Luka 22

E’yo otuzu Yesu ma ruaari

1 # Mat 26:1-5; Mar 14:1, 2 Omu mikate akufi kokoru nyazuri eca ogogo, omvele Agaza ’ba drilesiri’i. 2#Luk 20:19’Ba wara kuhaniru ’diyi pi ’ba azita sipi ’diyi be yi nda geri eri fuzuri; te yi ru ’bani. 3#Mat 26:14-16; Mar 14:10, 11#Yoh 13:2, 27Satani nga fi Yudasi omvele Isikarioti’iri ma alia, eri’i ’ba mudri drini iri ’diyi ma eseliari, 4Eri nga mu e’yo ’yozu ’ba wara kuhaniru ’diyi pi be, opi asikari ma drilia ’diyi pie, geri ndazu eri fezu yi dri. 5Yi ovu ayikosi, yi azi silingi fezu eri dri. 6Eri a’i ra, nga geri nda eri fezu yi dri de ’ba ongulumuru yi yo.

Yesuni omu agaza ’ba drilesirini nyazu ba erini imbale ’diyi beri

7 # Mat 26:17-29; Mar 14:12-25 # Efu 12:18-20 O’du mikate akufi kokoruni eca ra, o’du ndesi yi adri kabilo agaza ’ba drilesiriniri li. 8Eri pe Petero pi ma ti Yohana be, ’yozu kini, Emi mu agaza ’ba drilesiri edezu ama dri, ama ma nya. 9Yi ’yo eri tia, Mi le ama ma ede ngoa ya? 10Eri ’yo yi tia, Mi ndre, emini firia aku amboria, emi nga dri fu agupi yilemvu beri be; emi la vutini kpere jo erini fizuria, 11emi ’yo jo e’i ma tia, ’Ba ’ba Imbapiri ’yo mi tia, omuni, pari mani ngazu agaza ’ba drilesiri nyazu alenia ’ba mani imbale ’diyi beri ngoa ya? 12Agu nderi nga emi dri jo aliza amboru uruleruri ece edezaru afa dria be; emi ’ba afa ngonde ’daa. 13#Luk 19:32Yi mu ra, yi isu ekile erini ’yole yi tiarile; yi nga di agaza ’ba ’drilesiri ede ani.

14Etu ka eca ra, eri ri va ’ba erini ti opele ’diyi be. 15Eri ’yo yi tia indi, Ma le omu agaza ’ba drilesi ’diri nyazu emi be avasi tu, de nga yi ecandini ma ku; 16#Luk 13:29te ma ’yo emi tia, ma ngani eri nya dika ku, de nga eri ’yeni i i paria suru Munguniria ku. 17Eri nga okele ’du, ka awa’difo fe ’bo, eri ’yo, Emi ’du ’diri, awa emi eselia; 18te ma ’yo emi tia, engazu curu’do ma ngani efi zabibuni ’yaleri ma su mvu dika ku, de nga suru Munguni ecani ku. 19#1 Kor 11:23-25; ’Yeta 27:35Eri ’du mikate ra, eri ka awa’difo fe ’bo, eri anyo aleni, awa fe yi dri, kini, ’Di rua mani, fele emisiri. Emi ’ye ’dri ma egazu. 20#Efu 24:8; Yer 31:31; Zek 9:11Nyaka ma vutia eri nga okele ’du ’dinile indi, kini, Okele ’diri eri e’yo aziza o’diru ari mani rapi emisiri ma aliari. 21#Yoh 13:21, 22Te mi ndre, ’ba ma o’di nyapiri ma dri ovu maniri be mesa dria. 22Te adaru Mvi ’bani mu di geri edele eri dri driori ma alia ra; te candi agu eri ma o’di nyapi ’dari dri! 23Yi ’ba e’yo ozi yi eselia, kini yi eselia a’dini ’ye e’yo ’diri ’yeni ya.

Agata gazu a’dini amboru ndenini ya

24 # Mat 18:1; Mar 9:34; Luk 9:46 Yi’ba agata ga yi eselia, kini ’ba yi eselia egale amboru tori eri a’di’i ya. 25#Mat 20:25-27; 10:42-44; Mar 10:42-44Eri ’yo yi tia, Opi ’ba jururu ’diyini adri yi drilia opiru okposi; azini omve ’ba yi drilia azita fepi okposi ’diyi ma ru, ’Ba azi ’yepi onyiru ’diyi. 26#Mat 23:11; Mar 9:35Te emi ma ovu ’dinile ku; te ’ba amboru agapi ra emi eseliari ma ovu ekile osipi vilerile, azini ’ba ’ba dri cepiri ma ovu ekile ’ba ’ba aza kopi azisirile. 27#Yoh 13:12-15Te ngori aga ra, kani ’ba ripi mesa tiari’i, kani ’ba ’ba aza kopi azisiri’i ya? Eri ’ba ripi mesa tiari’i ku ya? Te ma ovu emi eselia ekile ’ba ’ba aza kopi azisirile.

