Mwa 26

Isaka na Mũsumbĩ Avimeleki

1Nĩkweethĩiwe na yũa nthĩ ĩla Isaka watwĩe, eka yĩla yaĩ kw'o ĩvindanĩ ya Avalaamu. Isaka nĩwaendie Ngelali kwa Avimeleki Mũsumbĩ wa Avilisiti. 2Mwĩai Ngai nĩwamumĩlĩĩle na amwĩa atĩĩ, “Ndũkathi nthĩ ya Misili, ĩndĩ tũa nthĩ ĩla ngũkwony'a. 3#Mwa 22.16-18 Ĩkalanga kwa kavinda nthĩ ĩno ya ũeninĩ, nakwa ngeethĩawa vamwe naku na ngakũathima. Ngakũnenga we na nzyawa syaku nthĩ ĩno yonthe na kwĩanĩsya wĩw'ano ũla neevĩtie kũla kwĩ ĩthe waku Avalaamu. 4Ngaingĩvya nzyawa syaku ta ndata sya matunĩ na kwinenga nthĩ ĩno yonthe, na kwĩsĩla ũsyaonĩ waku ngaathima andũ ma mbaĩ syonthe ĩũlũ wa nthĩ. 5Ngakũathima nĩkwĩthĩwa Avalaamu nĩwambĩw'aa na kwĩka ũndũ namwĩaĩa, na kwĩanĩsya myamũlo, motw'ĩo, na mĩao yakwa.”

6Kwoou Isaka nĩwatũie Ngelali. 7#Mwa 12.13; 20.2 Yĩla aũme ma Ngelali makũlilye Isaka ĩũlũ wa mũka nĩwameie Laveka nĩ mwĩĩtu-a-inyia. Nĩwakĩaa kũmatavya kana nĩ kiveti kyake, nĩkwĩthĩwa oonaa kana aũme asu nĩmatonya kũmũaa na kwosa Laveka nũndũ aĩ mwanake mũno. 8Ĩtina wa Isaka kwĩkala kũu vandũ va ĩvinda ĩasa, Avimeleki mũsumbĩ wa Avilisiti nĩwasyaĩlye ndĩlĩsyanĩ na oona Isaka aithaũka na Laveka mũka wake na kũmũkwatanga. 9Avimeleki nĩwatũmanie Isaka na ooka amwĩa atĩĩ, “Kwoou ũsu nĩ mũka waku! Ũnaisye nĩ mwĩĩtu-a-inyia waku nĩkĩ?”

Nake Isaka amũsũngĩa, “Nĩnoonaa ta ndonya kũawa nasya nĩ kĩveti kyakwa.”

10Avimeleki amũkũlya, “Ũũ nĩ ũndũ Mwaũ ũtwĩkĩte? Ũmwe wa aũme ma Ngelali anaĩ atonya kũmanyana kĩ-mwĩĩ na kĩveti kyaku atesĩ, naku ũituma tũtalĩlwa ĩvĩtyo.” 11Avimeleki nĩwakanisye andũ onthe amea atĩĩ, “Ũla wĩkiita mũndũ ũũ kana kĩveti kyake akooawa.”

12Isaka nĩwavandie lĩu nthĩ ĩsu, na mwakanĩ o ũsu akwata ngetha kũndũ ĩana kwa mbeũ ĩla wavandĩte, nĩkwĩthĩwa Mwĩai Ngai nĩwamũathimĩte. 13Isaka nĩwatw'ĩkie mũthwii, na ũthwii wake waendeea kwongeleka nginya eethĩwa e na ũthwii mwingĩ mũno. 14Aĩ na ndĩthya sya mbũi na malondu, ng'ombe na o ta ũu aĩ na athũkũmi aingĩ mũno kũvikĩa Avilisiti mambĩĩa kũmwĩw'ĩa kĩwĩu. 15Kwoou Avilisiti nĩmalindile kwa kwĩkĩa mũthanga ithima syonthe ila athũkũmi ma Avalaamu ĩthe wake menzĩte.

16Avimeleki nĩweeie Isaka atĩĩ, “Uma kũũ kwitũ ũthi nũndũ nũkwatĩte vinya mwingĩ kwĩ ithyĩ.” 17Kwoou Isaka nĩwaumie kũu na athi kwaka maeema mwandanĩ wa Ngelali na atũa vo. 18Isaka nĩwavukũie ithima ila syenzĩtwe ĩvinda ya ĩthe wake Avalaamu, nũndũ Avilisiti nĩmalindĩte ithima isu ĩtina wa kĩkw'ũ kya Avalaamu. Isaka nĩwasyĩtie masyĩtwa o ala ĩthe wasyĩtaa.

