MATEUS 5

Kotbah ang pupung puruk

1Ohkot Yesus nohto ulun aro rih, Io nuhkat nokuh pupung lukuh. Uli Io tuot, murid-murid-Oh lombut doni umba Io, 2turus Io nopara majar iro:

Kosanangsolamat ijo sojahti

(Luk. 6:20-23)

3“Kosanangsolamat ahkan ulun, ijo mokomo eam badaya tutang tihkas bohapang ang Tuhan ih;

iro rih anai anak-ukup ain Pohotala!

4 # Yes. 61:2 Kosanangsolamat ahkan ulun ijo poros ahtoi;

Pohotala ahkan ngojorih iro!

5 # Msm. 37:11 Kosanangsolamat ahkan ulun ijo randah ahtoi;

Pohotala ahkan molalus bowot-Oh ahkan'ndo!

6 # Yes. 55:1-2 Kosanangsolamat ahkan ulun ijo jolik nguan aang ijo kohondak Pohotala;

Pohotala ahkan medabolai iro!

7Kosanangsolamat ahkan ulun ijo ngasi ulun bohkon;

Pohotala ahkan ngasi iro ka'a!

8 # Msm. 24:3-4 Kosanangsolamat ahkan ulun ijo borasih ahtoioh;

iro ahkan kosono Pohotala.

9Kosanangsolamat ahkan ulun ijo ngomin kobuah ang louk kolunon;

Pohotala ngahku iro kolou anak-Oh!

10 # 1Ptr. 3:14 Kosanangsolamat ahkan ulun ijo ngarot koporos tului nambit konohuang Pohotala;

iro monjadi anak-ukup ain Pohotala!

11 # 1Ptr. 4:14 Kosanangsolamat ahkan ihkam amat tonosalan, tonoporos tutang tongonja'at tului Ahku. 12#2Kron. 36:16; Kes. Ras. 7:52 Nabi-nabi ijo bolum hounumba ihkam ka'a jari tongoporos kodorih. Jorih tutang jerah ihkam, tului hajo upah aang soruga ijo tonyodia Tuhan ahkan ihkam.”

Tonyu tutang koloang

(Mrk. 9:50; Luk. 14:34-35)

13 # Mrk. 9:50; Luk. 14:34-35 “Ihkam anairih tonyu ahkan kolunon. Amat tonyu jari tawah, tou ka'a konomohit huli? Eam anai gunaioh hino, molekan tongondian tutang tonihcak-nihcak ulun.

14 # Yoh. 8:12, 9:5 Ihkam anairih koloang kolunon. Lowu ijo tomangun ang pupung puruk eam dapot tonyuhuk. 15#Mrk. 4:21; Luk. 8:16, 11:33 Eam aro ulun ijo molihkit sumbu turus nuhtup sumbu rih umba potoran. Io malah ahkan ngina sumbu rih, ang unuk sumbu, mangat nonga koloang ahkan nyinong ulun ang luwang lahpou. 16#1Ptr. 2:12 Kodorih ka'a koloang'kam, harus nyingah ang toharep ulun, mangat iro nohto gawin-gawin'kam ijo pios, turus monara Amai'kam ang soruga.”

Ajar tohou hukum agama Yahudi

17“A'ai ngohu ijo Ahku lombut ahkan ngudap hukum Museh tutang ajar nabi-nabi. Ahku lombut eam ahkan ngudapoh, tahpi ahkan mongorinah rimai ijo kotu'uioh. 18#Luk. 16:17 Ingat! Kotahin langit tutang tana magun anai, ihco hurup ata'ai tihtik ijo pongokoik ka, ang luwang turat rih, eam ahkan tongudap, amat paringoh jaha nyolung! 19Bain kotului orih, ia-iai molanggar anai ihco, tahkan louk poretah-poretah orih, oluka ijo pongokoikoh tutang majar ulun nguan kodorih ka'a, ahkan jadi ijo paling pongokoik ang louk uhkup ain Pohotala. Sobalikoh, ia-iai molalus poretah-poretah orih tutang majar ulun bohkon nguan kodorih ka'a, ahkan monjadi hajo ang louk uhkup ain Pohotala. 20Jadi ingatrih: Ihkam eam touharapan, monjadi uhkup ain Pohotala, amat eam molowi umba guru-guru agama tutang ulun-ulun Parisi a'ang hal nguan konohuang Pohotala!”

Tingak tohou kosingi

(Luk. 12:57-59)

21 # Ex. 20:13; Deut. 5:17 “Ihkam ngotaan ijo ang tahtu ajuh ihto anai ajar kolou tuh: Ara munu; iaibewe munu, harus tonosara. 22Tahpi huntuh, Ahku nuhtui ahkan'kam, ia-iai bosingi umba ulun bohkon, ahkan tomosara; tutang ia-iai hololea ulun bohkon ahkan tomosara ang toharep Majelis Agama. Tutang ia-iai ngohawot umba ulun bohkon, ‘Uong’, harus tonyahkah nokuh ahpui norahka. 23Bain kotului orih, amat anai ihcobehti ang louk ihkam ijo betengoh nyarah ponongaoh ahkan Pohotala, turus toingat ijo anai ihcobehti ulun ijo poros ahtoioh toharep io, 24kopiosoh io nohtah houn pononga orih ang baun mesbeh, turus tulak hokobuah umba ulun rih. Uliorih, dahpot io huli tutang nyorah ponongaoh ahkan Pohotala.

25Jahkaoh anai ulun ngadu ihkam nokuh majelis hakim, hokobuah umba io amat magun anai ohkot sounumba johcok ang majelis. Amat eam, ulun rih, ahkan nyarah ihkam nokuh hakim, ijo ahkan monyorah ihkam ahkan polisi. Turus polisi orih posolong ihkam nokuh luwang sipir. 26Tutang ingat: Musti ihkam eam ahkan duon soluka tahkan sipir rih, hounumba paring donda'kam lunas samasino.”

