KAJAJIYANG 4
4
Kain sibawa Habél
1Nasilurenna Adam sibawa Hawa, bainéna, namattampu'na iyaro makkunraié. Najajiyanna séddi ana' worowané sibawa makkeda, “Nasibawang pattulunna Puwangnge lolongekka séddi ana' worowané.” Nanasenni iyaro ana'é Kain.#Kain: Iyaé asengngé ri laleng basa Ibrani bettuwanna “mallolongeng”. 2Nainappa jajiyassi Hawa séddi ana' worowané, asenna Habél. Habél mancaji pakkampi bimbala'i, iyakiya Kain mancaji pataniwi. 3Siyagangngaré wettu ri munrinna nalani Kain sibagiyang polé ri éngngalanna nainappa nakkasuwiyangeng lao ri Puwangnge. 4Nainappa Habél malai ana' bimbala iya macowaé polé ri sala séddinna bimbala'na, nagéréi, nainappa nakkasuwiyangeng bagiyang iya kaminang makessingngé lao ri Puwangnge. Masennangngi Puwangnge lao ri Habél sibawa pakkasuwiyanna, 5iyakiya nasampéyangngi Kain sibawa pakkasuwiyanna. Macai senna'ni Kain, sibawa majjamerru tappana. 6Namakkedana Puwangnge lao ri Kain, “Magi mumacai? Magi tappamu najjamerru? 7Rékko mupogau'i makessingngé, pasti cabbéruko;#pasti cabbéruko iyaré'ga; pasti Utarimai pakkasuwiyammu. iyakiya rékko mupogau'i majaé, mattajengngi dosaé untu' muttama ri laleng atimmu. Maéloi dosaé kuwasaiwi alému, iyakiya harusu'ko caui.”
8Nakkeda Kain lao ri Habél, anrinna, “Laono mai talao ri dare'é.” Wettunna mennang lettu kuwaro, naluruini Kain sibawa naunoi Habél anrinna.#siyagangngaré bettuwang mariyolo: Laono mai talao ri dare'é. Basa Ibraninna dé'na gaga iyaé ada-adaé.
9Nakkutana Puwangnge ri Kain, “Kégai Habél, anrimmu?”
Nappébali Kain, “Dé' uwissengngi. Harusu'ka'ga monrowangngi anrikku?”
10Nanakkeda Puwangnge, “Magi mupogau'i gau' iya mappakatau-tauéro? Mangobbii darana anrimmu polé ri tanaé lao ri Iyya, pada-pada sadda iya goraé méllau pakkabale. 11Tattanroko angkanna dé' naweddinna muusahakang tanaé. Iyaro tanaé purai naiso darana anrimmu, samanna natimpa'i bawana untu' tarimai darana anrimmuro wettummu mpunoi. 12Rékko mallaonrumako, dé' napowassélé matu aga-aga tanaé; mancajiko matu tau kalao-lao iya dé'é nappunnai onrong naonroi ri linoé.”
13Nanakkeda Kain lao ri Puwangnge, “Matane' senna iyaro pahukkungengngé, dé' uwulléi tanggungngi. 14Murukkaka polé ri tanaéwé, mabéla polé ri ahadérékem-Mu. Mancajika matu tau kalao-lao iya dé'é nappunnai onrong naonroi ri linoé, sibawa riyunoka matu ri nigi-nigi iya runtu'ékka.”
15Iyakiya makkedai Puwangnge, “Dé'. Rékko riyunoko, selaku pamale'na, pitu tau muttama'ni iya mpunoékkoro riyuno towi matu.” Nainappa Puwangnge taro tanrang ri Kain kuwammengngi nigi-nigi iya siruntu'é aléna dé' naunoi. 16Nanalaona Kain polé ri yolona Puwangnge nanaonro ri tana iya riyasengngé “Kalao-laongngé” ri seddé alauna Edén.
Wija-wijanna Kain
17Kain sibawa bainéna lolongengngi ana' worowané, iya nawéréngngé aseng Hénokh. Nainappa patettong Kain séddi kota nanasengngi iyaro kotaé situru asenna ana'naro. 18Hénokh ambo'na Irad. Irad ambo'na Méhuyaél. Méhuyaél ambo'na Métusaél, na Métusaél iyanaritu ambo'na Lamékh. 19Lamékh mappunnaiwi duwa tau bainé, Ada sibawa Zila. 20Ada jajiyangngi Yabal, na wija-wijanna Yabalnaro bangsa iya mappiyara olokolo'é sibawa monro ri laleng kémaé. 21Anrinna riyaseng Yubal, na wija-wijanna Yubal iyanaritu pacculé musi' kacapi sibawa suling. 22Zila jajiyangngi Tubal-Kain, na wija-wijanna mébbui sininna rupanna pakkakkasa#mébbui sininna rupanna pakkakkasa: séddi bettuwang mariyolo: toriyolona sininna panré bessié. polé ri tembagaé sibawa bessié. Anrinna Tubal-Kain makkunraié riyasengngi Naama.
23Nakkedana Lamékh lao ri iya duwa bainéna,
“Ada sibawa Zila, éngkalingai!
Uwunoi séddi kallolo
nasaba puraka naunru.
24Rékko pitu tau riyuno mpale'i tau mpunoéngngi Kain,
pituppulo pitu tau riyuno matu rékko iyya riyuno.”
Sét sibawa Enos
25Adam sibawa bainéna lolongessi séddi tau ana' worowané. Adanna Hawa, “Allataala pura mpérékka ana' worowané selaku passulléna Habél, iya puraé nauno Kain.” Rimakkuwannanaro nasenni Hawa iyaro ana'é Sét.#Sét: Iyaé asengngé ri laleng basa Ibrani oninna pada-padai ada iya bettuwanna “purani mabbéré”. 26Sét mappunnai ana' worowané iya nawéréngngé aseng Enos. Ri wettuénnaro nappammula tauwé teppui asenna Puwangnge rékko massompai.
Attualmente Selezionati:
KAJAJIYANG 4: LAIBUG
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