28Te emi ovu ’ba adripi tepi ma be tualu obeta mani ma alia ’diyi; 29#Luk 12:32ekile ma Atini suru nyaza azile ma dririle, 30#Mat 19:28’dinile ma azi emi dri emi ma nya, emi ma mvu, mesa mani ma tia suru nyaza mani ma alia, emi ma ri vini oguna ma dria suru Israelini mudri drini iri ’diyi ma e’yo lizu.

Yesuni e’yo Peteroni ngazu eri gazuri ecezuri

31 # Mat 26:31-35; Mar 14:27-31; Yoh 13:36-38 # 2 Kor 2:11; Amo 9:9 Simoni la, Simoni la, mi ndre, Satani a’i emi o’bizu, emi ndrizu ko’bisi anyale. 32#Yoh 17:11, 15, 20; Zab 51:13te ma’i, ma zi i Mungu matusi misi ’bo, ’dini a’ita mini ma de i ku beni; te mi’i, mi ka mi oja dika ’bo, mi ’ba di mi adripi ma asi okporu. 33Eri ’yo eri tia, Opi, ma ovu ngonde muzu mi be arujoa, kpere dra vu indi. 34Eri ’yo ra, Petero, ma ’yo mi tia, de nga a’nata ’beni cere andru ku, mi nga ma ga si pale na, kini mi nini ma ku.

Okporo, jurua pie, sei pie

35 # Mat 10:9-10; Mar 6:8-9; Luk 9:3; 10:4 Eri ’yo yi tia, Ma ka ndra emi ti pe ovuzu okporo kokoru, jurua kokoru, enyiriko paari kokoru, afa azini ma alio nde ndra emi ra ya? Yi kini, Yo. 36Te eri ’yo yi tia, Te curu’do okporo e’i ma ’du di iniri, jurua e’i ma ’ye ’dinile indi. ’Ba sei kokoruri ma ozi bongo ’beza erini, ma je sei ani. 37#Isa 53:12; Luk 22:52Te ma ’yo emi tia kini e’yo yini sile ’diri ma ’ye i ma ruaa, ’yozu kini, La eri ’ba ezapi ’diyi ma aziru; te e’yo sile masiri ovu ’yeza ini i pariari be. 38Yi ’yo ra, Opi, mi ndre, sei iri yi ’doa. Eri ’yo yi tia, Fu dri ra.

Yesuni Mungu zizu Getesemaniari

39 # Mat 26:30, 36-46; Mar 14:26, 32-42 # Luk 21:37; Yoh 18:1 Eri efu amve, mu oni Mizeituniri ma dria erini adrile ’yelerile; ’ba erini imbale ’diyi nga eri vuti bi indi. 40Eri ka eca pari nderia eri ’yo yi tia, Emi zi Mungu emi kazu fizu obeta ma alia ku. 41Eri nze i esele yi be were, ekile ’bani ecole oni ’bezu rarile, eri nga kumuti osi va Mungu zizu, 42#Mat 6:10kini, Ata, mi ka le ra, mi ’du okele ’diri ma vurisi ra; te e’yo mani leleri’i ku, te e’yo mini leleri ma ’ye’ini. 43#1 Opi 19:5; Yoh 12:29Malaika engapi ’buari e’da i eri vu, okpo fezu eri dri, 44Erini ovuria candisi amboru, eri zi asi driasi aga okori ra; ondi erini oja i ekile ari i olipi otipi va nyakuarile. 45Eri ka enga erini Mungu zizu ’boria, eri emu ’ba erini imbale ’diyi vu, nga yi isu o’du koria candisi; 46eri ’yo yi tia, Emi o’du ko a’disi ya? Emi enga uru; emi zi Mungu, emi kazu fizu obeta ma alia ku.

