A Matye koe‑noogo 2
2
Yam dãmb waame n na n ges a Zeezi
1A Zeezi sẽn dog Betlehɛm Zʋʋde soolem tẽngã pʋgẽ wã, rĩm a Erood zamaanẽ, gese, yam dãmb yii yaang n wa Zeruzalɛm n soke: 2Zʋɩf-rãmbã rĩmã sẽn nan dogã bee yɛ? Bala, tõnd yãnda bãmb ãdg yaanga, la tõnd waame n na n waoog bãmba.
3Rĩm a Erood sẽn wʋm dẽnda, yẽnda ne Zeruzalɛm dãmbã fãa yɛɛsame. 4Erood tigma tẽngã maan-kʋʋdbã kãsem-dãmbã fãa ne tõog karen-saam-dãmbã n sok-b Kiris sẽn dag n tog n dog tẽng ningã. 5Bãmb yeela yẽnda tɩ yaa Zʋʋde Betlehɛm, bala Wẽnnaam no-rɛɛsã dag n gʋlsame n yeel a woto:
6 #
Miis 5.1
«Foom Betlehɛm, Zʋʋda tẽnga,
yaa vẽeneg tɩ fo ka poorẽ
Zʋʋda tẽn-kãsemsã sʋk ye.
Bala, naab n na n yi fo pʋgẽ
n dɩlg Israyɛll sẽn yaa mam nebã.»
7Woto, Erood soosame n bool yam dãmbã n sok-b neere n bãng ãdgã sẽn puk wakat ninga. 8Yẽnda tʋma bãmb Betlehɛm n yeel-ba: Kẽng-y n tɩ bao-y n bãng-y biigã yell neere, la y sã n yãnd-a, bɩ y lebg n wa togs-ma, tɩ mam me tõe n kẽng n tɩ waoog-a.
9Bãmb sẽn kelg rĩmã goam n sɛ, b loogame. La haya, ãdg ning bãmb sẽn dag n yãnd yaangã lʋɩɩ bãmb taoore, la a sẽn ta zĩig ning bi-bilfã sẽn be wã, a yalsame. 10Bãmb sẽn yã ãdgã, b paama sũ-no-kãsenga. 11Bãmb kẽe roogẽ wã, la b yãnda biigã ne a ma a Maari, la bãmb wõgemdame n waoog biigã. Dẽ poore, bãmb logsa b kordo, n yãgs kũun n kõ Bãmba: yaa sãnem la wisdu, la miir sẽn tar yũ-noogo. 12La Wẽnnaam sẽn sagl bãmb zãmsd pʋgẽ tɩ b ra leb n tũ a Erood nengẽ, bãmb dɩka sor a to n kuili.
Betlehɛm kom-bãooneg kʋʋbo
13Bãmb sẽn looge, Zu-soabã malɛɛk puka a meng ne a Zozɛf zãmsd pʋgẽ n yeel-a: Yik n dɩk biigã ne a ma n zoe n kẽng Ezɩpte. Zĩnd be hal tɩ mam leb n wa n gom ne foom. Bala, Erood na n baoo biigã, sẽn na yɩl n kʋ-a. 14A Zozɛf yikame n dɩk biigã ne a ma ne yʋngo n kẽng Ezɩpte. 15#Ooz 11.1La yẽnda zĩnda be hal tɩ ta Erood kũum, tɩ bũmb ning Zu-soabã sẽn dag n gom ne b no-rɛɛsã noorã paam pidsgu. Bãmb yeelame:
Mam boola m biigã t'a yi Ezɩpte.
16La Erood sẽn mik tɩ yam dãmbã belga yẽnda, a sũurã puuga hal wʋsgo, t'a tʋm neb Betlehɛm ne a tẽn-kɩremsã tɩ b tɩ kʋ kamb nins fãa sẽn zems yʋʋm a yiibu la sẽn ka ta woto me, sẽn zems yẽnda sẽn dag n sok yam dãmbã n bãng ãdgã sẽn puk wakat ningã wã. 17Woto, Wẽnnaam no-rɛɛs a Zeremi sẽn dag n togsã paama pidsgu. A yeelame:
18 #
Zer 31.15
Koɛɛg n zẽk Rama,
yãbr la wiis-kãsemse.
Yaa a Rasɛll n yãbd a kamba,
la a ka sakd belsg ye,
a kambã sẽn ka be wã yĩnga.
19La Erood kũumã zugẽ, Zu-soabã malɛɛk puka a meng ne a Zozɛf zãmsd pʋgẽ Ezɩpt tẽng n yeel-a: 20Yik n dɩk biigã ne a ma n leb Israyɛll tẽnga, bala neb nins sẽn dag n baood biigã n na n kʋ wã kiime. 21La a Zozɛf yik n dɩka biigã ne a ma n leb Israyɛll tẽnga. 22La yẽnda sẽn wʋm t'a Arkelawuus reega a ba zĩig n dɩt naam Zʋʋde wã, yẽnda zoee rabeem n ka kẽng be ye. La Wẽnnaam sẽn sagl yẽnda zãmsd pʋgẽ yĩnga, a kẽnga Galɩle soolmẽ, 23#Mark 1.24, Luk 2.39, Zã 1.45la a tɩ zĩnda tẽng a ye pʋg sẽn boond tɩ Nazarɛte, tɩ bũmb ning Wẽnnaam no-rɛɛsdbã sẽn dag n togsã paam pidsgu. B yeelame: «B na n boola yẽnda tɩ Nazarɛt neda.»
Attualmente Selezionati:
A Matye koe‑noogo 2: MPBU
Evidenzia
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Moore Bible © Bible Society of Burkina Faso, 2014.
