Ima̍tiyu 15

Lɛlā yī a̍dɔ̄kū ongōngū

(Ima̍aki 7:1-13)

1Āchɛ yī Ifa̍rasīi ba̍la āchɛ ongū Lihɔ yī Iju̍u ɛha̍ bū la Ijɛru̍sālɛm wā dikpo̍ba̍ Iji̍sɔ̄ɔsi. E̍ che ɔ̍ ikpo̍ bɛ̍ɛ̄nɛ̄ hīka, 2Oji̍ - Ohu̍ nīi a̍chi̍kpo̍ yī wɔ i̍ yɛ̍ɛ̄lā ɔchɔ̍ɔwɔ yī alɔ nīi alɔ nāa bū la abɔ̄ yī ɔ̍kɔ̄kū yī alɔ ni̍ ma̍/? E̍ i̍ ē na abɔ̄ o̍bū re̍ ojōre̍ lɔkɔ nīi alɔ ē ya̍ ma̍ ni̍ oo!

3Iji̍sɔ̄ɔsi hīya aa̍ ɔkɔ hīka, “Oji̍ chī - ohu̍ nīi ala̍ tɔ̍ɔkɔ yī lɛlā yī Ɔwɔ, chōo̍chē yɛ ē kwɔgu yī lɛlā ongōngū yī ala̍ ɛlɛjā ma̍? 4Wu̍chē oji̍ nɛ, Ɔwɔ ka hīka, ‘Ala̍ ā tū a̍dā yī ala̍ ba̍la ɛ̍nɛ̍ yī ala̍ lichō.’ O̍ gba̍a ka hīka, ‘Ɔ̄chɛ nīi ge̍ kɛlā abi̍ ku̍ a̍dā yī nū kɛ̄ɛ ɛ̍nɛ̍ yī nū, e̍ ge̍ de ɔlɔjā ngmo̍.’ 5Aa̍ ala̍ chōo̍chē ngū āchɛ hīka, ɔ̄chɛ ɔ̍lɔ ge̍ da a̍dā yī ɔ̍lɔ kɛ̄ɛ ɛ̍nɛ̍ yī ɔ̍lɔ hīka, ‘Ɔjā nīi n lɛ ge̍ē de ē tū wɔ wɔbɔ̄ ma̍ - iyī Ɔwɔ bɛ̍ɛ̄nɛ̄ nɛ,’ 6bū la ɛbɛ ɔla̍ā, ɔlɔjā ɔ̍lɔ i̍ gblɛfiyɛ yī otūlichō yī a̍dā yī ɔ̍lɔ kɛ̄ɛ ɛ̍nɛ̍ yī ɔ̍lɔ gɛ ni̍. Bū la ɔpɔ̄pū nūma̍, ala̍ i̍ nāa lɛlā yī Ɔwɔ bāa ɔjɔ̄jā ma̍ gɛ ni̍. Ɔkɔkɔ ɔla̍ā, ala̍ chōo̍chē kwɔgu yī lɛlā yī a̍dɔ̄kū yī ala̍ la ongōngū. 7Ala̍ āchɛ ɔkɛlā ɔha̍ chōo̍chē ya̍ ɔha̍ nūma̍! Lɛlā nīi Ayisa̍ya mwɔ̍ɔmu ku̍ ala̍ ma̍ grāa kpa̍a. Ɔ̍lɔ ge̍,

8“ ‘Āchɛ nūma̍ ē de otūlichō de u la oko̍ko̍o ji;

ūkpɔ̄tū yī wā lā hwɛɛ hī u.

9Otūlichō yī u nīi e̍ ē ya̍ ma̍ - a̍ji nɛ.

Wu̍chē oji̍ nɛ, e̍ ē ngū lɛlā yī āchɛ̄ɛchɛ,

bɔ̄ɔjā nīi o̍ - lihɔ yī Ɔwɔ nɛ ma̍.

Ami Ɔwɔ ka i̍ngɔ̍ɔ a̍nɛ.’ ”

Ɔjā nīi ē ya̍ nīi ɔ̄chɛ de ē bri̍īnyī ma̍

(Ima̍aki 7:14-23)

10Iji̍sɔ̄ɔsi hī alɔgbādu ɔla̍ā ɛra̍ koko̍o de wa̍ hīka, “Ala̍ ā darɔ̄ku hɛ̄ɛbɛ nīi ala̍ ge̍ po̍ yɛ̍yɛ̍! 11I̍ ɔjā nīi ē chɛ̄ gāa lipu̍ yī oko̍o ma̍ ē ya̍ nīi ɔ̄chɛ de ē bri̍īnyī lēchi̍ lēchi̍ a̍ni̍. Ɔkɔkɔ ɔla̍ā, ɔjā nīi ē bīyɛchɛ ē hī lipu̍ yī oko̍o ma̍ ē ya̍ nīi ɔ̄chɛ de ē bri̍īnyī lēchi̍ lēchi̍ a̍nɛ.”

