Mwa 32

Yakovo Ayĩyũmbany'a kũkomana na Esaũ

1Yĩla Yakovo waĩ nzĩanĩ asyokete Kanaani, nĩwakomanie na alaĩka ma Ngai. 2Amona nĩwaisye atĩĩ, “Ĩno nĩ nguthu ya asikalĩ ma Ngai!” Kwoou nĩweetie vandũ vau Maanaimu.

3Yakovo nĩwatũmie andũ maendae mbee wake nthĩ ya Etomu kũla kwĩ Esaũ mwana-a-inyia. 4Nĩwameaĩie makatavye Esaũ atĩĩ, “Nyie Yakovo mũthũkũmi waku nĩũtavya we mũnene wakwa Esaũ kana, nĩthĩĩtwe ngĩkala ũeninĩ kwa Lavani kũvika yu. 5Nĩna ng'ombe na mang'oi, mbũi na malondu, athũkũmi ma aũme na ma aka. Yu nĩnatũmana kũla ũĩ we mũnene wakwa nĩ kana ndonye kwona ũseo kuma kwaku.”

6Yĩla andũ asu masyokie kũla kwĩ Yakovo nĩmamwĩie atĩĩ, “Nĩtũendie kũla kwĩ Esaũ mwana-a-inyia waku, nake yu nĩwũkĩte akomane naku. Okĩte e na andũ maana ana.” 7Yakovo nĩwakwatiwe nĩ w'ĩa na kĩũũyũ kingĩ. Nĩwaanisye andũ ala waĩ namo ikundi ilĩ, na aany'a mbũi na malondu, ng'ombe na ngamĩle. 8Nĩwasũanĩie asya, “Ethĩwa Esaũ nũkũka na kũvithũkĩa kĩkundi kĩmwe, kĩla kĩngĩ kĩkeethĩwa kĩtonya kũkĩa.”

9Nĩvo ĩndĩ Yakovo wavoyie ayasya, “Ame Ngai wa ũmae wakwa Avalaamu, na Ngai wa ĩthe wakwa Isaka, mbĩthukĩĩsye! We Mwĩai Ngai wambĩie nĩsyoke nthĩ yakwa, na ya andũ ma mũsyĩ wakwa na ũkambĩka nesa. 10Ndyaĩlĩtwe nĩ ũseo w'onthe ũla ũmbĩkĩte, na ũĩkĩĩku ũla ũmbonetye nyie mũthũkũmi waku. Naingie ũsĩ ũũ wa Yolotani nguĩte ndata yakwa yĩ yoka, nayu nasyoka na ikundi ii ilĩ. 11Nĩngũkwĩsũva ũndangĩĩe kuma kwa mwana-a-ia Esaũ. Nĩngũmũkĩa, nũndũ nĩona nũtonya kũka kũtũkita na kũtũaa ithyonthe o na iveti na syana. 12#Mwa 22.17 Lilikana nĩwambathie kana ũkambĩka nesa, na kana ũkanenga nzyawa itatalĩka, mbingĩ ta kĩthangathĩ kĩla kĩ ũtee wa ũkanga.”

