Mwamulizo 7
7
Lihwazi lye malenga
1U Muwaha Mulungu yakamulonjela Noha yakatya, “Alu, vyono yo gwegwe du, mono nghuwene yo wuli munhu we ling'ani, mu vilo vyako vyose, ale, alu winjile mu Safina, gwegwe, hamonga ne mhuga yako yose. 2Ninga wusoleleze hamonga ne vilimu vyono vyelile, mupunghati mupunghati, nume ne nyhekulu, na kuli avilya vyono si vyelile, wuvisolaje vyejete vyejete du, nume ne nyhekulu. 3Kanyhi wusoleleze ne zindeje zono zikwanga mucanyha, nazo wuzisolaje mupunghati mupunghati, nyhekulu ne nume. Na yiyi ho yiwe yo nzila yo kusuma kuyiwicila i mbeyu yayo, ho yijendelele kuwa mono'nze. 4Nane kolo vyapuluta vilo mupunghati, notonyeza mvula mbaha muno muno, mu vilo makumi mane misi ne cilo, hamba kuceheza yaye. Nane novyongomezeza lukulu i viwumbwa vyose vyumi vyono navinoza.” 5Nayo Noha, yakazinoza zose nha vyono u Muwaha Mulungu yamulajiliza.
6Nayo Noha yali yaficile myaka magana mutandatu, lono Mulungu yaletela lihwazi mono'nze. 7Nayo Noha no mugolece wakwe, wanagwe nawo ne wagolece zawo, wose wakenjila mu Safina, ho wasume kupona mu wufwila mwi'hwazi lye malenga. 8Ne vilimu vyose vyono vyelile, na vyose vyono si vyelile, ne zindeje hamonga ne viwumbwa vyose vyono vitambalaga hasi, 9vyose vikenjila vyejete vyejete mugati mu Safina hamonga na Noha, nha vyono Mulungu yamulajiliza Noha. 10Navyo vilo mupunghati vyali vyeza kupuluta, hodu lihwazi lye malenga likawa kuza mono'nze.
11Nayo Noha lono yali yaficila myaka magana mutandatu, mwi'zuwa lye likumi na mupunghati lya mu mwezi we kejete wa mu mikalile yakwe, mwi'zuwa lilyo, i mivwilo ye malenga yono yili hasi muno muno ye'si, yikawa kwanza kuvwila no kuhuluma kwe vilungo muno muno. Madilisha ga ku wulanga nago gakadiguka. 12Ne mvula yikawa kutonya mono'nze mu vilo makumi mane misi ne cilo, hamba kuceheza yaye. 13Nayo Noha, hamonga no mugolece wakwe, ne wana wawo wa Semu na Hamu na Yafeti, hamonga ne wagolece zawo, wose wakenjila mu Safina mwi'zuwa lilyo lono mvula yamulila kutonya. 14Nawo wakenjila weneco, hamonga ne mawala gose ge vilimu vya mu mbago, ne mawala gose ge zimitugo, ne mawala gose ge vilimu vyono vitambalaga, hamonga ne mawala gose ge zindeje. 15Nayo Noha yakenjila mu Safina hamonga ne viwumbwa vyose vyono vikwehela, vyejete vyejete, 16nha vyono Mulungu yamulajiliza. Nayo Mulungu yakawa kuwudinda u mulango we Safina.
17Nalyo lihwazi likawa mono'nze vilo makumi mane. I malenga gali geza kucila kumema, gakawa kuyinula Safina hacanyha ye yisi. 18Nago malenga gakacila kumema muno muno mono'nze yose, sunga ne Safina yikawa kwelela mucanyha yago. 19Ne malenga gago gajendelela konjelezeka kwe vilungo muno muno, sunga ne matunda i matali muno muno ga mono'nze, yose gakagubicizwa ne malenga. 20Ne malenga gago gasuma kugagubiciza matunda, mita mupunghati na nusu hasi yago. 21Ne viwumbwa vyose vyumi vya mono'nze, vyose vikafwa, zindeje, zimitugo, ne vilimu vya mu mbago, hamonga ne matewa gose ge viwumbwa vyose vya mu yisi nghavu, sunga ne wanhu wose kono walila, 22heya i viwumbwa vyose vyono vikwehela vya mu yisi nghavu, vyose vikafwa. 23U Mulungu yakavyongomezeza lukulu i viwumbwa vyose vyumi vyono vyali vili mono'nze, wanhu wose, vilimu, ne viwumbwa vyono vitambalaga, sunga ne zindeje zose zono zangaga mucanyha, vivyo vyose, vikongomezezwa lukulu. Wono wasigala, wali wo wa Noha du, hamonga na wawalya wono wali wali hamonga na Noha mugati ye Safina. 24Ne malenga gago gakekala mono'nze mu vilo yigana limonga na makumi mahano.
Attualmente Selezionati:
Mwamulizo 7: LLKWW
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Cigogo Bible © Bible Society of Tanzania, 2002.
