यूहन्ना 5

अठती बौर्षा रै बीमारी बै ठीक केरना

1इन्हां गैला न बाद यहूदिया री एक त्यौहार हुआ, होर यीशु यरूश्लेम शैहरा बै नौठै। 2यरूश्लेम शैहरा न भेड़ फाटका आगै एक पाणी रा सौर (कुण्ड) ती ज़ो इब्रानी भाषा न बैतहसदा बोलिया सा, तेइरै पौंज़ कुफरी ती। 3तिन्हां न बोहू बीमार, कांणै, लँगड़ै होर शुकै शरीरा आल़ै (पाणी हिलणै री आशा न) पौड़िया रौहा ती 4(पर सही बौगता न परमेशवरा रै स्वर्गदूत कुण्डा बै ओसा ती होर पाणी बै हिला ती, पाणी बै हिलांदैआ ज़े कोई पैहलै ओसा ती, सौ ठीक होआ ती, चाहै तेइरी कोई भी बीमारी होली।) 5तौखै एक मांहणु ती, ज़ो अठती बौर्षा न बीमारी न ती। 6यीशुऐ सौ पौड़ु होंदा हेरू होर ऐ ज़ाणिया कि सौ बोहू रोजा न ऐसा दशा न पौड़ु सा, प्रभुऐ पुछु, “कि तू ठीक होंणा चाहा सा?”

7तेई बीमारै यीशु बै बोलू, “ओ मालका, मूँ हागै कोई मांहणु नी ऑथि कि ज़ैबै पाणी बै तलाआ सी, ता मुँभै कुण्डा न उतारलै, पर मेरै पुजदै-पुजदै दुज़ा मूँ न पैहलै उतरा सा।”

8यीशुऐ तेइबै बोलू, “उठ, आपणा माँज़ा च़क होर औंढ फिर।” 9सौ मांहणु तैबै ठीक हुआ होर आपणा माँज़ै च़किया औंढदा लागा। 10सौ बशाँ रा ध्याड़ा ती। तैबै यहूदी, यीशु न ज़ो ठीक हुआ ती, बोलदै लागै, “औज़ ता बशाँ केरनै रा ध्याड़ा सा, तेरा माँज़ा च़कणा ठीक नी ऑथि।”#5:10 मूसै रा बिधान यहूदी लोका बै मुताबक बशाँ रै ध्याड़ै न कोम केरनै रा हुक्म नैंई ती।

11तेइयै तिन्हां बै ज़वाब धिना, “ज़ुणियै हांऊँ ठीक केरू, तेइयै मुँभै बोलू, ‘आपणा माँज़ा च़क, होर हौंड-फिर’।” 12तिन्हैं तेइबै पुछ़ू, “सौ कुण मांहणु सा, ज़ुणियै तौभै बोलू, ‘आपणा माँज़ा च़क, होर हौण्ड-फिर’।” 13पर ज़ुण मांहणु ठीक हुआ ती, सौ भी नी ती ज़ाणदा कि सौ कुणिऐ ठीक केरू, किबैकि तेसा ज़ैगा न बोहू लोकै री भीड़ा री बजहा सैंघै यीशु तौखै न नौठै।

14इन्हां गैला न बाद सौ यीशु बै मन्दिरा रै ब्राम्दै न मिलू, यीशुऐ तेइबै बोलू, “हेर, तू ठीक हुआ सा; दुजिए पाप मत केरदा, ऐण्ढा नी हुआ लोड़ी कि तौ पैंधै कोई महा-क्लेश पोड़ला।” 15तेई मांहणुऐ यहूदी नेतै बै दसु कि ज़ुणियै हांऊँ ठीक केरू सौ यीशु सा।

