Hechos 10
10
Ma Pedro xaq ma Cornelio
1Chila pa tinimit Cesarea jeqel jun achi chi ma Cornelio ub'i, ire aj-atzil ke i achiyab' chi je yij che i ch'oj aj Roma chi Italiana kib'i. 2Ire le lik utz laj winaq, junam ku' konojel i ralk'uwal lik kkikoj u'ij i Dios. Xwi ta la ile, xaq kuya k'iyal pwaq chke aj Judío tob'al ke, xaq lik arewi klapan ru' i Dios. 3O jun ij chi kolo moq oxib' or re uqajb'al ij, xril jun ilanik pa wachij:
Lik xril puwach chi jun ángel re i Dios xok b'i ru' i keje iri xub'ij che: ¡Ma Cornelio! 4I ma Cornelio lik xuk'am utaqexik xaq ru' jun nim laj xib'rikil xutz'onoj che: “¿Wach kub'ij ak'ux Nim laj Winaq?” I ángel xub'ij: I Dios utom ronojel alapanik chi a'anom ru' xaq lik utz rilom ni'pa aya'om chke i nib'a'ib'. 5Chataqa b'i jun pa tinimit Jope, chusik'ixik jun achi chi ma Simón ub'i chi xaq ma Pedro kb'ix che. 6Ire jeqel chi rachoch jun chik ma Simón chi ajyijb'al tz'um; chila chuchi' i mar. Xcha i ángel.
7Are x-e i ángel le, i ma Cornelio xeusik'ij keb' umokom i jun achi yij che i ch'oj chi lik kukoj u'ij i Dios chi xaq lik kul uk'ux che. 8Are xlaptaj chke ronojel ni'pa xuk'ulmaj, xeutaq b'i pa tinimit Jope.
9Chukab' ij, tz'aqat i achiyab' le ketijin che i b'e naqaj chik che i tinimit Jope, are kolo tik'il ij, i ma Pedro xel b'i k'a puwi i ja chi ta'aj uwi, che i lapanik ru' i Dios. 10Ire knumik, rumali lik kraj chik utijawik uwa, xwiri tz'aqat are ktijin uyijb'axik uwa, ire xril jun ilanik pa wachij: 11Xrilo chi xjaqtaj upam i kaj xaq xqaj li pacha jun nim laj sawan chwach ulew, ximom pa taq kajib' utzam. 12Chupam i k'ul le xrilo chi je o jalajuj taq chikop, je o i chikop kajib' kaqan, je o i kejukukik xaq je o i tz'ikin. 13Te'uri xuta jun ch'awb'al chi xub'ij che: Chatwalijoq ma Pedro, cheakamsaj i chikop le xaq cheatija.
14Te'uri ma Pedro xub'ij: “Intaj Ajwal, yin lik mijuyak intijom ch'am ti laj taq chikop.” 15I ch'awb'al xub'ij chik che: “Ni'pa u'anom chik ch'am i Dios che, mab'ij yet we ch'am taj.”
16Oxmul xuk'ulmaj ile, te'uri xyak chub'i i k'ul le chikaj chi pacha sawan. 17I ma Pedro lik kk'achir chuch'ob'ik wach ke'el usuk' ile chi xril puwach, tz'aqat xeupon pan utaqon ma Cornelio chwach uchija, ketijin chuch'ob'ik raqan ipa o wi rachoch ma Simón. 18Are xeuponik, ko xech'aw chutz'onoxik we chila o wi uposar ma Simón, chi xaq ma Pedro kb'ix che.
19Tz'aqat i ma Pedro k'a ktijin chuch'ob'ik wach xril puwach. Are uri i Lo'laj Utewal i Dios xub'ij che: Chata pe', je o oxib' achiyab' chi katkitzukuj. 20Chatwalijoq, chatqaj b'i ku' xaq ma'an taq keb' che ak'ux, man yin je intaqom li awu'; xcha.
21Are uri ma Pedro xqaj b'ik xaq xub'ij chke i achiyab' le:
—Yin ile chi kixtijin chintzukuxik. ¿Wach kiwaj xixk'unik?
22Ike xkib'ij:
—Yoj oj utaqom li ma Cornelio chi aj-atzil ke i achiyab' chi je yij che i ch'oj aj Roma. Ire utz laj winaq, kukoj u'ij i Dios xaq lik nim u'ij kumal aj Judío. Jun ángel re i Dios xub'ij che chi katolqak'ama yet man keje ile katupon chi rachoch xaq kretamaj na wach taq kab'ij.
23Are uri ma Pedro xeroksaj b'i pa ja xaq xekanaj kan chila ru' ire che a'ab' le. Chukab' ij x-e ma Pedro ku' xaq je o jujun chke i qachalal chwach i Cristo aj Jope, xkachi'ilaj b'ik.
24Chukab' ij xeupon pa tinimit Cesarea, ipa je oy-em wi chik rumal ma Cornelio junam ku' jutzob'aj rachalal xaq i ramiy chi lik uya'om uk'ux chke, xaq je usik'im ru' chi rachoch. 25Are xupon ma Pedro ru' ja, xel li ma Cornelio chuk'ulaxik xaq xxuki chwach kojb'al u'ij. 26Xwiri ma Pedro xuyak anoq xaq xub'ij che:
—Chattak'aloq man yin xa in winaq, in keje pacha yet.
