E’doza 16
16
Hagari pi mvi Isimaeli be
1 #
Lip 13:2; Luk 1:7; Gal 4:24 Isu de Sarai Iburamu vile okuri tini anzi eri dri ku, te eri ovu zamva ati’boru be, zamva nderi Misiri ezoni, runi Hagari’i. 2#E’do 30:2Sarai nga ’yo Iburamu ma tia, Mi ndre, Yehova oga ma dri mva tiko si; ma zi mi tia, mi fi zamva mani ati’boruri vu; kani ma nga anzi isu eri be ra yani Iburamu nga o’duko Saraini eri ra. 3Iburamuni ndra ovuria angu Kananini ma alia eli mudri ’boria, Sarai oku Iburamuni nga i ati’bo Hagari Misiri ezoruri ’du fe i agupi Iburamu dri okuru. 4#O’be 30:23Eri nga fi Hagari vu, Hagari nga mva isu i ma alia ra; te eri ka ndre i ovu mva be alia ’bo, eri nga oku i drilia opiruri ’ba ovuzu afa tokole i milia. 5#Efu 5:21Sarai; nga ’yo Iburamu ma tia, E’yo onzi ’yele ma ruaari ma ovu mi dria! Ma fe zamva mani ati’boruri mi agatia ’bo, te eri ka ndre i ovu mva be alia ’bo, ma eca eri ma milia afa tokole. Yehova ma li e’yo ama eselia mi berini! 6Te Iburamu nga ’yo Sarai ma tia kini, Mi ndre, zamva mini ovu mi dria; mi ’ye eri be erini ovule onyiru mi miliarile. Sarai nga eri inza ra, eri nga di apa eri ma ageiarisi ra.
7 #
E’do 25:18
Malaika Yehovani nga eri isu langu roko driaria yi a’di ma tia, ada yi a’di geri Suriari ma tia. 8Eri nga ’yo kini, Hagari, zamva ati’boru Sarai vileri la, mi enga ngoa ya? M, te vini mu ngoa ya? Eri nga ’yo rai Ma apa oku ma drilia opiru Sarai ma ageiarisi apa apa. 9#Efe 6:5-9Malaika Yehovani nga ’yo eri ma tia, Mi mvi ’opi mini okururi vu, mi do mi e’yere eri ma palaa. 10#E’do 22:15-18; Mal 3:1; E’do 25:12Malaika Yehovani nga vini ’yo eri ma tia, Ma nga ori mini fe ezuzu kakau tu, ’ba ngani eco yi lazaru ku kalafenini ngale ovule o’birurisi. 11#Efu 2:23, 24Malaika Yehovani nga ’yo eri tia, Mi ndre, mi ovu mva be mi alia, mi nga agimva osi, mi nga runi ’da Isimaeli’i, Yehovani inzata mini ma awu erile ’borisi. 12#E’do 25:18Eri nga ovu ’ba ma eselia akanya asearile, eri ma drini nga ovu ’ba dria ma ruaa, ’ba dria ma drini vini nga ovu eri ma ruaa indi; eri nga adri adripi erini dria ma milia ’aa’daleru. 13#Zab 139:1-12Eri nga Yehova e’yo ’yopi eri beri ma ru ’da ’dini, Mi Mungu ’ba Ndrepiri’i; a’disiku ’yo ra, kini, Mani ovuria ’doa ci ma ndre ’ba ma ndrepiri ra ya? 14E’yo ’disi ’da di yi a’di nderi ma ru Beeri-lahai-roi’i; mi ndre, eri ovu Kadesi pi ma eselia Beredi be.
15 #
Gal 4:22
Hagari nga Iburamu dri agimva osi ra; Iburamu nga mva erini Hagarini osileri ma ru ’da Isimaeli’i. 16Iburamu ma eli ca ci kali aro drini azia ’bo, Hagarini Isimaelini osizu Iburamu driria.
Attualmente Selezionati:
E’doza 16: LB66
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Bible in Lugbara © United Bible Societies, 1966.