Yudasini Yesu ma o’di nyazuri

47 # Mat 26:47-56; Mar 14:43-49; Yoh 18:2-11 Erini nga e’yo ’yoria, mi mire, ’ba ongulumuru eca, de agu ’bani omvele Yudasi’i, ’ba mudri drini iri ’diyi ma azi aluri, ce yi ma drini. Eri, esi Yesu vu inyia, o’boloni ndruzu; 48te Yesu ’yo eri tia, Yudasi, mi Mvi ’bani fe ari’ba dri o’bolo ndruzasi ya? 49’Ba eri ma ageia ’diyi ka e’yo ngapi i ’yepiri ndre, yi ’yo ra, Opi, ama ma oga yi seisi ya? 50’Ba alu yi eseliari ga ati’bo ’ba kuhani agapirini, li bini dri ndiari va. 51Te Yesu nga e’yo omvi ’yo ra, Mi ku nga ’dipi! Eri nga bini elo, nga eri ati ra. 52#Luk 22:37Yesu nga ’yo ’ba ’wara kuhaniru ’diyi pi ma tia, ambo asikari ma drilia hekalua ’diyi pie, ’ba ’wara be, emupi eri vu ombasi ’diyi, kini, Emi efu sei pi emi dria abeleku pie, ekile oguou bizurile ya? 53#Luk 19:47; 21:37; Yoh 7:30; 8:20; Kol 1:13Mani ovuria emi be hekalua etuzu, emi ejuni dri ma bizu ku. Te ’diri eri etu emini, azini okpo ininiri indi.

Peteroni Yesuni gazuri

54 # Mat 26:57, 58, 69-75; Mar 14:53, 54, 66-72; Yoh 18:12-18, 25-27 Yi bi eri ra, ji eri ofizu kuhani agapiri vile joa. Te Petero nga eri vuti bi re. 55Yi ka ad edu aku ma eselia agadua, yi ka ri va tualu, Petero ri yi eselia indi. 56Zana alu ndre erini riria aci diza ma tia, nga eri ni ’dani, eri ’yo ra, ’Ba ’diri ovu eri be indi. 57Te eri ga si, kini, Oku, ma nini eri ku. 58Vutinia were ’ba azini ndre eri ra, nga ’yo ra, Mi indi, mi ’ba yini. Te Petero nga ’yo, Agu la, ma ’ba yini yo. 59Ekile sawa alu ma vutia, ’ba azini ’yo ti mbazasi kini, Adada, ’ba ’diri indi ovu te eri be; erini ovule ’ba Galilianirisi. 60Te Petero nga ’yo, Agu la, ma nini e’yo mini ’yoleri ku. Perepere erini nga e’yo ’yoria, a’nata nga cere o’be. 61#Luk 22:34Opi oja i, nga Peteroni lu. Petero ega e’yo Opini ’yole i tia kini, De nga a’nata ’beni cere andru ku, mi nga ma ga si pale na-ri ra. 62Eri fu amve, eri wu candisi, mindre be tu.

Asikarini Yesuni ecandizuri

63 # Mat 26:67, 68; Mar 14:65 ’Ba Yesuni bipi ’diyi onzi eri, nga eri co indi; 64yi anzu eri mile bongosi, yi zi eri kini, Mi ondri e’yo ’diri nabile! A’di gba mini ya? 65Yi o’yo e’yo azini karakarau eri ruaa eri o’dazu.

Yesuni ’ba e’yo amapi ’diyi ma drilia.

66 # Mat 26:59-66; Mar 14:55-64 Angu ka ati ra, ’ba ’wara ’ba drilia ’diyi pi nga yi oku tualu ’ba wara kuhaniru ’diyi pie, ’ba azita sipi ’diyi pie dria, nga eri ji ’ba yini e’yo amapi ’diyi vu, kini, 67#Yoh 3:12; 8:45; 10:24Mi ka ovu Kristo’i, mi olu amani, Te eri ’yo yi tia, Ma ka olu emini ti, emi ngani ma a’i aluni ku; 68ma ka emi zi ra ti, emi ngani e’yo omvi ku. 69#Dan 7:13; Zab 110:1Te engazu ewu ’dirisi Mvi ’bani nga ri okpo Munguni ma dri ndiria. 70Yi dria ’yo ra, Ka’dini mi di Mungu Mvi’i ya? Eri ’yo yi ria, Emi ’yo ’bo; ma eri’i. 71Yi ’yo ra indi, Ama di kiri ’ba e’yo eti nzepi ’diyi le ’dani a’disi ya? Te ama ngulupi eri e’yo efupi eri tiliari ’bo.

Attualmente Selezionati:

Luka 22: LB66

Evidenziazioni

Copia