Seemthawhnak 6
6
Minung ih Rawhralnak
1Vulei parah minungpawl an punzai thawh tikah leh tianupawl an ngeih hngai tikah, 2Pathian ih tiapale ni an mawi ti an hmu; culeh an rilmi hmawhhmawh cu nupi ah an lattia. 3Cutikah Bawipa ni, “Ka thlarau cu minungpawl hemahcun kumkhua a hmun thok lo, icatile anmimi cu thisa an ii; an nun sung cu kumza leh kul a i thok,” tiah a ti. 4Cui sanpawl leh cuhnukah Pathian ih tiapale ni minungle ih tianule an pawl ih tianaupawl an hrin piak tikahkhin vulei parahhin Nefilim an om ta. Hilepawl hi hlanlio pi ih miralṭhale, raldohthiam minthang an ii.
5 Bawipa ni vulei parahhin minung ih rawhralnak cu a vuaicai, cun an thinlung hoinakpawl cu an sia hlanghlan ti a hmu. 6Culeh Bawipa cu vulei parah minung a vuak cu a ngaih a sia ih a thin a tiak. 7Curuangah Bawipa ni, “Ka seemsuahmi minungpawl cu vulei parin ka siatsuah hngai thok—ramsapawl leh bokvakpawl leh huih lak vapawl rum, icatile anmah ka vuak taak hngai cu ka ngaisirtia,” tiah a ti. 8Noah zong cu Bawipa hmaikaah mithmaiṭha a co.
Noah ni Pathian Lung a Hmuisak
9Hile hi Noah ih hrinsarpawl an ii. Noah cu miding, amah san lioah soibei a ii; Noah cu Pathian rum an bualleng khat. 10Noah ni tiapale pathum: Shem, Ham, leh Jafeth a ngei hngai.
11Vulei mi cu Pathian mithmuh ah an rawkcat ih vulei cu daanlo ih nunnak in a khat. 12Culeh Pathian ni vulei mi cu an rawkcat ti a hmu; icatile vulei parih mikip in an rawkcat. 13Culeh Pathian ni Noah hemah, “Minungpawl an zate vulei par hin dengsak hngai dingah ka ruatcat rom, icatile vulei cu anmah ruangah ṭhatlonak in a khat; atu-ah anmah cu vulei rum ka siatsuah khat hngai thok. 14Namah ca’h saipress thing in lawngpi vuak tia; a sungah khaanpawl vua hngai, cun a sungla leh pawnla cu tarthling hnulhin phit. 15Na vuak thok daan cu hiti’n a ii: a saula pi 450, a kauhla pi sawmnga, a saanla pi sawmli pi nga a i thok. 16A cungkhum vua la, a cungkhum leh a kon lakkar cu zung hleiriat na awngsak riahro thok; cun don thum in vua la, a siirla ah sangka vua. 17Van tangih ommi nunnak thaw a ngeimi hmawhhmawh siatsuah dingah vulei parah tinik ka tlunsak thok; vulei parih ommi izongza an thi thok. 18Nang rum tu cu ka thukam ka vua thok; nang cu na tiapale, na nupi, na vah-le rum lawngpi sungah nan lut thok. 19Cun a nung mi izongza namah rum nung ve dingah lawngpi sungah na luhpi hngai thok, a numi leh a pami an i thok. 20Vatepawl khaw an phun zulin, ramsapawl khaw, khur ih bokvak phun kip khaw an phun zulin, a nung ih siah dingah phun cang in khuah khat vek an i thok. 21Cun awkmi caw phun kip dengin khawl hngai; namah ca’h leh anmah ca’h caw a i thok,” tiah a ti. 22Pathian ni a hemih thu a piakmi zate cu Noah ni a vua.
Attualmente Selezionati:
Seemthawhnak 6: KHBF
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Khualsim Holy Bible © Bible Society of Myanmar, 2021.