Matalikilo 6
6
Bantu mbubakalisofwaazya
1Ciindi eeco bantu batasyomi bakalivulide kapati munyika yoonse, alimwi bakazyala bana basimbi. 2Nkabela bantu ba Leza bakabona kuti aaba basimbi bakali babotu, aboobo bakatalika kukwata kufumbwa aabo mbobakali kuyanda. 3Lino Mwami Leza wakati, “Muuya wangu tuukooyookazyanya abantu kukabe kutamani, nkaambo mbaasizinyonyoono. Pele banoocijisi myaka iili mwaanda amyaka iili makumi obilo.” 4Mumazuba aayo, alimwi amumazuba aakatobela, kwakali mantu malamfu munyika, aaba mbabakazyalwa kubasimbi aabo bakakwetwe kubantu ba Leza. Aabo mbabakaba basinguzu mumazuba aayo, alimwi mbabakali basimpuwo baciindi.
5Mwami Leza naakabona kuti bubi bwabantu boonse bwavulisya koonse-koonse, akuti miyeeyo yabo yoonse yakazwide buyo bubi, 6wakausa kuti wakalenga bantu akubabikka munyika. 7Aboobo Mwami Leza wakati, “Ndiyoobanyonyoona bantu mbindakalenga koonse kufumbwa nkobabede munyika, alimwi abanyama, bayuni, azintu zyoonse zikalaba ansi, nkaambo ndausa kuti ndakazilenga.” 8Pele Mwami Leza wakaliboteledwe kapati a Nowa.
Makani aa Nowa
9Zya buumi bwa Nowa. Nowa wakazyala bana balombe botatwe, ba Syemu, Hamu, a Jafeti. Walo wakali muntu mubotu uululeme kuli Leza, 10alikke buyo ngomuntu wakali kumvwana a Mwami Leza.
11Pele bantu boonse bakali basizinyonyoono kuli Leza, nyika yoonse yakazula bafumpi. 12Leza naakiilanga nyika, wakabona kuti yakalibijide, nkaambo bantu boonse bakali basizinyonyoono cakumaninina.
Nowa mbwaakayaka bbwato pati
13Lino Leza wakaambila Nowa kuti, “Ndakanza kujaya bantu boonse mbindakabikka munyika. Ndiyoobanyonyoona boonse akubamaninizya, nkaambo kakuti nyika yoonse yazula milimo yabo mibi. 14Pele yebo panga bbwato lyamapulanga aamusamu wagofa, ukosole twaandaanda mukati, alimwi ulimate mukati akunze abunzuka bwa taala. 15Bulamfu bwalyo bukabe tukokola tuli myaanda yotatwe, bwaamba bukabe tukokola tuli makumi osanwe, bulamfu bwabwaanda bukabe tukokola tuli makumi otatwe. 16Alimwi ukayake ciluli atala aabbwato, ukasiye mwaako akati-kati wakakokola komwe. Mubbwato uyake twaandaanda ansi, alimwi atumwi atala aatootu, atwamamanino atala eeni, wamana ukabikke mulyango kumbali. 17Lino mebo ndiyoowisya zambangulwe pati anyika liyoonyonyoona zintu zipona, nkaako zyoonse ziyoofwa. 18Pele ndiyoopanga cizuminano anduwe. Ukanjile mubbwato yebo amukaintu wako, abana bako abakaintu babo. 19Alimwi kubanyama ukanjizye misyobo yoonse mubbwato bobilo-bobilo mupoho amuzyazi kuti bakanunuke. 20Akubayuni bamisyobo yoonse uyoobanjizya bobilo-bobilo, amisyobo yoonse yabanyama bapati atunyama tuniini bakanjile mubbwato kuti bakanununwe. 21Ukabikke amisyobo yazyakulya zyanu nobantu, zyabanyama, azyabayuni.” 22Nowa wakakucita koonse ooko Leza nkwaakamulailila.
Attualmente Selezionati:
Matalikilo 6: Tonga96
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Tonga Bible © United Bible Societies, 1994.
