Matalikilo 7
7
Makani aazambangulwe pati
1Lino Mwami Leza wakaambila Nowa kuti, “Njila mubbwato yebo amukwasyi wako woonse, nkaambo nduwe olikke ngwindabona kuti uliluleme akati kabantu boonse. 2Kubanyama boonse beelede kupaizya utolelele bapoho bali ciloba abazyazi bali ciloba kuzwa kumusyobo omwe-omwe, pele ubweze buyo mupoho omwe amuzyazi omwe kuzwa kubanyama bateelede kupaizya. 3Alimwi akwalo kubayuni utolelele bazingini bali ciloba, anseke zili ciloba kuzwa kumusyobo omwe-omwe. Ucite ooku kutegwa misyobo yoonse yabayuni ayabanyama inununwe mukuti ikazyalane alimwi anyika. 4Nkaambo kwasyaala buyo mazuba aali ciloba kuti ndiwisye zambangulwe anyika, lyalo liyoowa kwamazuba aali makumi one sikati amasiku, kuzoonyonyoona zintu zyoonse zipona nzindakalenga.” 5Nkabela Nowa wakacita zintu zyoonse eezyo Mwami Leza nzyaakamulailila.
6Nowa wakajisi myaka iili myaanda iili cisambomwe ciindi zambangulwe nilyakawa anyika. 7Nowa, mukaintu wakwe, bana bakwe antoomwe abakaintu babo bakanjila mubbwato kutija maanzi aazambangulwe. 8Abalo banyama mbubonya, beelede kupaizya abateelede, bayuni alimwi atunyama tuniini-niini. 9Boonse bakanjila mubbwato antoomwe a Nowa, mupoho amuzyazi, muzingini anseke mbubonya mbuli mbwaakamulailila Leza. 10Nkabela nikwakamana mazuba aali ciloba, zambangulwe pati lyakatalika kuwa anyika.
11Mubuzuba bwakkumi aciloba bwamwezi wabili, Nowa kajisi myaka iili myaanda iili cisambomwe, bampoompo balwizi lwakunsi aanyika bakatuluka alyalyo julu lyakajaluka kuti maanzi apoomoke. 12Nkabela mvula yakawa kapati kwamazuba aali makumi one sikati amasiku. 13Mubuzuba oobo mbubonya, Nowa abana bakwe botatwe, ba Syemu, Hamu a Jafeti, mukaintu wakwe antoomwe abamukabana bakanjila mubbwato. 14Bakanjila antoomwe abanyama bamusokwe bamisyobo-misyobo abanyama bavubwa, azintu zyoonse zikalaba ansi, alimwi amisyobo yoonse yabayuni. 15Zintu zyoonse zijisi buumi zyakanjila mupoho amuzyazi antoomwe a Nowa, 16mbubonya mbuli Leza mbwaakamulailila. Eelyo Nowa naakanjila buyo mubbwato, Mwami Leza wakajala mulyango.
17Zambangulwe lyakazumanana kuwa kwamazuba aali makumi one, eelyo maanzi akavula kapati akutalika kwiibausya bbwato kuzwa anyika. 18Maanzi akavula akubbilwa, limwi bbwato lyakatalika kwiibauka atala aamaanzi. 19Maanzi akavulisya kapati akubbizya zilundu nozilampa buti. 20Lino maanzi akacili kuya buvula mane tukokola atumbi tuli kkumi atusanu atala azilundu zilamfu. 21Nkabela zintu zyoonse zyakali kupona zyakaloba, zyoonse zyakali kukalaba aansi, antoomwe abantu, banyama bavubwa, bamusokwe, abayuni. 22Zyoonse zyakali aabuumi eezyo zyakali kukkala anyika njumu, zyoonse buyo zyakafwa. 23Mbombuboobu Mwami Leza mbwaakanyonyoona zyoonse zintu zyakali anyika, nkokuti bantu, banyama, zintu zikalaba alimwi abayuni. Kwakasyaala Nowa alikke abaabo mbaakali aabo mubbwato. 24Maanzi akali kuvundauka anyika kwamazuba aali mwaanda amakumi osanwe.
Attualmente Selezionati:
Matalikilo 7: Tonga96
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Tonga Bible © United Bible Societies, 1994.