16ऐसा बजहा सैंघै यहूदी नेतै यीशु बै तंग केरदै लागै, किबैकि प्रभु यीशु ऐण्ढै कोम बशाँ रै ध्याड़ै न केरा ती। 17पर यीशुऐ तिन्हां बै ज़वाब धिना “मेरा बापू परमेश्वर हाज़ी तैंईंयैं कोम केरा सा, होर हांऊँ आपुऐ भी कोम केरा सा।” 18ऐसा बजहा सैंघै यहूदी नेता यीशु बै मकाणै री होर कोशिश केरदै लागे, किबैकि सौ न सिर्फ़ बशाँ रै ध्याड़ै रा कनून चौड़ा ती, पर परमेश्वरा बै आपणा बापू बोलीऐ आपु बै परमेश्वरा रै बराबर बोला ती।

बेटै रा अधिकार

19तैबै यीशुऐ तिन्हां बै बोलू, हांऊँ तुसाबै सच़-सच़ बोला सा, बेटा आपुऐ किछ़ नैंई केरी सकदा, सिर्फ़ सौहै ज़े बापू बै केरदैआ हेरा सा किबैकि ज़ो-ज़ो कोम सौ केरा सा तिन्हां बै बेटा भी केरा सा। 20किबैकि बापू शोहरू न झ़ुरी रखा सा होर ज़ो-ज़ो कोम सौ आपु केरा सा, सौ सैभ तेइबै रिहा सा; होर तेई ऊँई न भी बडे कोम तेइबै रिहाणै, ताकि तुसै हैरान हुऐ लोड़ी। 21किबैकि ज़ैण्ढा बापू मूँऐंदै बै च़किया ज़िंदा केरा सा, तैण्ढै शोहरू भी ज़ुणिबै चाहा सा ज़िंदा केरा सा। 22बापू कोई रा न्याय नी केरदा, पर न्याय केरनै रा सारा कोम शोहरू बै धिनादा सा। 23कि सैभ लोका ज़ैण्ढै बापू रा आदर केरा सी तैण्ढै शोहरू रा भी आदर केरलै। ज़ुण शोहरू रा आदर नी केरदा, सौ बापू रा भी ज़ुणियै सौ भेज़ूदा सा आदर नैंई केरदा।

24 हांऊँ तुसाबै सच़-सच़ बोला सा, ज़ुण मेरी गैला शूणीऐ मेरै भेजणु आल़ै पैंधै बशाह केरा सा, हमेशा री ज़िन्दगी तेइरी सा, तेई पैंधै सज़ा रा हुक्म नैंई होंदा पर सौ मौऊती न पार होईया हमेशा री ज़िन्दगी बै पा सा। 25हांऊँ तुसाबै सच़-सच़ बोला सा तेई बौगता ऐणा, होर ऐबै सा, ज़ुणीन मूँएंदै भी परमेश्वरा रै बेटै री आवाज़ हमेशा री तैंईंयैं शूणीऐ ज़िन्दै होंणा। 26किबैकि ज़ैण्ढा बापू आपणै आपा न ज़िन्दगी रखा सा तैण्ढै शोहरू बै भी परमेश्वरै ऐ अधिकार धिनादा सा कि आपु न ज़िन्दगी डाऐ। 27बल्कि तेइबै न्याय केरनै रा भी अधिकार धिनादा सा किबैकि सौ मांहणु रा शोहरू सा।

28 ऐसा गैला न हैरान मता हौन्दे, किबैकि सौ बोक्त एज़ा सा, ज़ेतरै कब्रा न सी, तिन्हां तेइरा वचन शूणीऐ बाहरै निकलणा। 29ज़ुणियै भलै कोम केरेदै सी तिन्हां जिणै री तैंईंयैं भी ज़िन्दा होंणा होर ज़ुणियै बुरै कोम केरै सी तिन्हां नरकै री सज़ा पाणै री तैंईंयैं ज़िन्दा होंणा।

