Bambata Pai 7
7
Pa ime akangbi
1Yekova ki ya fu Noa, “Mo yé, oni na gamo aborokporo dunduko ki rimi ku kurungba yo, bambiko mo, kina ro bi mi ro ni ruru boro bara bangire dagba gi rika ngbatunga re. 2Dagba gigiri anya dunduko, mo rógodi abara saba na anara saba; mo ki rogodi ra ni ba ue fuo ro dagba agu anya agira nga ya, bara na nara. 3Mo ki rogodi agu ra dagba azire ari, abara saba na anara saba ka banda ngbatungara ni ungara auru kpotosende zegino dunduko. 4Bambiko fuo rame saba mi akéda mai si na ana ku auru kpotosende tipa uru 40 na yuru 40 a; gu unga ahe dunduko nga gu mi amangi he mi abá tungaha auru kpotosende kpakaya.” 5Noa ki mangi he dunduko a wa Yekova arugu ko na ni.
6Garã Noa adu 600 ho ime akangbi aye ni ku auru kpotosende. 7Noa ki rimi ku kurungba yo, ko na awiriko na diako na dere awiriko fuo ko, be gu ime nga ga akangbi. 8Dagba gigiri anya, na dagba agu ra agira nga ya, na dagba azire, na dagba agu agbiro nagbe tira sande dunduko, 9ami arimi ni ba ue ku kurungba yo koyo du Noa ni, bara na nara, a wa Mbori arugu Noa na ni. 10Si ki ta du wa gere, fuo gu rame saba re, ime akangbi aye ku auru kpotosende.
11Ti gu rago garã Noa adu 600, rogo ue diwi, ti rameru 17, ni kina gu uru re agugaabi agbadi agbada dunduko yasika, nga ga bakere dudungura ime, angbadimo ngbangbaturũ ki za aza. 12Mai ki na ana ku auru kpotosende uru ki du 40 na yuru 40 a. 13Ni kina gu rago re Noa ki rimi ku kurungba yo, ko na Seme na Ama na Yepete, nangia awiri Noa, na dia Noa na dere awiriko biata, i ki rimi fuo ko, 14na anya nvo dunduko ngba arikara, na zogozogo anya dunduko ngba arikara, na agu agbiro dunduko nagbe tira sande ngba arikara, na azire dunduko ngba arikara, na agu ra du na apupora ngba arikara dunduko. 15Ami ki rimi fuo Noa ku kurungba yo, ni ba ue dagba gu unga ahe dunduko du na onga unga rogo ho yo. 16Agu ra narimi, ami nangia abara na anara, dagba unga ahe dunduko, wa Mbori arugu ko na ni. Yekova ki kisi ko ku dimo yo. 17Ime akangbi ara ku auru kpotosende rame ki du 40; aime ki hi ahi, ki tumba kurungba ku ari, si ki du ni tumbatumba ha ku ari auru kpotosende. 18Ime ki mbiri kpotosende ki hi ahi kpaima; kurungba ki niya aya ri ime. 19Ime ki mbiri kpotosende ambira ki susi ri gu gbangagbanga abaagangara nadu tii ngbangbaturũ yo dunduko si ki rinda arinda dunduko; 20ime ki hi, badunguraha ki du wa bagiza mbiribe 15, si ki mbiri abaagangara. 21Unga ahe ki kpiki akpika dunduko nga gu nawo awo auru kpotosende, nga azire na zogozogo anya, na anya nvuo, na agu agbiro nagbe tira sande, na aboro dunduko a. 22Agu ahe nadu na onga unga rogo ho yo, nga gu nadu auru ugu sende, si akpiki akpika dunduko. 23Agu ahe dunduko nadu ni ungaha, Mbori ki ba tungaha aba kpakaya auru kpotosende, nga aboro, na zogozogo anya, na agu agbiro nagbe tira sande, na azire ari; Mbori ki ba tungaha aba auru kpotosende. Kina aNoa ki nye, na agu yo nadu na ko kurungba yo. 24Ime ki mbiri kpotosende ambira rame ki du 150.
Attualmente Selezionati:
Bambata Pai 7: ZB1978
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
La Sainte Bible en Zande © Alliance Biblique Universelle, 1978.
