SGK 9

Lawa a lɛ kɔ kɔn la ka Nowee-n boo

1 # SGK 1.28 Lawa barka wɔ Nowee laanka a nɛnyaanan nɛ, á pɛ ǹ nɛ kɛnɛn: «Ka nɛnyaanan yɛ, ka mɔnaa, ka tán pã. 2Tán màn yiikoonaa tumaa laanka bàanan tumaa á re nyɛ́ɛbiɛ ka nɛ parsiini, ka zɔ̀nɔn nɛ. Bɛn tumaa tá ka gɔn. 3Màn yiikoonaa mɛn tumaa bɛ́ fɔfoã sii, bɛ tumaa á re kaa màn-bii biɛ. Masɛ bɛ́ má luu buruu kɔ ka la lɛlɛ lɔn, man kɛ tumaa dɔ koe ka la miɛ̃. 4#LWS 7.26-27; 17.10-14; 19.26; TDP 12.16,23; 15.23 Sɛnɛ, ka baran siĩ sɔ̃, ka a mà ná a-n wa. A giala, yiikoonaabaa lɛ n mà nɛ. 5Bɛ̀ tɔɔ min dɛ, ma á re dɔlɔ boe a ganaa. Bɛ̀ min nə́ ǹ miã dɛ, ma á re dɔlɔ boe bɛa dɛnaa ganaa.

6 # BBN 20.13 Bɛ̀ min min nyin bɔ,

min kɔsɔ á die bɛa dɛnaa dɔ nyin boe.

A giala, Lawa na á minbuiin nɛ zɛnaa

a din a kɔnboe lɛa.

7 # SGK 1.28 Kasɛn nə nɛ gigiã yɛ, ka mɔnaa tán la.»

8Lawa tɔ́n pɛ Nowee laanka a nɛnyaanan man kɛnɛn: 9«Ma dinmaa n die lɛ kɔ kɔn la we kɔn ka nɛ, ma doa kɔn ka ka tɔrɔn dɔn nɛ ka kio, 10ka màn yiikoonaa tumaa dɔ nɛ: bàanan nɛ, piɛ mànan nɛ, don mànan nɛ, mànan mɛnɛn dinin tumaa bɛ́, ǹ nə́ soo goo lɛ-n kun ka nɛ. 11Ma bɛ́ lɛ kɔ kɔn la mɛn we ka ka nɛ, bɛ á ke: Màn yiikoonaa kɔ́n ba re bɔ̀n biɛ ka bɔ̀n da ǹ mu gole-n doo wa, bɔ̀n da ǹ mu gole a re yii doo a kanaa ziziɛ̃ wa. 12Maa lɛ kɔ kɔn la lɛ a sii nyaa ǹ sii n ka kɛ nɛ, ma á re koɛ ma din laanka ka bii ni, ka màn yiikoonaa tumaa nɛ. A n biikoo tumaa a minbuiinin wɔ lɛa. 13Man má lamɛn da labara gɔ̀nɔn ganaa, má a n baa lɛ kɔ kɔn la ǹ sii nyaa ǹ sii lɛa, masɛ laanka kanaa bii ni. 14Bɛ̀ ma labara sɔkɔn lon lɔn, ka lamɛn lɛ yɛ, ma lɛ kɔ kɔn la mɛn wɔ kɔn ka nɛ, ka laanka màn yiikoonaa tumaa nɛ, 15ma á re n yiri koɛ bɛ nɛ. Mu ba re yii miɛ̃ doo, a gole kɔ, a màn yiikoonaa kɔ́n bɔ̀n baa wa, haalɛ tà a mànan dan din nə lɔn. 16Lamɛn lɛ bɛ́ re boe lon, bɛ̀ masɛ Lawa ga a ganaa, ma lɛ kɔ kɔn la mɛn wɔ ka màn yiikoonaa tumaa nɛ duduu wɔ lɛa, lɛ bɔ ná a ba a-n wa, ma á re n yiri koɛ bɛ nɛ.» 17Lawa tɔ́n pɛ Nowee ne: «Màn yiikoonaa mɛn tumaa bɛ́ tán la, masɛ lɛ kɔ kɔn la mɛn doa kɔn-a ǹ nɛ, lamɛn lɛ n bɛa sii nyaa ǹ sii lɛa.»

Nowee a nɛgiĩ sɔɔ boo

18Nowee a nɛgiĩn mɛnɛn nə soo goo lɛ nɛ, Sɛmu laanka Kaamu ni ka Zafɛti ni. Kaamu n Kanaan a díi lɛa. 19Nowee a nɛgiĩ sɔɔ lɛ n ka bɛn nɛ. Minbuiinin wusoo a mɔnaa tán la giala na á n kɔ ǹsɛn lɛn ganaa.

20Nowee na á n baa tán-kɔsɔli bibinaa lɛa, á *rezɛ̃ da wuru bɔ. 21Á da nɛ lɛ a mu baa yɔ lɛa, á mi yǎa á wɔ a yii ni, á n tontoro da tán a kion gɔ́ɔ̃ nɛ. 22Kanaan di Kaamu nə́ ǹ di lɛ tontoro yɛ, á woo pɛ ǹ dɔɔ̃n min paa lɛ-n kanaa. 23Sɛmu laanka Zafɛti dɔnkɛ gole saa, didie kũ a lɛ koro ganaa a nyàa kóo la, ǹ nə́ tɔ wɔ ka ǹ kio ne, ǹ nə́ woo ǹ di lɛ a sìi duru. Ǹ bɛ́ ǹ nə́ n dɔ̀ɔ̃ wɔ ǹ di lɛ nɛ, ǹ nə́ n yɔrɔ dia bǎã kɔsɔ nɛ, ǹ na a sìi yɛ wa. 24Nowee a yɔ lɛ bɛ́ á toɛ̃, á n bɔ a yii ganaa ǹ mɛn waáraa, a nɛgiĩ boɛɛn lɛ sii mɛn zɛnaa, á bɔ a siére-a. 25Á tɔ́n pɛ: «Koe die a bɔ Kanaan ganaa. A die a n baa ǹ dɔɔ̃nɔn lɛn bɛ̀rɛn bɛ̀rɛ lɛa!» 26Bɛ kio á pɛ: «Gugurubaa nə n kɔ Dɛnaa, Sɛmu a Lawa la. Kanaan die a n baa Sɛmu a bɛ̀rɛ lɛa! 27Lawa die a n gɔn pã a da Zafɛti lon. Lawa die a giã Sɛmu a zàã nɛ. Kanaan die a n baa a bɛ̀rɛ lɛa.»

28Nowee na á lɛ̀ biɛsɔɔ ka posooro (350) zɛnaa kanaa, bɔ̀n da ǹ mu gole lɛ a kiɛ̃ kio. 29A na á lɛ̀ biɛmanangɔrɔ ka posooro (950) zɛnaa kanaa, á tɔ́n gã.

Attualmente Selezionati:

SGK 9: SBPE2011

Evidenziazioni

Copia