12A̍chi̍kpo̍ yī Iji̍sɔ̄ɔsi gāa dikpo̍ba̍ ɔ̄ ge̍ ka de ɔ̍ hīka, “A i̍ jo̍ōkū ni̍ ma̍, lɛlā nīi a ka ma̍ yɛ abɔ̍ɔ ē ti̍ya Āchɛ yī Ifa̍rasīi ūkpɔ̄tū tū?”

13Iji̍sɔ̄ɔsi hīya aa̍ ɔkɔ hīka, “Ala̍ ma̍ ko̍ō! Ɔchi̍ ɔha̍lɔha̍ nīi o̍ ge̍ re̍ka A̍dā yī u nīi hɔ̄ la ichō ma̍ tū a̍ni̍, e̍ ge̍ de ɔ̍ hu ē ta̍anū. 14Ala̍ e̍e hi̍yɛ̄ngura yī Āchɛ yī Ifa̍rasīi ni̍. Alɛhu̍ epriyī nīi e̍ wɛ a̍nɛ. Ɔ̄chɛ opriyī ge̍ bī opriyī la ogblo̍, aa̍ āchɛ ɛpɛpa ge̍ē ngma̍ gbo wɔ̄gɔ̄.”

15Ipi̍ta da Iji̍sɔ̄ɔsi ka ɔ̍lɔ ge̍ ka ochi̍chi̍ yī wɔ̄chīije ɔla̍ā de aa̍ we̍ e̍ē!

16Iji̍sɔ̄ɔsi da wa̍ bɛ̍ɛ̄nɛ̄ hīka, “O̍ re̍ka ala̍ titi i̍ gba̍a je̍ ɔjɔ̄jā yɛ̍yɛ̍ hɛ̍ āchɛ ɛlamu ni̍? 17O̍ re̍ka ala̍ je̍ ochi̍chi̍ yī nū ni̍? Ala̍ ma̍ gɛ ko̍ō! Ɔjāha̍-ɔjāha̍ nīi ē chɛ̄ gāa lipu̍ yī oko̍o ma̍ ē ga ē gāa ubu. O̍ ē chī bīyɛchɛ ē hī ibi̍īyē ke̍e̍. 18Ɛjā nīi ē bīyɛchɛ ē bū lipu̍ yī oko̍o ma̍ ē bū la ūkpɔ̄tū. Anu̍ ē ya̍ nīi ɔ̄chɛ de ē bri̍īnyī lēchi̍ lēchi̍ a̍nɛ. 19Wu̍chē oji̍ nɛ, lipu̍ ūkpɔ̄tū yī ɔ̄chɛ nīi ɛri̍ya̍ ɔdwɔ̄bi̍ wa̍a̍ ē bū a̍nɛ. Anu̍ ē ta̍tu̍tu̍ yī lɛlā ɔdwɔ̄bi̍ nūma̍, wa̍a̍ a̍nɛ: ɔ̄chɛ ongmo̍ōngmo̍, ɔ̍bɔ̍ɔ̄nyā, ɔnyā ɔla̍ bɛ̍bɛ̍ ba̍la u̍mūda̍rī ɔyɔ̍ɔ̄ya̍, ɔjā yī ɔ̄chɛ ɔnāa wɔhu̍-wɔhu̍, arīmɛ̄ owōwu, ba̍la ode ɔ̄chɛ bīya la oko̍o. 20Ɛjā nūma̍ wa̍a̍ ē ya̍ nīi ɔ̄chɛ de ē bri̍īnyī lēchi̍ lēchi̍ a̍nɛ. A ge̍ re̍ ojōre̍ nīi a i̍ na abɔ̄ lɔkɔ nīi e̍ ka ma̍ o̍bū ni̍, ɔla̍ā i̍ ē ya̍ nīi ɔ̄chɛ de ē bri̍īnyī ni̍.”