19Athũkũmi ma Isaka nĩmenzie kĩthima mwandanĩ ũsu nginya mavikĩa kĩw'ũ kĩũvulutya. 20Ĩndĩ aithi ma nthĩ ya Ngelali nĩmakananĩie na aĩthi ma Isaka ĩũlũ wa kĩthima kĩu mayasya, “Kĩthima kĩĩ nĩ kitũ!” Kwoou Isaka nĩweetie kĩthima kĩu “Ngananĩo,” nũndũ wa kũkananĩa kwoo.

21Athũkũmi ma Isaka nĩmenzie kĩthima kĩngĩ, na aĩthi ma nthĩ ya Ngelali makananĩa na aĩthi ma Isaka ĩũlũ wa kĩthima kĩu o nakyo, na Isaka nĩweetie kĩthima kĩu “Ũmaitha.” 22Nĩwathamie kuma vau athi vandũ vangĩ na enza kĩthima kĩngĩ vau. Vayaaĩthĩwa na ngananĩo ĩũlũ wa kĩthima kĩu. Kwoou Isaka akĩta, “Ũthasyo,” na asya, “Yu Mwĩai Ngai nĩwatũnenga ũthasyo wa kwĩkala nthĩ ĩno na nĩtũkũendeea nesa twĩ vo.”

23Kuma nthĩ ĩsu Isaka nĩwathamie na athi Mbeeli-sieva. 24Isaka avika Mbeeli-sieva, Mwĩai Ngai nĩwamumĩlĩĩle na amwĩa atĩĩ, “Ninyie Ngai wa ĩthe waku Avalaamu. Ndũkakĩe, nũndũ nĩ vamwe naku. Ngakũathima, na ũkũnenga nzyawa mbingĩ nũndũ wa ũtianĩo wakwa na mũthũkũmi wakwa Avalaamu.” 25Isaka nĩwaakie kĩthembeo vau, na amũthaitha Mwĩai Ngai. Nĩwambie ĩeema yake vau, na athũkũmi make menza kĩthima vo.

Isaka na Avimeleki Maiseũvya Wĩw'ano

26 # Mwa 21.22 Avimeleki e na Ausathi mũtai wake na Vikoli mũnene wa asikalĩ make nĩmaumie Ngelali mathi kwona Isaka. 27Isaka nĩwamakũlilye atĩĩ, “Mwooka kũmbonea kyaũ, nenyu nĩmwamenie na mwandũngya kuma nthĩ yenyu?”

28Namo mamũsũngĩa mamwĩa atĩĩ, “Yu nĩtũmanyĩte vyũ kana Mwĩai Ngai e vamwe naku, na kwoou nĩtwĩw'ane kwa kwĩvĩta, na tũiseũvya ũtianĩo naku, 29kana ndũkatwĩka naĩ, o ũndũ naitũ tũtaakwĩka naĩ. Nĩtwakwĩkie nesa na twakũeka ũthi na mũuo. Yu Mwĩai Ngai nũkũathimĩte.” 30Isaka nĩwaseũvĩisye andũ asu mboka maya na manyw'a. 31Ũnĩ ũsu kwakya tene maamũka Isaka nĩwaseũvisye wĩw'ano na Avimeleki kwa kwĩvĩta. Isaka nĩwatianĩie ũvoo namo, na mataanĩsya nake mathi na mũuo.

32Mũthenyanĩ o ũsu athũkũmi ma Isaka nĩmookie mamũtavya ĩũlũ wa kĩthima kĩla maĩ manenza, na mamwĩa, “Nĩtwavikĩa kĩw'ũ.” 33Isaka nĩweetie kĩthima kĩu, “Wĩvĩto.” Ũu nĩw'o ndũa nene ya Mbeeli-sieva yakwatie ĩsyĩtwa ya yo kũvikĩa o na ũmũnthĩ.

Iveti sya Esaũ

34Yĩla Esaũ wavikisye ũkũũ wa myaka mĩongo ĩna nĩwatwaie iveti ilĩ kuma mbaĩnĩ ya Aititi. Iveti isu syaĩ Yundithi mwĩĩtu wa Veeli, na Mbasemathi mwĩĩtu wa Eloni. 35Aka asu nĩmatumie Isaka na Laveka mekala na woo mathayũnĩ moo.

Attualmente Selezionati:

Mwa 26: KAMBA

Evidenziazioni

Copia