13Kwoou Yakovo nĩwakomele vau wavoyeaa, na ũnĩ ũsu kwakya anyuvĩa mwana-a-inyia Esaũ mũthĩnzĩo kuma indonĩ syake wa 14mbũi nga maana elĩ na nthenge mĩongo ĩlĩ, malondu maka maana elĩ na ndũũme mĩongo ĩlĩ, 15ngamĩle sya kũkama mĩongo ĩtatũ na tũtena twasyo, ng'ombe nga mĩongo ĩna na nzaũ ĩkũmi, mang'oi maka mĩongo ĩlĩ na ĩkũmi maũme. 16Nĩwanenganie indo isu ũsũvĩonĩ wa athũkũmi make, kĩla ndĩthya yĩ yoka, na eea athũkũmi asu atĩĩ, “Tongosyai mũthi mbee wakwa, na mũitia mwanya katĩ wa ndĩthya ĩmwe na ĩla ĩngĩ.” 17Nĩweeaĩie mũthũkũmi ũla watongoetye amwĩa atĩĩ, “Wakomana na mwana-a-inyia Esaũ na aikũkũlya, ‘Mũnene waku nũũ? Ũendete va, na indo ii ũingĩte nĩ syaũ?’ 18Nĩvo ĩndĩ wĩmwĩa, ‘Nĩ sya mũthũkũmi waku Yakovo, na ainenganĩte ta mũthĩnzĩo kwa mũnene wake Esaũ. Yakovo nake e ĩtina waitũ okĩte.’ ” 19O ta ũu nĩweeaĩie mũthũkũmi ũla watongoesye ndĩthya ya kelĩ, ũla watongoesye ndĩthya ya katatũ, na ala angĩ onthe maĩ na ndĩthya isu amea, “Nenyu mũkatavye Esaũ ndeto o isu mwakomana nake. 20Na mũikalee kũmwĩa, ‘Mũthũkũmi waku Yakovo e ĩtina waitũ okĩte.’ ” Yakovo nĩwasũanĩie asya, “Nĩngũusya ũthatu wake kwa kũmũnenga mĩthĩnzĩo ĩno ĩkũtwawa mbee wakwa, na yĩla ngũkomana nake nĩvatonyeka akandekea.” 21Kwoou mĩthĩnzĩo ĩsu nĩyatwaiwe mbee wake, ĩndĩ we mwene atiwa akomele vala wambĩte maeema.

Yakovo aing'ang'ana na Ngai

22Ũtukũ ũsu Yakovo nĩwookĩlile na oosa iveti syake syelĩ, aka make elĩ athũkũmi, na syana syake syĩ ĩkũmi na ũmwe, na mainga kalũsĩ ka Yavoki. 23Mamina kũinga, nĩwaingisye syĩndũ ila ingĩ syonthe waĩ nasyo syonthe, 24#Osea 12.3-4 ĩndĩ we mwene atiwa ĩtina e weka.

Mũndũ ũmwe nĩwookie ambĩĩa kũng'ang'ana nake nginya kwambĩĩa kũkya. 25Yĩla mũndũ ũsu wamanyie kana nĩwaemwa nĩ kũsinda Yakovo, nĩwamũkũnie waswa, na kũũ kwauma vala kũkwatanĩlw'e naw'o. 26Nĩvo ĩndĩ mũndũ ũsu weeie Yakovo atĩĩ, “Ndeka nĩthi, nũndũ kũkilĩlye kũkya.”

Ĩndĩ Yakovo amwĩa, “Ndikũeka ũthi nginya ũtie wangathima.”

27Mũndũ ũsu akũlya Yakovo, “Wĩtawa ata?”

Yakovo amũsũngĩa, “Nĩtawa Yakovo.” 28#Mwa 35.10 Mũndũ ũsu amwĩa, “Ndũkambĩla kwĩtwa Yakovo ĩngĩ, ĩndĩ ũkeetawa Ĩsilaeli#32.28 Ĩsilaeli: Ũalyũlo wa ĩsyĩtwa yĩĩ nĩ Ũla ũng'ang'anaa na Ngai nũndũ nũng'ang'anĩte na Ngai na andũ, na ũkamasinda.”

29 # Asi 13.17-18 Nĩvo ĩndĩ Yakovo wamwĩie atĩĩ, “Naku mwa ndavye wĩtawa ata.”

Ĩndĩ mũndũ ũsu amũkũlya, “Wĩenda kũmanya ĩsyĩtwa yakwa nĩkĩ?” Nĩvo ĩndĩ mũndũ ũsu waathimĩie Yakovo vau.

30Kwoou Yakovo nĩweetie vandũ vau Venueli ayasya atĩĩ, “Nĩnoona Ngai metho kwa metho, na nalea kũkw'a.” 31Syũa nĩyaumie Yakovo ayuma Venueli na nĩwaendete aithua nũndũ wa waswa wake ũla wakũniwe. 32Kũvika ũmũnthĩ andũ ma nzyawa sya Ĩsilaeli maiĩsaa nyama sya waswa nũndũ vau nĩvo Yakovo wakũnĩlwe.

Attualmente Selezionati:

Mwa 32: KAMBA

Evidenziazioni

Copia