Matayo 3

Matanantyo amwa Yohana Mubadisi

(Mrk 1:1-8; Luk 3:1-18; Yoh 1:19-28)

1Matiku asaa Yohana Mubadisi agadwëëra, agaandya utanantya mu mbugha a uYudea: 2“Fëi, gusoko utemi wa girunde wahumbeeraa.” 3Gusoko uyuu unë wasuu nënaa munyagëdaghu Isaya agamurëghëtya nënaa agahanya:

“Ruri wa muntu wategheeyekaa u mbugha:

‘Mughondanëëyi Müküü njia akwe,

vighoori vikëro vya njia yakwe.’”

4Yohana agaria isaa nënaa rëtumiwe gwa makinga a ngamëa na mukhova wa ndëë mu gëëno gakwë. Ilëwa rakwe naa nkumbë na wukë wa gihaka. 5Uvii, antu ufuma uYerusalemu, ufuma gitumbë roong'e ra uYudea na ng'andë yoong'e ya umpeompeo a yongo ra uYoridani, vëgamwendea, 6vëgayafëa mahutye awe, mweesonoo agavabadisa mu yongo ra uYoridani.

7Ëgweeso nënaa wavoona Afarisayo vingë nanë Asadukayo vëumwendea avabadise agavëëra, “Nyee ufafo wa njoka! Anyu nëwamukene mwino muudaha ginegha iramuëywa nërëjie? 8Raghëëri, uvii, gwa ntendo, mwino tutë mwafëaa. 9Mutasëghee mwino mudaha gijëfya gwa uhanya, ‘Sese gwë ufafo wamwa Iburahamu!’ Ngumukhanëa fana tutë, Muungu ugudaha ufuma umagwe ayaa uhanga vana vamwa Iburahimu. 10Uvii, itungwee gëhendo gëvëkiwe mumatina a mëtë, faafo, mu mutë nëutiufaa nkhari në njija, ugutemwa na ughumëwa mumoto.

11“Nene ngumubadisa gwa majë gwa ufëa mahutye. Ëgweeso wasuu nëujie unyuma anë una udaho ukëra nene. Nene ntinoneye mbesa ukenka maatu#3:11 Ukenka maatu: Ukenka maatu arë mwëmo wa atughwa. akwe. Mweeso ujie umubadisa nyenye gwa Mwahu Mweru na gwa moto#3:11 Gwa moto: Ryana rayo ni gweriwa. 12Mweeso ukwatëëre mumukhono wakwe mufivitëo wa ufuëra ngano, aifure ngano yakwe, aihwaangwiye ngano mwiseengwa na ifuero ugurëacha gwa moto nëutiurimaa.”

Ubadiso wamwa Yesu

(Mrk 1:9-11; Luk 3:21-22)

13Itungo rësëë Yesu agadua uGalilaya agafika mu yongo ra uYoridani agamwendea Yohana gusoko abadiswe na mweeso. 14Ëgweeso Yohana naaudahëte umughiiya uguhanya, “Inoneye nene ubadiswa na veve, wurë, veve ujie kunë nene?” 15Ëgweeso Yesu agamusucha, “Reka ëtendeke uvii itungwee gusoko inoneye guyatende asaa oong'e në Muungu ugufenja ëtendeke.” Faafo Yohana agarumëëya. 16Gënyafaafo gutufu Yesu nënaawabadiswa, agafuma mumajë, na muufafo irunde rëgarughuuka na agoona Mwahu wa Muungu ugika mwino nkurwë na gëkhaa gunto akwe. 17Ruri ufuma girunde ugahanya, “Uyuu unë Mwananë muyanjwi, nëyanjisiwe na mweeso.”

Attualmente Selezionati:

Matayo 3: RNT

Evidenziazioni

Copia