Ɔtū nīi ɔnyā ɔha̍ de che Iji̍sɔ̄ɔsi ma̍

(Ima̍aki 7:24-30)

21Iji̍sɔ̄ɔsi wā ge̍ pīya hī ɛbɛ ɔla̍ā bɛ̍ɛ̄nɛ̄. O̍ pīya wa̍a̍ ga ajɛ nīi hɔ̄ bla̍a ipwo̍gra yī Ita̍ya ba̍la Isa̍yi̍dɔn ma̍. 22Ɔnyā Olike̍nāan ɔha̍ nīi hɔ̄ abɔ̍ɔ la ɔcha yī ɛbɛ ɔla̍ā ma̍ wā dikpo̍ba̍ Iji̍sɔ̄ɔsi. Ɔnyā ɔla̍ā drɛ̄ɛgba ka de Iji̍sɔ̄ɔsi hīka, “Ɔyi̍ yī Ide̍bīidi! Chu̍chu̍u Ādā, mlɛ̍ha̍ yī u! Ɔyi̍ yī u ɔnɔ̄nyā ku̍ yapri̍ija dwɔ̄bi̍-dwɔ̄bi̍ gbo abɔ̍ɔ.”

23Iji̍sɔ̄ɔsi i̍ chɛ̄ ho̍ko̍o tū ɔnyā ɔla̍ā ni̍. A̍chi̍kpo̍ yī Iji̍sɔ̄ɔsi gāa dikpo̍ba̍ ɔ̄ ge̍ ra̍ābɔ̄ de ɔ̍ bɛ̍ɛ̄nɛ̄ hīka, “Ka nīi ɔnyā ɔla̍ā ge̍ pīya gɛ. Ma̍a o̍ yɛ amu ē ku alɔ la u̍tu ē ya̍ ojiya ɔ̄kɔ̄kū.”

24Iji̍sɔ̄ɔsi hīya aa̍ ɔkɔ hīka, “Ala̍ ma̍ gɛ ko̍ō! Ɔwɔ de u tɛ̄rɔ̄ hu Ali̍sɛ̄rɛli nīi pīyabi̍ bāa anyīyɛrɔ̄ ma̍.”

25Bū la ɛbɛ ɔla̍ā, ɔnyā ɔla̍ā wā ɔpɔ̄ɔpɛ̄ ge̍ gbo la ajɛ la apli̍kpo̍ yī Iji̍sɔ̄ɔsi. Ɔ̍lɔ ge̍ chu̍chu̍u, ɔ̍lɔ ge̍ tū anu̍ wɔbɔ̄ gɛ.

26Iji̍sɔ̄ɔsi hīya anu̍ ɔkɔ bɛ̍ɛ̄nɛ̄ hīka, “Ma̍ ko̍ō! O̍ i̍ ngma̍ nīi ɔ̄chɛ ē de ojōre̍ yī aywɔ̍lɛ̍ nāa ē chīyēgblāa ē de yoō ni̍.”

27Ɔnyā ɔla̍ā hīya anu̍ ɔkɔ du̍mɔ̍ hīka, “Ɔla̍ā - lēchi̍ nɛ, Ādā! Yoō chī re̍ irwi yī ojōre̍ nīi ē ha̍ābɔ̄ bū la okpōkōlō yī abā yī wā ma̍!”

28Bū la ɛbɛ ɔla̍ā, Iji̍sɔ̄ɔsi hīya anu̍ ɔkɔ hīka, “Ɔtū ode chōche yī awɔ ɔnyā nūma̍ lɔ̄kū kpa̍a! Ɔjā nīi a chikpo̍ ma̍, Ɔwɔ ge̍ ya̍ i̍ngɔ̍ɔ de wɔ gɛ!” Bū la yɛ̄gɛ̄grāa ɔla̍ā ɔpɔ̄ɔpɛ̄, ɔyi̍ yī ɔnyā ɔla̍ā de lɛ cha̍cha̍ i̍ngɔ̍ɔ ke̍e̍.

Iji̍sɔ̄ɔsi nyiya āchɛ yɛ̄mɛ̄mɛ̄

29Iji̍sɔ̄ɔsi wā ge̍ pīya hī ɛbɛ ɔla̍ā, yɛ i̍ngɔ̍ɔ ba̍ Li̍hu yī Iga̍līli ɔbɔ̍ɔ̄ba̍ ga iyɔ̄bū. O̍ tīichō yī u̍kpo̍chi ɔha̍, pīya hyāhɔ̄ abɔ̍ɔ. 30Ribi yī āchɛ yɛ̄mɛ̄mɛ̄ pɛ̍ kpɛ̍ɛ wā dikpo̍ba̍ ɔ̄ abɔ̍ɔ. E̍ bī āchɛ okwi̍kpo̍ oko̍ōku̍, āchɛ epriyī, āchɛ ɔgbā ngunungunu, āchɛ ogwōko̍o ba̍la āchɛ ekwi̍īyē ita ɔha̍ yɛ̄mɛ̄mɛ̄ ge̍ gblāa la apli̍kpo̍ yī Iji̍sɔ̄ɔsi. Iji̍sɔ̄ɔsi de wa̍ nyiya cha̍cha̍. 31O̍ de ya̍ āchɛ ɛla̍ā lɛbɛ̍bi̍ ɔlamu-ɔlamu. Wu̍chē oji̍ nɛ, e̍ ma̍ āchɛ ogwōko̍o nīi de kɛlā; e̍ ma̍ āchɛ ɔgbā ngunungunu nīi de lɛ kpra̍kpra̍; e̍ ma̍ āchɛ okwi̍kpo̍ oko̍ōku̍ nīi de yɛɛ; e̍ chī ma̍ āchɛ epriyī nīi de myɛ̍ma̍. Wu̍chē yī ɔla̍ā, aa̍ wa̍a̍ kā Ɔwɔ yī I̍sɛ̄rɛli ɔkɔ̄kā.

