OKHUCHIAKA 8
8
Okhumalilikha khwemikhula
1Nyasaye yetsul'la Noa nende biosi ebiayali n'nabio musafina, naleera omuyeka okhuhungutsa musibala, ne amaatsi nikachiaka okhutitiha. 2Tsimoni tsiolutungu nende ebilibwa biomwikulu nibiikalwa ma ifula nelekha okhukwa, 3ne amaatsi nikachiaka okhutitiha. Inyuma wamatukhu emia ndala nende amakhumi karano amaatsi nikaba katitihile khusibala. 4Litukhu liakhane nakhataru mumwesi kwakhane nakhataru esafina yerenjekha khubikulu bia Ararati. 5Amaatsi nako katsilil'la okhutitiha ne litukhu liokhuranga mumwesi kwelikhumi obutenje bwebikulu nibulolekha.
6Inyuma wamatukhu amakhumi kane Noa yekula litilisa liesafina 7nabichis'siamwo likhookho naliruma. Siliamala likalukhe tawe nebutswa liapulukhil'la y'yi nende y'yi okhwola olwa maatsi kakhama. 8Noa yamala naruma likhuulwi okhulola nikali amaatsi katitiha khusibala. 9Ne khulwokhuba amaatsi kali nikasili okhukhama khusibala likhuulwi silianyoola halinyala okhuyeela tawe. Liamala nilikalukha khusafina ma Noa nanyiila omukhono nalibukula nalinjisia musafina. 10Yalindakhwo amatukhu kandi kane nakataru ma naruma likhuulwi khandi. 11Liamala nilikalukha khuye khubwiile nilichinjile lisafu libisi eliomusaala khumunwa kwalio. Ma Noa namanya mbu amaatsi kakhamile khusibala. 12Yalinda amatukhu kandi kane nakataru ma naruma likhuulwi khandi. Olwene yilwo siliakalukha khandi tawe.
13Olwa Noa yali nemihika etsimia tsisasaba nende mulala, litukhu liokhuranga khumwesi kwokhuranga amaatsi kali nikakhamile khusibala. Noa nafunula esilama siesafina, nahenga tsimbeka tsiosi ne nalola liloba niliomele. 14Omwesi kwakhabili nikuli amakhumi kabili nende khane nakhataru esibala siali nisiomele.
15Nyasaye nabool'la Noa mbu, 16“Orule musafina nende omukhasiwo halala nabaana baabo nende abakhasi babwe. 17Obukule amanyonyi kosi, nende tsisolo ma nende ebikooko biosi khe bibe ebinyala okhwibulana, binjihe khusibala.” 18Kho Noa narula musafina nende omukhasiwe, nabaanabe ma nende abakhasi babwe. 19Etsisolo tsiosi nende amanyonyi nende ebikooko biarula musafina mutsimbila tsiabio.
Noa yalomba omusango
20Noa niyombokhela OMWAMI olusambwa, nabukula ndala khubuli esolo isiyikhu nende elala khubuli linyonyi lisiiyikhu nabisamba singa omusango khulusambwa. 21Omwayo kwomusango kwayanzisia OMWAMI ma naboola m'mwoyokwe mbu, “Sindakhalaamekhwo esibala khandi khulwomundu tawe, manyile mbu tsinganakani tsitsie netsimbibiibi okhurula khubwana bubwe. Kata khandi sindakhamululekhwo ebindu biosi ebili mwoyo singa ndakhol'le tawe. 22Oluhono lwesibala sisiliho, liraaka nende lichesa nabibetsenjeho. Khandi obusindu nende oluya biakhabeho halala nende erootso nende esubwe, ma nende om'basu nobutukhu.”
Attualmente Selezionati:
OKHUCHIAKA 8: EBAIBO
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
©Bible Society of Kenya, 2019