27Tz'aqat ktijin che i lapanik ru' xok b'i pa ja, are uri xeril k'iyal winaq chi kimolom kib' chila. 28I ma Pedro xub'ij chke:
—Yix iweta'am chi qa'atb'al tzij yoj chi oj aj Judío lik kuya ti chqe chi kqachi'ilaj qib' iwu' yix chi ix aj Judío taj, mitene kojok taq iwu' chi iwachoch. Xwiri i Dios uk'utum chwe wo'or chi utz taj we kinb'ij ch'am ti laj winaq che jun chik. 29Rumali chi are xinisik'ij, lik juntir xinpetik. Wo'or, yin kwaj kwetamaj b'uchak xinisik'ij.
30Te'uri ma Cornelio xub'ij:
—Pa kajib' ij kanoq, che taq i ori, yin in o waral chi wachoch kintijin che i lapanik ru' i Dios che i oxib' or re uqajb'al ij, are uri xaqte'et xwinaqir jun achi chinwach chi lik kwalch'in u'u'. 31Xub'ij chwe: Ma Cornelio, i Dios utom ni'pa alapanik ru' xaq o puk'ux ni'pa a'anom tob'al ke i o rajwaxik chke. 32Wo'or chataqa b'i jun pa tinimit Jope chusik'ixik ma Simón chi xaq ma Pedro kb'ix che. Ire o uposar ru' jun chik ma Simón chi ajyijb'al tz'um chi o rachoch chila chuchi' i mar. 33Rumali chi juntir xintaq asik'ixik, i yet lik utz ak'ux man lik xatpe la. Wo'or qamolom qib' chi chwach i Dios kqaj kqata ronojel ni'pa at utaqom li Ajwal chub'ixkil chqe; xcha ma Cornelio.
Ulapanik ma Pedro chi rachoch ma Cornelio
34Are uri i ma Pedro xujeq lapanik:
—Wo'or kinta ub'e chi lik qatzij chi i Dios xaqjun qilik ku'ano, 35nti k-ono xa b'i chi tinimital, lik keuk'amo pachin kkikoj u'ij xaq i kki'an i utz. 36I Dios xch'aw ku' kimuq kixikin aj Israel, xutzijoj ub'ixkil i tzij re chomb'al k'uxij chke rumal i Jesucristo, chi are Ajwal qe qonojel. 37Yix lik iweta'am wach taq xk'ulmax chila pa ronojel ulew ke aj Judío, chi xjeqan chila pa Galilea, chrijil chik are xub'ij etz ma Wan chke i winaq chi rajwaxik kqajsax i ya pkiwi. 38Iweta'am chi i Dios lik xuqajsaj i Lo'laj Utewal puwi uk'ojol chi are i Jesús aj Nazaret, xaq i Jesús le xb'in pa taq tinimit chu'anik i utz, xaq chkutzirsaxik ni'pa i je o pa k'ax rumal ucho'ab' i Itzel. Xtiki chu'anik ronojel ile, man i Dios lik o ru', 39yoj qeta'am xaq lik kqasaqij chi ile lik qatzij wach xu'an i Jesús chila che ulew Judea xaq pa tinimit Jerusalén. Chrijil chik ile, xkirip chwach i krus xaq xkitz'awo, xkikamsaj. 40Xwiri i Dios xwalij che i kamik che urox ij xaq xu'an che chi xuk'ut rib' chqe yoj. 41Xuk'ut ti rib' chke konojel i winaq, xwi chqe yoj, chi lik ujer oj u'ulum ire re kqasaqij i saq laj tzij. Yoj lik xqatij qawa xaq xqatu' qaya' ru' are ya xwalij che i kamik chkixol i kamnaq. 42Ire xojutaq b'i chuya'ik retamaxik chke i winaq chi i Dios uya'om i Jesús le pa Atol Tzij pkiwi ni'pa je k'aslik xaq ni'pa je kamnaq. 43Xaq konojel i profeta ax kib'im wi chik pachin i Jesús, xaq kib'im chi ni'pa i kekojon che, lik kkiriq ni kuyb'al mak ru' Ire.
Uk'unik i Lo'laj Utewal i Dios pkiwi i ne te aj Judío
44Tz'aqat k'a ktijin ma Pedro che i lapanik, are uri xk'un i Lo'laj Utewal i Dios pkiwi konojel ni'pa i ketijin chutayik utzij. 45I aj Judío winaq chi je kojonnaq che i Dios, chi xaq je uponnaq ru' ma Pedro, lik xkib'isoj chi Lo'laj Utewal i Dios xqaj pkiwi i jub'an chi ne te aj Judío, 46man xkita chi kech'aw pa junwi chik ch'ab'al chi lik kitom taj, xaq xe'ok chukojik u'ij i Dios. 47Are uri ma Pedro xub'ij:
—¿Xatab'a o k-atiwik we kqajsax ya pkiwi i winaq le, chi xqaj i Lo'laj Utewal i Dios pkiwi, pacha xqa'an yoj?
48Chrijil chik ub'ixkil ile, xutaq uqajsaxik ya pkiwi pub'i i Ajwal Jesucristo. Te'uri ike xkitz'onoj utzil che i ma Pedro chi kkanaj kan keb' oxib' ij ku'.
Attualmente Selezionati:
Hechos 10: ACHICUB
Evidenzia
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© Biblia Achí de Cubulco, Derechos reservados de Sociedad Bíblica de Guatemala
