OKHUCHIAKA 11
11
Omunaara kwa Babulonia
1Olwokhuranga abandu bosi musibala bali nende ol'lolomo l'lala ma khandi barumikhilanga amang'ana amafwanani. 2Olwabali nibachendanga nibatsia ebukwe banyoola esipaapi musibala sia Babulonia ma nibamenyayo. 3Nibabool'lana abene khubene mbu, “Chende khulombe amatifwali ma khukasambe katinye.” Ma nibalomba amatifwali kokhwombokhela nende elaamu yokhukatiila. 4Nibaboola mbu, “Khwombokhe litookho elili nende omunaara okwokhwola khwikulu, khe khwelombele eliira khubule okhusalaanibwa hosi hosi khusibala.”
5OMWAMI niyeekha hasi okhulola litookho nende omunaara okwabandu bali nibombokhele. 6Naboola mbu, “Lola, abandu yaba nibalala khandi bal'lomanga ol'lolomo l'lala, ne yikhu nokhuchiaka butswa okhwebindu biabanyala okhukhola. Sibuliba obutoro okhubakaya tawe. 7Chende khwikhe hasi khukoyanie ol'lolomo lwabwe khe babule okhuhuchilisania.” 8OMWAMI yamala nabasalaania khusibala siosi ma nibalekha okhwombokha litookho tsana. 9Litookho tsana liamala nililangwa Babeli, sichila niho aho OMWAMI yakoyanichisia ol'lolomo lwabandu bosi. Ne okhurula yaho OMWAMI yabasalaania musibala siosi.
Tsinzibulo tsia Shemu
(1 Aketsi. 1:24-27)
10Tsino nitsio tsinzibulo tsia Shemu. Emihika chibili inyuma wemikhula olwa Shemu yali nali nende emihika emia ndala yali samwana Aripakishadi. 11Ma yamala namenya emihika chindi etsimia tsirano, ne yali nende abaana bandi.
12Olwa Aripakishadi yali nemihika amakhumi kataru nende chirano yali samwana Shela, 13ma yamala namenya emihika chindi etsimia tsine nende chitaru, ne yali nende abaana bandi.
14Olwa Shela yali nemihika amakhumi kataru yali samwana Eberi, 15ma yamala namenya emihika chindi etsimia tsine nende chitaru, ne yali nende abaana bandi.
16Olwa Eberi yali nemihika amakhumi kataru nende chine yali samwana Peleki, 17ma yamala namenya emihika chindi etsimia tsine nende amakhumi kataru, ne yali nende abaana bandi.
18Olwa Peleki yali nemihika amakhumi kataru yali samwana Reu, 19ma namenya emihika chindi etsimia tsibili nende chirano nachine, ne yali nende abaana bandi.
20Olwa Reu yali nemihika amakhumi kataru nende chibili yali samwana Seruki, 21ma namenya emihika chindi etsimia tsibili nende chine nachitaru, ne yali nende abaana bandi.
22Olwa Seruki yali nemihika amakhumi kataru yali samwana Nahori, 23ma namenya emihika chindi etsimia tsibili, ne yali nende abaana bandi.
24Olwa Nahori yali nemihika amakhumi kabili nende chirano nachine yali samwana Tera, 25ma namenya emihika chindi emia ndala nende likhumi nachirano nachine, ne yali nende abaana bandi.
26Olwa Tera yali nemihika amakhumi kane nakataru yali samwana Aburamu, Nahori, nende Harani.
Tsinzibulo tsia Tera
27Tsino nitsio tsinzibulo tsia Tera owali samwana Aburamu, Nahori, nende Harani. Harani yali samwana Loti. 28Harani yamala nafwila musibala esiayebul'lwamwo esia Uru mu Babulonia, samwana nasili mwoyo. 29Aburamu natesia Sarai ne Nahori nateesia Milika omukhaana wa Harani. Harani yali khandi samwana Isika. 30Sarai yali omukumba, siyalikhwo nende omwana tawe.
31Tera yabukula omwanawe Aburamu, nende omwitsukhuluwe Loti, omwana wa Harani nende Sarai, omukhasi wa Aburamu, narula n'nabo Uru mu Babulonia okhutsia musibala sia Kanaani. Niboola Harani, nibamenyayo. 32Tera yafwilayo nali nende emihika etsimia tsibili nende chirano.
Attualmente Selezionati:
OKHUCHIAKA 11: EBAIBO
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
©Bible Society of Kenya, 2019