Iji̍sɔ̄ɔsi bī āchɛ u̍nɔ igwo̍ la ojōre̍

(Ima̍aki 8:1-10)

32Iji̍sɔ̄ɔsi hī a̍chi̍kpo̍ yī nū ɛra̍ koko̍o de wa̍ hīka, “Āchɛ nūma̍ lɛ u lɛhɛ̍ha̍ kpɛ̍ɛji. Wu̍chē oji̍ nɛ, e̍ gblāa amu tāa ami ɔ̄chī ɛta̍ mɛ̍. U̍ma̍ama, e̍ i̍ lɛ ɔjɔ̄jā ge̍ē re̍ ē gɛ ni̍. N i̍ chikpo̍ ge̍ē ka ē de wa̍ nīi e̍ ē pīya ji lɛmiyɛ lipu̍ ni̍; nɛ̄ni̍, āchɛ ɛha̍ yī wā ge̍ē pra̍a kpɛ̍tɛ̍kpɛ̍tɛ̍ la ɔpɔ̄pū.”

33A̍chi̍kpo̍ yī nū che ɔ̍ ikpo̍ bɛ̍ɛ̄nɛ̄ hīka, “Aba̍ chī hɔ̄ amu lipu̍ a̍chi̍ chukuru nūma̍ nīi alɔ ge̍ē ma̍ ojōre̍ mwɛbɛ ē de ē de okru̍utu yī āchɛ nūma̍ wa̍a̍ ma̍?”

34Iji̍sɔ̄ɔsi che wa̍ ikpo̍ ka ibrɛ̍ɛdi ɛmla̍a nīi ɛ̍lɛ bī abɔ̍ɔ ma̍?

E̍ ka de ɔ̍ ka ākpā yī ibrɛ̍ɛdi arāapa ba̍la a̍yu̍u ɛha̍ pi̍nyɛ̍ ɔ̍lɔ bī abɔ̍ɔ a̍nɛ.

35Bū la ɛbɛ ɔla̍ā, Iji̍sɔ̄ɔsi ka de alɔgbādu ɔla̍ā wa̍a̍ ka ɛ̍lɛ ge̍ hyāhɔ̄ la ajɛ. 36O̍ nāa ākpā yī ibrɛ̍ɛdi arāapa ba̍la a̍yu̍u ɛla̍ā bī la abɔ̄, da Ɔwɔ o̍be wu̍chē yī ojōre̍ ɔla̍ā. O̍ de ɔ̍ hɛ̍ wa̍a̍, de nāa de a̍chi̍kpo̍ yī nū; a̍chi̍kpo̍ yī nū de kɔ̄ de āchɛ ɛla̍ā wa̍a̍ bɛ̍ɛ̄nɛ̄. 37Aa̍ wa̍a̍ re̍ nīi o̍ jɛ̄ wā hwɔhi hwɔhi. A̍chi̍kpo̍ yī Iji̍sɔ̄ɔsi gāa ge̍ kpo̍ irwi yī ojōre̍ ɔla̍ā nīi jɛ̄ wā hōhī ma̍ tū la obri̍bri̍ arāapa mōmu-mōmu. 38Āchɛ ke̍e̍ nīi re̍ ojōre̍ ɔla̍ā ma̍ lɛ āchɛ u̍nɔ igwo̍, anyā ba̍la aɛ̍pɛ̄ i̍ tū ni̍.

39Iji̍sɔ̄ɔsi ka nīi āchɛ ɛla̍ā pīya bɛ̍ɛ̄nɛ̄. Anu̍ ɔlɔjā gatū ga wɔwu̍ pīya ga ajɛ yī Ima̍gādan.

Attualmente Selezionati:

Ima̍tiyu 15: YBASR

Evidenziazioni

Copia