Shitatiko 8
8
Kumana kwa libazi
1Ngoboni Nyambi wanukile Nowa na tuyamana nimwato twa bimuna na twa mu lishaka tuya ekalile nato mu wato. Niho apepokeshele mpepo yayinene hano hanci, kami mema atatikile kunyomena. 2Mashima a kunonka ku nceto ya limvu na mampananga a liyilu byazikile pe mvula waketukile kuyilu, 3kami mema anyomenenenga hanci shashishe shashishe ha matena 150. 4Ha mutena wa 17 mu ngonda ya mutanu na zibili, wato wakakatilile ha mutwe wa mapili a Alalata. 5Mema anyomenenga, pe ha mutena wakutatika wa ngonda ya wulikumi mitwe ya mapili yatatikile ku moneka.
6Kunyima ya matena makumi anaa Nowa washinkwilile limpananga lya wato, 7pe watumine likwangala. Likwangala kaliha lyabokele lyatuka tukilenga hantu noho mema ayumine hanci. 8Niho Nowa atumine Nkilimba mu ku mona ndi mema ananyomene hanci, 9ngoboni Nkilimba kaliha wawanine mwanya wa kutentama ndaba mema ashili kukonkana hanci, pe wabokele mu wato. Nohobene Nowa wakolobelele ha munkanda Nkilimba na kumwingiza mukati. 10Watatililile kami matena amina mutanu na abili niho atumine Nkilimba, pe watutwishile Nkilimba mu wato. 11Nkilimba wabokele kukwendi mazolo na libizi lya mutondo watumbiwile ngayi olive ku muvumbo wendi, nohobene Nowa walimukile ngayi mema anyomenakale hanci. 12Niho atatililile kami matena mutanu na abili, pe watutwishile Nkilimba, ngoboni uya Nkilimba kaliha wabokele.
13Nowa oho ekalile myaka 601, ha mutena wakutatika mu ngonda wakutatika, mema ayumine. Nowa wafumishile shiluli shiya shafwikile ha wato, pe wenangilile ha munkanda wamonene ngayi hanci hali na kuyuma. 14Ha mutena wa 27 mu ngonda wa wubili, hanci nimwaho hayumine nkwaa.
15Nyambi ya Ngula wambile kuli Nowa ngayi, 16“Tutikenu mu wato na mukazobe na bana bobe na bakazabo. 17Tutikenu na tuyamana nimwato na tuyoni, ngayi mwanga tuhemunune na kuhanyina hanci nimwaho.” 18Pe Nowa watutikile mu wato na mukazendi na bana bendi na bakazabo. 19Bya kulengiwa nimwabyo byatutikile mu wato, bya kulikoka hanci na mavumo na tuyoni mu matanga watwo.
Nowa ukutupula nkombela kuli Nyambi ya Ngula
20Nowa wazikilile kaala Nyambi ya Ngula, niho ashimbile ku tuyamana na tuyoni twa kuliwa na kubikombelela kwinga nkombela ya kuhokesha ha kaala ka mamanya. 21Pe oho Nyambi ya Ngula ayuvwile livumba lyaliwahe lya nkombela eye, wayuvwile shiwahe, walyambashanine niyemwine ngayi, “Nifwako kami kuka kuta limvu ndaba yanebye akutenda muntu. Nikulimuka ngayi kubalika ku wanuke wendi bihanganiko byendi byabibi. Nifwako kami kukalobesha shuma nimwasho sha kuyoya, ngonehe eshe ninatende.
22Aha kaye kashiliko, kukekala shikati sha ku shanga,
na shikati sha kuteza,
shikati sha kubombola na kutukuma,
shikati sha mupepo na mvumbi,
shikati sha mwaana na wushiku.”
Attualmente Selezionati:
Shitatiko 8: LLK
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Libuka Lya Kuyela © Bible Society of Zambia, 2020.
