Mwa 22

Ngai Aitata Avalaamu Akathembe Mwana wake Isaka

1 # Aevl 11.17-19 Ĩtina wa maũndũ asu, Ngai nĩwatatie Avalaamu. Ngai nĩwamwĩtie, “Avalaamu!” Nake Avalaamu eetĩka “Ĩĩ, ninyioo!” 2#2Mav 3.1 Na Ngai amwĩa atĩĩ, “Osa Mwana waku Isaka, ũla nowe mwana waku e o ũmwe na wendete mũno, na ũithi nthĩ ya Molia, ũkamũthembee kĩĩmanĩ kĩla ngũthi kũkwony'a, ethĩwe nthembo ya kũvĩvw'a.”

3Ũnĩ ũsu Avalaamu nĩwaamũkie kĩoko tene, na ailĩĩla mĩio ĩng'oinĩ yake; nĩwoosie athũkũmi make elĩ, na mwana wake Isaka maendany'e. Amina kũtilanga ngũ sya kũvĩvya nthembo, nĩwambĩĩie kyalo kya kũthi vala Ngai wamũtavĩtye. 4Ĩtina wa kyalo kya mĩthenya ĩtatũ, Avalaamu nĩwoonie vandũ vau e vaasa. 5Nĩweeie athũkũmi make atĩĩ, “Ĩkalai vaa na ĩng'oi. Nyie na mwana wakwa Isaka nĩtũũthi vaaya tũkathaithe na ĩndĩ tũyũka.” 6Avalaamu nĩwoosie ngũ sya nthembo ya kũvĩvw'a na amwaĩkya Isaka mwana wake akue, nake nĩwakuie kavyũ na makaa makene ma kũvuva mwaki. Yĩla maendanĩtye, 7Isaka nĩweetie Ĩthe wake, “Nau.”

Avalaamu eetĩka “Ĩĩ mwana wakwa!” Isaka amũkũlya, “Nĩona vaa twĩ na makaa makene na ngũ, ĩndĩ ĩĩva ndũũme ya nthembo ya kũvĩvw'a?”

8Nake Avalaamu asũngĩa, “Mwana wakwa, Ngai nũkũtũnenga katena ka ĩlondu ka nthembo ya kũvĩvw'a.” Nĩmaendeeie na kyalo me elĩ.

9 # Yak 2.21 Yĩla mavikie vala Ngai wamũtavĩtye, Avalaamu nĩwaseũvisye kĩthembeo vo na avanga ngũ ĩũlũ wakyo. Nĩwoovanisye Isaka mwana wake na amwilĩĩla kĩthembeonĩ kĩu ĩũlũ wa ngũ. 10Avalaamu nĩwoosie kavyũ nĩ kana oae mwana wake Isaka. 11Ĩndĩ mũlaĩka wa Mwĩai Ngai nĩwamwĩtie Avalaamu kuma ĩtunĩ ayasya, “Avalaamu! Avalaamu!”

Nake Avalaamu asũngĩa, “Ĩĩ, ninyioo.”

12Mũlaĩka amwĩa atĩĩ, “Ndũkaũmĩsye mwana waku o na ndũkamwĩke ũndũ, nĩkwĩthĩwa yu nĩnamanya kana wĩ na kĩkĩo kya Ngai nũndũ ndũnambata mwana waku e o ũmwe.”

13Avalaamu nĩwookĩlilye metho na oona ndũũme ĩtina wake, ĩkoletw'e mbya syayo nĩ kĩkuthu. Nĩwaendie oosa ndũũme ĩsu na amĩthemba ta nthembo ya kũvĩvw'a vandũ va mwana wake. 14Kwoou Avalaamu nĩweetie vandũ vau, “Mwĩai Ngai Nũnenganae.” Kũvika o na ũmũnthĩ andũ maasya, “Kĩĩmanĩ kya Mwĩai Ngai, Ngai nũnenganae.”

15Mũlaĩka wa Mwĩai Ngai nĩweetie Avalaamu ĩvinda ya kelĩ kuma ĩtunĩ, 16#Aevl 6.13-14 na amwĩa atĩĩ, “Nĩngwĩvĩta na ĩsyĩtwa yakwa, nĩasya ũu nyie Mwĩai Ngai, kana nĩkwĩthĩwa nĩwĩkie ũu na ndũnambata mwana waku e o ũmwe, 17#Aevl 11.12 kwa w'o nĩngũkũathima mũno na kwingĩvya nzyawa syaku ta ndata sya matunĩ, kana ta kĩthangathĩ kĩla kĩ ũtee wa ũkanga. Nzyawa syaku ikasinda amaitha masyo, 18#Meko 3.25 na kwĩsĩla ũsyaonĩ waku ngaathima andũ ma mbaĩ syonthe ĩũlũ wa nthĩ nũndũ we nĩwambĩw'a.” 19Nĩvo ĩndĩ Avalaamu wasyokie vala ve athũkũmi make na maendany'a Mbeeli-sieva. Avalaamu nĩwaendeeie kwĩkala vau Mbeeli-sieva.

Nzyawa Sya Naoli

20Ĩtina wa maũndũ asu Avalaamu nĩwamanyie kana mwana-a-inyia Naoli nũsyaĩwe syana nyanya nĩ Milika mũka wake. Syana isu syaĩ: 21Ũsi ĩkithathi yake, na Mbusi mwana-a-inyia, Kemũeli ĩthe wa Alamu, 22na Keseti, Aso, Vilitasi, Yitilavu na Mbethũeli. 23Mbethũeli aĩ ĩthe wa Laveka. Syana isu nyanya nĩsyo Naoli mwana-a-inyia wa Avalaamu wasyaĩwe nĩ mũka wake Milika. 24Mũndũ mũka weetawa Leuma, ũla watũĩtw'e nĩ Naoli nĩwasyaie Teva, Ngaamu, Taasi na Maaka.

Attualmente Selezionati:

Mwa 22: KAMBA

Evidenziazioni

Copia