MATIUS 2
2
Akuni Majus mende o Timur nggwe nen wagugwa wenek
1Ar Yesus o Betlehem agar Yudea paga, ap Raja Herodes nen apma balok welaga kigik endak tagagerek werek ma, akuni o Timur nggwe mende, dadi awene inilu dogitagwi mende eti o Yerusalem arar wagugwa. 2Ir o etoma ya nda obogar kinok yir wagu dogolir, “Elege ap Yahudi mende inake raja menaru ake ngger endak taga enaga ebe nggi o? Ar ekdadi o Timur nggwe etoma wulki nangge, ebe pogoraruwok nen yiluk kwarir wago o,” yiluk yir wagugwa.
3Ar ap raja Herodes enogo, wene aruk kolalka lagagerek, agur ambik mondok lagage. Nen ir akuni o Yerusalem paga mendek, etegerogonar inagur ambik lagugwa. 4Agur lalok, ar nen ir imam kepala inom, ir guru-guru agama Yahudi mendek inom, obogar wonggalogo balok, kinok yoraga dogolir, “Ar Allah nen ap raja nggok ambi endak tarigin o, yiluk Ane amburu yirige eti o nggoma kogop?” yiluk kinok yoragage.
5Ir nen wene onggo yogu dogolir, “O Betlehem Yudea paga arar o. Nenaluk, ar Nabi ambi nen diru mbalkige eti yegerogon o,
6 #
Mi. 5:1
‘Kar o Betlehem, Yehuda paga yi,
kar kebe o kota Yehuda paga yoma bugudak kwak ar mende dek o.
Nenaluk kar paga nen, ap ninewe ambi kenam arigin o.
Nen kenam atuk akuni Israel mende apma balok dogogin o.’ ”
7Tuguluk ar Herodes nen wene yirugwa mende obok ilu atuk, ir ap o Timur nggwe mende enogo wai yoralok kinok lakbi lakbo arar yoraga dogolir, dadi nggok eti menda nen kenam arigin kogop, yiluk yoragage. 8Yoraga lagagerek, ar Herodes nen o Betlehem arar lakbak nen yiluk yoraga dogolir, “Kir arar lani o. Nen Elege eti pik pak mondok kwari lani o. Nen kir Ar ebe kwakbiluk nen kalok, an ogwe Ar pogorari lak nen yiluk, kir an yorniri warno o,” yiluk yorarige o.
9-10Etegerogo arar yorarigemo, ir arar lagugwa. Lagu dogolir dadi nggok o Timur nen dagi wagage enogo arar inil kalok, ir inakla adeknggen ambik ar karugwa. Nen dadi enogo ndak alep laga kigik, ir yabonggane mutek lagunem, elege endagoma yanogo amor-amor, dadi enogo arar puk ari lagage o. 11Ir ap enogo, uma arar unggugu lagugwarik, Elege endago enogo agwiya Maria imbirak inil kalok, nen ir yanogo inendop yunggulogo inebe tebe yiluk, elege enogo pogoraku dogolir, ir inamendek tula yagadek yemetnogo, emas inom, kemenyan inom, mur inom, obogar kidilogo wogorugwa.#2:11: kemenyan: O dupa onggo nggok mendek, ebe o mendek agubak kigirik. Mur: Ebe o amburu mendek wodalek nen obari pano mondok. (kamus kinil kano). 12Tuguluk ir enogo, Ar Allah nen inakbi paga yoraga dogolir, Herodes obaru lagup o, yiluk yorarigemo, ir inuma tuan adik paga nggweru arar lagugwa.
Olituk Mesir lagugwa wene
13Ap dadi awene iniluk mende enogo arar lagugwama, Ar Tuhan mende malaikat wagagerek, ar Yusuf akbi baga yoga dogolir, “Ar Herodes nen Elege yi kwakbiluk, Ebe warik nen yiluk andagerek ma, ibar kiniluk arni o. Nen Elege endi agwiya imbirak o Mesir etoma ibar wogorek lan o. Kir kinebe etoma mondok dogolir, An nane yokiraga kinaruk mban dogono o,” yiluk yorige.
14Yorigemo ar Yusuf iluk atuk, Elege endago enogo agwiya imbirak etinem kukbaga olituk, o Mesir arar woginarek lagage o. 15#Hos. 11:1Nen ir o etoma werek kigik, ap Herodes enogo arar wartagige o.
Wene ertagage yi, Ar Tuhan nen yirige eti, “An nakbur o Mesir nen, wai yorigin,” yiluk, Ar Enabi inobadek yorarige mende nda-ndak arar dik yege o.
Elege inakugwa wene
16Herodes nen, ir ap dadi inil wolok lagugwa enogo nuguk dangga yiluk ilu aga lagagerek, ar wenemuk ambik ar yirige. Tuguluk ar nen yega dogolir, elege ap endago umur dua tahun kudi nen kogonanggwe mende, o Betlehem paga welagwi mendek inom, wedek manggwe etoma mendek inom, obogar inarurak o yiluk wene wulakige. Eti ir ap dadi wundi wagagemo inil wolok wagugwa mendek nen, wene dadi oba amor-amor kenam arigin yiluk mbililogo yirugwa ndak-ndak. 17Wene yi, ar Nabi Yeremia nen yirige ndak-ndak arar arma dik yege yi o. Ma ar nen yirige eti yegerogo;
18 #
Yer. 31:15
“O Rama nen denggu dengga yugwi inaruk kolalkwi,
Inakla maduk atuk de yugwi,
Kwe Rahel agwi inakba nen inade yega;
Elege inebe obogar dek agugama eti nen, ar iliti yonggonu a'ir agage o.”
O Mesir nen iniyok paga wagugwa wene
19Ap nggok Herodes enogo arar wartagagemo, Ar Yusuf o Mesir etoma werekma, malaikat Tuhan mende wene akbi paga yorik nen yiluk oba enam ari wagage. 20Enam atuk wene yoga dogolir, “Ir akuni Ar Elege endago waruok nen yiluk, abok mbalkugwa mende yemenogo, arar wartagagemo. Etegerogon ma, kar kiluk atuk, nen Elege endago eti Agwiya imbirak, o Israel kiyok paga woginarek lano o,” yiluk yorige. 21Yorigemo ar Yusuf arar iluk agagerek, Elege enogo agwiya Maria imbirak, o Israel iniyok paga woginarek lagage.
22Ogwe tuguluk ar Yusuf wene aruk kolalka dogolir, ar Arkelaus Herodes akbur eti ombae Herodes akdikmu, o Yudea paga etoma, ap nggok arar menagarik werek o, yiluk aruk kolalkige. Nen ar Yusuf etegerogon aruk kolaldiluk, o etoma lau obade agage. Ogwe, Ar Tuhan nen akbi paga ambi inom ar yoga dogolir, kar o Galilea paga etoma nggwe lano o, yiluk yorige. 23#Mrk. 1:24; Luk. 2:39; Yoh. 1:45Yorigemo ir o, Nazaret paga etoma arar ari lagugwarik welagugwa. Etegerogon ma, Elege yi, “Ar ebe o Nazaret mende yogu dogogun o,” yiluk ir ap nabi-nabi nen wene yirugwa ndak-ndak arar atma dik yirige o.
Attualmente Selezionati:
MATIUS 2: WLW
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
