Mwa 6

Ũng'endu wa Andũ

1 # Yovu 1.6; 2.1 Yĩla andũ maendeeie na kwongeleka ĩũlũ wa nthĩ, na masyaa eĩtu, 2ana ma Ngai nĩmoonie eĩtu asu me anake, na kwoou manyuva ala mendaa mamatwaa. 3Nĩvo ĩndĩ Mwĩai Ngai waisye atĩĩ, “Ndikaeka andũ mekale thayũ tene na tene nũndũ me mĩĩ ĩkusaa. Kuma ũmũnthĩ makekalaa thayũ myaka ĩana na mĩongo ĩlĩ.” 4#Mot 13.33 Syana sya ana ma Ngai ala matwaĩte eĩtu ma andũ nĩsyatw'ĩkie andũ me nguma na ngũmbaũ. Syana isu syeetawa Nevilimu na syatũaa ĩũlũ wa nthĩ ĩvindanĩ yĩu o na ĩtina wayo.

5 # Mat 24.37; Lk 17.26; 1Vet 3.20 Mwĩai Ngai nĩwoonie ũndũ andũ ĩũlũ wa nthĩ meekaa mothũku maingĩvĩte, na ũndũ mosũanĩo moo maĩ mathũku kĩla ĩvinda. 6Kwoou Mwĩai Ngai nĩweelilile nĩkwĩthĩwa nĩwoombie mũndũ na amwia ĩũlũ wa nthĩ. Ũndũ ũsu nĩwatumie Mwĩai Ngai ew'a woo mũno, 7na asya atĩĩ, “Nĩngũvetanga andũ onthe ala noombie maume ĩũlũ wa nthĩ, andũ vamwe na nyamũ syonthe, tũsamũ tw'onthe tũla twĩ ĩũlũ wa nthĩ na nyũnyi, nũndũ nĩ na kyeva nĩkwĩthĩwa nĩnasyũmbie.” 8Ĩndĩ Mwĩai Ngai nĩwendeeiw'e nĩ Noa.

Ngai Ayĩaĩa Noa Ake Ngalawa

9 # 2Vet 2.5 Ũũ nĩ ũvoo ĩũlũ wa Noa: Noa aĩ mũndũ mũlũngalu, na nowe e weka katĩ wa andũ ma ĩvinda yake ũtaĩ aweteka ũthũku; nĩwekalaa e na kĩkĩo kya Ngai. 10Aĩ na ana atatũ namo nĩ Semu, Amu na Yavethi. 11Andũ ala angĩ ĩũlũ wa nthĩ nĩmeekaa mothũku methonĩ ma Ngai na maĩ ang'endu. 12Ngai nĩwoonie ũndũ nthĩ yathũkĩte, nĩkwĩthĩwa andũ onthe ĩũlũ wa nthĩ maĩ na mwĩkalĩle mũthũku.

13Ngai nĩweeie Noa atĩĩ, “Nĩnĩtw'ĩte kũmina andũ onthe, na kwananga nthĩ. Ngamamina vyũ nũndũ nthĩ yusũĩte meko moo ma ũng'endu. 14Kwoou ĩseũvĩsye ngalawa ya mbwaũ sya mũtĩ mũũmu; aany'a tũsũmba nthĩnĩ wayo, na ũimĩvaka lami ngalĩko ya nthĩnĩ na ya nza. 15Seũvya ngalawa ĩsu ta ũũ: Ũasa wayo wĩthĩwe mita ĩana na mĩongo ĩtatũ na itatũ, na ũthanthau wayo wĩthĩwe mita mĩongo ĩlĩ na ilĩ, na ũtũlu wa mita ĩkũmi na itatũ. 16O ta ũu seũvya kĩala kya ngalawa ĩsu na kĩyĩthĩwa kĩtiĩte mwanya wa kũete kyeni. Mwanya ũsu wĩthĩwe wĩ wa nyusu mita katĩ wa kĩala kĩu na vala ũtũlu wa ngũta ũvikĩte. Seũvya mũomo ngalĩko ĩmwe ya ngalawa, na ngalawa ĩsu nĩyĩthĩwe yĩ ya ngolova itatũ. 17Nĩngusya mbua nene ya kĩw'ũ kingĩ ĩũlũ wa nthĩ, nanange syũmbe syonthe ila syĩ thayũ ĩũlũ wa nthĩ. Syĩndũ syonthe ĩũlũ wa nthĩ niũkw'a. 18Ĩndĩ nyie nĩngũseũvya ũtianĩo naku; ũkalika ngalawanĩ ĩsu wĩ na mũka waku, na ana maku na iveti syoo. 19Likya ngalawanĩ ĩsu syũmbe sya kĩla mũthemba ilĩ ilĩ, nũme na nga nĩ kana iikakw'e. 20Nyũnyi ilĩ sya kĩla mũthemba, nyamũ ilĩ sya kĩla mũthemba na ilĩ sya tũsamũ tw'onthe tũla twĩ ĩũlũ wa nthĩ ikalika ngalawanĩ vamwe naku nĩ kana iikakw'e. 21Kua lĩu wa kĩla mũthemba kwondũ waku na kwondũ wa syũmbe isu.” 22#Aevl 11.7 Noa nĩweekie maũndũ onthe ala Ngai wamwĩaĩie.

Attualmente Selezionati:

Mwa 6: KAMBA

Evidenziazioni

Copia