Tohou hobandung

27 # Ex. 20:14; Deut. 5:18 “Ihkam ngotaan puna anai ajar koloutuh: Ara hobandung. 28Tahpi huntuh Ahku nuhtui ahkan'kam: iai ka'a nopahjah ihcobehti bawi tutang lombut kojolik ahtoioh, ulun rih jari hobandung umba ulunbawi orih rih aang ahtoioh. 29#Mat. 18:9; Mrk. 9:47 Amat mahta hila kotoun'kam, kotuluioh ihko bodusa, ngoruit tutang dian mahtam rih! Pios nihou ihco pokakas behtin'kam, amattahkan sohopus behtin'kam konindiu nokuh luwang norahka. 30#Mat. 18:8; Mrk. 9:43 Amat longom kotoun'kam, kotului orih ihko bodusa, totok tutang dian longom rih! Labih pios nihou silai longom, tahkan nyinong behtin'kam nyolong nokuh norahka.”

Tohou hotulang

(Mat. 19:9; Mrk. 10:11-12; Luk. 16:18)

31 # Deut. 24:1-4; Mat. 19:7; Mrk. 10:4 “Anai ka'a ajar koloutuh: Nyinong ulun ijo nulang oruhoh pahtut nonga surat kotulang ahkaioh. 32#Mat. 19:9; Mrk. 10:11-12; Luk. 16:18; 1Kor. 7:10-11 Tahpi huntuh Ahku nuhtui ahkan'kam: ia-iai ijo nulang oruhoh padahar bawi orih eam nyoleweng, kotuluioh oruh rih hobandung, amat oruhoh rih kawin hino. Tutang ia-iai ijo kawin umba ulunbawi ijo tonulang bosaioh rih, io hobandung ka'a.”

Tohou tulut

33 # Lew. 19:12; Nom. 30:2; Deut. 23:21 “Ihkam ngotaan ijo a'ang tahtu ajuh ihto, anai ajar koloutuh: Ara mungkir bowot. Inon ijo ius ihkam mbowotoh umba tulut ang toharep Pohotala, harus ihkam nguaioh. 34#Yak. 5:12; Yes. 66:1; Mat. 23:22 Tahpi huntuh Ahku nuhtui ahkan'kam: ara samasino nulut, pios aang langit, tului langit rih unuk pododusan Pohotala, 35#Yes. 66:1; Msm. 48:3 oluka aang tana, bain tana orih anai lahpik pa'ai-Oh; ata'ai aang Yerusalem, bain Yerusalem rih lowun Lahca hajo. 36Ara ka'a hotulut aang kuhung'kam, kotului ihko bongom eam ta'am napa balou monjadi puti tutang mitom, olu tihkas ihco kolihit ka. 37Nuhtui iou, amat ‘Yo’ ata'ai ‘Eam’ – molowi umba orih, polombutoh tahkan sehtan.”

Tingak tohou hobombalos

(Luk. 6:29-30)

38 # Ex. 21:24; Lew. 24:20; Deut. 19:21 “Ihkam ngota'an puna anai ka'a ajar koloutuh: Mahta tokiri mahta, nyihpo tokiri nyihpo. 39Tahpi huntuh Ahku nuhtui ahkan'kam: ara malos kohiri toharep ulun ijo nguan koja'at umba'kam. Sobalik'oh amat ulun ngahpek kohcom'kam hila kotoun'kam nauh io ngahpek kohcom hila komuloi'kam ka'a. 40Tutang amat ulun ngadu ihkam nokuh hakim tutang nutut hatin'kam, nonga ka'a ahkaioh kolombi ombu'kam ka'a. 41Amat ihcobehti pongowasa maksa ihkam ngohtun ramuioh ijo kahcuioh ihco kilomehter, ngohtunoh iou komahcu duo kilomehter. 42Amat ulun nyawot aangihco umba'kam tonga ahkaioh. Tutang ara ka'a nulak ulun ijo kani nginyam aangihco tahkan ihko.”

Kasih umba musuh

(Luk. 6:27-28, 32-36)

43 # Lew. 19:18 “Ihkam ngotaan ijo anai ka'a ajar koloutuh: kasih umba injah-injah'kam tutang nyingi musuh-musuh'kam. 44Tahpi uhuntuh Ahku nuhtui ahkan'kam: kasih musuh-musuh'mu tutang bodo'a bagi ulun-ulun ijo ngarana ihkam, 45mangat ihkam monjadi anak-anak Amai'kam ijo ang soruga. Kotului Pohotala poloang mahtanondou-Oh, bagi ulun ijo nguan ijo pios, tutang bagi ulun ijo nguan koja'at ka'a. Io noposuluh uhjan bagi ulun ijo nguan komorong, tutang bagi ulun ijo nguan koja'at ka'a. 46Kotului amat ihkam ngasih baya umba ulun ijo ngasih ihkam ih, ahkan inon Pohotala harus malos gawin'kam rih? Eamkah ponagih-ponagih pajak ka'a mahi nguan ang kolouorih? 47Tutang amat ihkam nonga tabe tihkas ahkan injah-jolahan'kam ih, inon kolowiuoh? Ulun-ulun ijo eam ngosono Pohotala ka nguan kodorih! 48#Lew. 19:2; Deut. 18:13 Amai'kam ijo ang soruga ngasih paring ulun hawoi soporuna. Ihkam harus kodorih ka'a.”

Attualmente Selezionati:

MATEUS 5: OTD

Evidenziazioni

Copia