मत्ती 4

ईशूए परिक्षा

(मरकुस 1:12; लुका 4:1-13)

1पबित्र आत्मां निंयं तेभी ईशू कराहणीं उज़ल़ ज़ैगा लै और तिधी रहअ राख्स तेऊ परखदअ लागी। 2ईशू रहअ च़ाल़्ही धैल़ै और च़ाल़्ही राची भुखअ-नचिशअ, और च़ाल़्ही धैल़ै बाद आई तेऊ भुखै। (लुआह 34:28)

3तेखअ बोलअ राख्सै ईशू लै, “ज़ै तूह परमेशरो शोहरू आसा, तै बोल तूह इना पात्थरा लै इहअ कि रोटी बण?”

4ईशू दैनअ तेऊ लै ज़बाब, “पबित्र शास्त्रा दी आसा लिखअ द इहअ,

‘मणछ निं सिधअ रोटी करै ज़िऊंदअ,

पर परमेशरे बोली दी हरेक गल्ला मनी करै सका सह ज़िऊंदअ रही।’”

5तेखअ निंयं राख्सै सह पबित्र येरुशलेम नगरी लै और मांदरे पुंडरी दी खल़अ करी करै बोलअ तेऊ लै, (लुआह 34:28) 6“ज़ै तूह परमेशरो शोहरू आसा तै पल़ इधा का ढेका! किल्हैकि पबित्र शास्त्रा दी आसा इहअ बी लिखअ द, (भज़न 91:11-12)

‘तेऊ छ़ाडणैं स्वर्ग दूत तेरी सेऊआ टैहली करदै

तिन्नां च़कणअ तूह हाथो हाथ

ताकि तेरै च़रणैं ठोहल़ नां लागे।’”

7ईशू बोलअ तेऊ लै, “पबित्र शास्त्रा दी आसा इहअ बी लिखअ द कि तूह निं आपणैं बाप्पू परमेशरा परखदअ लागी।” (बधान 6:16)

8तेखअ निंयं राख्सै सह एकी उछ़टी धारा दी और तेऊ ईशू का सारै संसारो राज़ और सुख रहैऊई करै बोलअ, (लुका 4:9) 9“ज़ै तूह मुंह सेटा माथअ टेके तै हणीं ईंयां सोभै गल्ला तेरी।”

10तेखअ बोलअ ईशू राख्सा लै, “हे राख्स मेरी आछी का हअ दूर, पबित्र शास्त्रा दी आसा लिखअ द, (बधान 6:13)

‘तूह टेकै सिधअ आपणैं बाप्पू परमेशरा सेटा माथअ

सिधी तेऊए ई भगती करै।’”

11तेखअ नाठअ राख्स ईशू सेटा का दूर और स्वर्ग दूत लागै ईशूए सेऊआ टैहली करदै।

ईशूए सेऊआ-च़ाकरीए शुरूआत

(मरकुस 1:14,15; लुका 4:14,15,31)

12ज़ांऊं ईशू शूणअ कि युहन्ना डुबकी दैणैं आल़अ पाअ कैद खानै दी, ता सह नाठअ यहूदा लाक्कै का गलील लाक्कै लै फिरी। 13तेखअ लागअ नासरत गराऊंआं छ़ाडी कफरनहूम नगरी समुंदरे बाढै ज़बलून और नप्तालीए लाक्कै रहंदअ। 14ताकि परमेशरे गूर याशायाह बोली दी गल्ला पूरी होए कि

15“ज़बलून और नप्तालीए लाक्कै,

समुंदरे बाढै, जरदण नदी नेल़,

गलील लाक्कै, होरी ज़ातीए लोग;

16ज़ुंण न्हैरै दी तै बेठै दै,

तिन्नैं भाल़अ बडअ च़मकदअ प्रैशअ

ज़ुंण लोग तेऊ देशै मौते छ़ैल्ली दी तै बेठै दै,

तिन्नां दी च़मकअ प्रैशअ।”

17तधा पोर्ही की ईशू लोगा का एही गल्ला खोज़णीं शुरू, “पाप करनअ छ़ाडा आपणअ मन बदल़ा स्वर्गो राज़ गअ नेल़ एछी।”

पैहलै च़ेल्लै शादणैं

(मरकुस 1:16-20; लुका 5:1-11; युहन्ना 1:35-42)

18एकी धैल़ी त ईशू गलील समुंदरे बाढै हांढदअ लागअ द, तेऊ भाल़ै दूई मणछ शमौन ज़हा लै पतरस बोला और तेऊओ भाऊ आन्दरू। तिंयां तै लागै दै पाणीं दी माह्छ़ली ढाकणा लै ज़ाल़ा पांदै किल्हैकि तिंयां करा तै माह्छ़ली ढाकणैं और बेच़णेंओ काम। 19ईशू बोलअ तिन्नां लै, “ज़ेही तम्हैं माह्छ़ली कठा करदै आसा लागै दै, मुंह संघै च़ाल्ला हुंह सखाऊं तम्हां मेरै च़ेल्लै हणां लै मणछ कठा करनै।” 20ता तिंयां बी लागै तेभी ज़ाल़ा छ़ाडी करै तेऊ संघै हांढदै।

21तिधा का आजू डेऊई करै भाल़ै ईशू दूई होर भाई, याकूब और तेऊओ भाऊ युहन्ना, तिंयां तै लागै दै आपणैं बाप्पू जबदी संघै किश्ती प्रैंदै बेशी ज़ाल़ा सोहरदै, और तेऊ शादै तिंयां बी, 22ता तिंयां बी लागै तेभी किश्ती और आपणैं बाप्पू छ़ाडी तेऊ संघै हांढदै।

ईशूए बमार ठीक करनै

(लुका 6:17-19)

23तेखअ नाठअ ईशू गलील लाक्कै कई ज़ैगा। सह रहअ आराधना सभा दी शिक्षा दैंदअ और स्वर्ग राज़े खुशीए समादा खोज़दअ लागी और सोभी रंगे दाह-खिज़ा दूर करदअ लागी।

24ईशूए बारै ईंयां गल्ला पुजी सारै सिरीया लाक्कै। तेखअ ज़ुंण लोग कई बमारी दी, दुखा दी और कोई दी त भूत शाचअ द, और मिर्गिए बमारी आल़ै तै, तिंयां आऐ ईशू सेटा लै और ईशू किऐ तिंयां सोभ राम्बल़ै। 25बडै भारी खास्सै लोग आऐ गलील, दिकापुलिस, येरुशलेम नगरी, यहूदा लाक्कै, और जरदण नदी पारा बाखा का ईशू पिछ़ू।

Attualmente Selezionati:

मत्ती 4: OSJNT

Evidenzia

Copia