ktijin chrajlaxik uwach i wuj chi utz'ib'am kan ma Isaías; xutz'onoj uri che:
—¿Kata uri ub'e wach kattijin chrajlaxik uwach le? —Xcha.
31I achi aj Etiopía xub'ij che:
—¿Wach utayik ub'e kin-ano we nti jun kub'ij usuk' chwe?
Rumali xub'ij che ma Felipe chi k-an an jub'i' ru' chupam ukareta i kkub'i putzal. 32Iri are i tz'ib'tal kan chupam Uwuj i Dios chi kajlax uwach:
Ire xk'am b'i pa kamsab'al pacha jun chij.
Pacha jun ral chij chi kch'aw taj are kk'upix i rismal,
xaq keje xu'an ire ile, lik xch'aw taj.
33Xqajsax u'ij xaq mijun xu'an i atb'al tzij puwi pacha usuk'.
Ire lik mijun umuq uxikin xuya kanoq,
man uk'aslemal xelsax che waral chwach i jyub' ta'aj.
34Are uri i achi chi nim upatan aj Etiopía, xutz'onoj che ma Felipe:
—Cha'ana jun utzil, chab'ij chwe ¿Pachin taq chrij utz'ib'am kan i profeta le? ¿Chrij ire o chrij jun chik?
35Are uri ma Felipe xusaqij che wach ktijin chrajlaxik chupam uwuj i Dios, xutzijoj che wach i utz laj tzij chrij i Jesús. 36Chrijil chik ile are ketijin che i b'e xeik'aw chila ipa o wi i ya, are uri i achi le xub'ij che:
—O i ya chi ¿Utz ti nawi su' kaqajsaj i ya pinwi? 37#8.37 Chupam i nab'e taq uwuj i Dios kriqtaj ti i versículo ri: I ma Felipe xub'ij che: We lik ru' ronojel ak'ux kakoj i Jesucristo, utz uri kqajsax i ya pawi. I achi xub'ij che: Lik kinkojo chi i Jesucristo are Uk'ojol i Dios.
38Are uri xutaq utak'b'axik ukareta xaq chekeb' xeqaj b'i chi ya. Are u'ankil uri chi ma Felipe xuqajsaj i ya puwi i achi le. 39Are xe'el li chi ya, i Lo'laj Utewal i Dios xuk'am b'i ma Felipe, i achi le xril ti chik uwach; xwiri ire lik kkikotik xumaj chub'i ub'e. 40I ma Felipe xe'el k'a pa tinimit Azoto. Are uri xupaxsaj utzij i Dios pa taq tinimit ipa xik'aw wi, k'a xupon pa tinimit Cesarea.
Attualmente Selezionati:
Hechos 8: ACHICUB
Evidenzia
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© Biblia Achí de Cubulco, Derechos reservados de Sociedad Bíblica de Guatemala