यीशु रै बारै न गुआही

30 हांऊँ आपणै आपा न किछ़ नी केरी सकदा; ज़ैण्ढा शूणा सा, तैण्ढा न्याय केरा सा, होर मेरा न्याय सच़ा सा; किबैकि हांऊँ आपणी इच्छा नैंई बल्कि आपणै भेजणु आल़ै बापू री इच्छा चाहा सा। 31अगर हांऊँ आपु आपणी गुआही देनु; ता मेरी गुआही सच़ी नैंई होंणा। 32एक होर सा ज़ुण मेरी गुआही देआ सा सौ सच़ी सा होर हांऊँ ज़ाणा सा मेरी ज़ुण गुआही देआ सा कि सौ सच़ी सा।

33 तुसै बपतिस्मा देणु आल़ै यूहन्ना बै दूता न पुछ़णै धियाऊ होर तेइयै सच़ाई री गुआही धिनी सा। 34पर हांऊँ आपणै बारै न मांहणु री गुआही नैंई च़ाँहदा; तैबै भी हांऊँ ऐ गैला केरा सा कि तुसाबै मुक्ति प्राप्त हुई लोड़ी। 35यूहना ज़ुण भौकदा होर च़मकणु आल़ा दिऊआ ती; ज़ुणिरै प्याशै न तुसाबै थोड़ी देरा री तेइयै मस्त होंणा बांका लागा।

36 पर मूँ हागै ज़ुण गुआही सा सौ यूहन्ना री गुआही न बड़ी सा; किबैकि ज़ुण कोम मुँभै बापूऐ पूरा केरनै वे धिनादा सा मतलब ज़ुण कोम हांऊँ केरा सा, सौऐ मेरै गुआह सी, कि बापूऐ हांऊँ भेज़ूदा सा। 37होर बापू ज़ुणियै हांऊँ भेज़ूदा सा, तेइयै मेरी गुआही धिनी; तुसै न कैधी तेइरी आवाज़ शूणी, न तेइरा रूप भाल़ुदा सा। 38होर तेइरी शिक्षा बै मना न मजबूत नैंई रखदै, किबैकि ज़ुणिबै परमेश्वरै भेजुन्दा सा तुसै तेइरा बशाह नैंई केरदै। 39तुसै पवित्र शास्त्रा न तोपा सी किबैकि बुझा सी कि हमेशा री ज़िन्दगी तुंईन मिला सा, होर ऐ सौऐ सा ज़ुण मेरी गुआही देआ सा। 40तैबै भी तुसै हमेशा री ज़िन्दगी जिणै री तैंईंयैं मूँ हागै ऐणा नैंई च़ाँहदै।

41 “हांऊँ मांहणु न आदर नैंई च़ाँहदा। 42पर हांऊँ तुसाबै ज़ाणा सा, कि तुसा आँध्रै परमेश्वर री झ़ुरी नी ऑथि। 43हांऊँ आपणै बापू रै अधिकारा न आऊ सा, होर तुसै मुँभै नैंई अपनांदै; पर अगर कोई होर आपणै अधिकारा न एज़ा सा ता सौ तुसा मनणा। 44तुसै ज़ुण ऐकी-दुज़ै न आदर चाहा सी होर सौ आदर ज़ुण परमेश्वरा धिरै न सा, तेई नैंई च़ाँहदै, ता तुसै कुणी तरीकै न बशाह केरी सका सी?

45 “ऐण्ढा मता सोच़दे, कि मूँ आपणै बापू सामनै तुसा पैंधै दोष लाणा; तुसा पैंधै दोष लाणु आल़ा ता मूसा ज़ुणी पैंधै तुसै आश रैखी सा। 46किबैकि अगर तुसै मूसा पैंधै बशाह केरदै, ता तुसा मूँ पैंधै भी बशाह केरना ती, किबैकि मूसै मेरै बारै न लिखून्दा ती। 47पर अगर तुसै मूसै री बिधाना री गैला पैंधै बशाह नी केरदै ता मेरी गैला पैंधै बशाह कैण्ढै होंणा?”

Attualmente Selezionati:

यूहन्ना 5: KFX-NT

Evidenziazioni

Copia